നനവ്‌

നനവ് -ഞങ്ങളുടെ മണ്‍വീട്

2012-01-12T20:40:00.003+05:30

നനവ് -വിദൂരവീക്ഷണം

സ്വാഗതം

സിറ്റൌട്ട്

സിറ്റൌട്ട് -അകം

നനവ് എന്നു പേരിട്ടിരിയ്ക്കുന്ന ഞങ്ങളുടെ കൊച്ചു മണ്‍വീട് ഒരുങ്ങിയിരിയ്ക്കുകയാണ്. വിഭവങ്ങള്‍ പരമാവധി കുറച്ചുകൊണ്ടും പ്രകൃതിയിലേയ്ക്ക് പരമാവധി തുറന്നിട്ടുകൊണ്ടും നിര്‍മ്മിച്ചിരിയ്ക്കുന്ന നനവില്‍ ഞങ്ങള്‍ താമസിച്ചുതുടങ്ങിയിട്ട് നാല് മാസത്തോളമായി. വ്യത്യസ്തതയാര്‍ന്ന അനുഭവങ്ങള്‍ പകര്‍ന്നുകൊണ്ട് ഞങ്ങളെ ഏറെ സന്തോഷിപ്പിച്ചുകൊണ്ടിരിക്കുകയാണ് ഈ മണ്‍വീട്

ഹാള്‍ നല്ല ചൂടുള്ളപ്പോള്‍ പുറത്തുനിന്നും കയറിവന്നാല്‍ നല്ല തണുപ്പേകി നനവ് ആശ്വസിപ്പിയ്ക്കും . അതിനാല്‍ ഇവിടെ ഫാനുകള്‍ ആവശ്യമില്ല. തണുത്തുവിറയ്ക്കുന്ന മഞ്ഞു കാലത്ത് ജനവാതിലുകള്‍ അടച്ചിട്ടാല്‍ ഇളംചൂടു പകരാനും നനവിന് സാധിയ്ക്കുന്നുണ്ട് . വീട് അടച്ചിട്ട് പോയിവന്ന് ,വാതില്‍ തുറന്നപ്പോള്‍ പുറത്തു 22 -24 ഡിഗ്രി തണുപ്പുള്ളപ്പോള്‍ 28 -32 ഡിഗ്രീ ചൂട് പകര്‍ന്ന് ഞങ്ങളെ അത്ഭുതപ്പെടുത്തിയിട്ടുണ്ട് നനവ്. അതിഥികള്‍ക്കുള്ള വിശ്രമസ്ഥലം

ഹാളിലെ ചുവരില്‍ ടിവീയും മറ്റും

മഴക്കാലത്താണ് അതിലേറെ രസം. നല്ല മഴ പെയ്യുമ്പോള്‍ മണ്‍ചുവരുകളും, ഓടും അല്പ്പം കോണ്‍ക്രീറ്റും കലര്‍ന്ന മേല്‍ക്കൂരയും തണുപ്പത്രയും പിടിച്ചെടുത്ത് വീടിനെയാകെ തണുപ്പിയ്ക്കുന്നു .കമ്പിളിയും പുതച്ച് കിടയ്ക്കാന്‍ തോന്നിപ്പിയ്ക്കുന്ന, ഊട്ടിയിലോ മറ്റൊ പോയ അവസ്ഥ.

സ്വിച്ച് ബോര്‍ഡ്

കുളിമുറി

ഇടയ്ക്കു വെയിലുദിച്ച ശേഷം മഴ വന്നാല്‍ മറ്റൊരനുഭവമായിരിയ്ക്കും. വീടിനകത്തിരുന്നാല്‍ നേര്‍ത്ത ,തണുവാര്‍ന്ന മഴച്ചാറ്റലില്‍ നനയുംപോലെ തോന്നുന്ന ഒരു അനുഭൂതി പകര്‍ന്ന് നനവ് വിസ്മയിപ്പിച്ചു.

ഓപ്പണ്‍ എരിയയിലെ മണ്‍കല ഫ്രിഡ്ജ്

ഇത് വര്‍ക്ക് എരിയയിലാണ്

പ്രധാനമായും ഒരു കിടപ്പുമുറിയും ,ഒരുതുറന്ന അടുക്കള ,കംപ്യൂട്ടര്‍മുറി,അതിഥിമുറി ,ടിവി റൂം, ഹാള്‍ എന്നിവയെല്ലാം ചേര്‍ന്ന ഒരു മുറിയും സിടൌട്ടും വര്‍ക്കിംഗ് കിച്ചാണുമാണ് നനവിനുള്ളത്.ചായം തേച്ചിട്ടില്ല . ചുവരില്‍ അകവശത്ത് മണ്‍തേപ്പാണ്. പുറംച്ചുവരുകള്‍ തേച്ചുമിനുക്കിയിട്ടില്ല. നിലത്തു തറയോടുകളാണ് പാകിയിരിയ്ക്കുന്നത്.ജനലഴികള്‍ തെങ്ങിതടി ഉരുട്ടി ച്ചെത്തിയതാണ് .ഇരുമ്പിന് പകരം സിടൌട്ടിനും വര്‍ക്ക് എരിയയ്ക്കും മരം കൊണ്ടുള്ള അഴികളാണ് .

ഓപ്പണ്‍ കിച്ചണ്‍

ഇവിടെ നിന്നാല്‍ വീടിന്റെ എല്ലാ ഭാഗത്തേയ്ക്കും ശ്രദ്ധ പതിപ്പിക്കാനാകും

നനവിലെ ആമ്പല്‍ക്കുളം

കിച്ചന്‍ സിങ്ക് -വര്‍ക്ക് ഏരിയയില്‍

കിണറിന് മണ്ണുകൊണ്ട് ആള്‍മറ

ഹാളില്‍ അതിഥി മുറിയും കമ്പ്യൂട്ടര്‍മുറിയും

വിറകടുപ്പ്

മണ്ണിന്‍റേയും മനസ്സിന്‍റെയുമീ സ്നേഹ നനവ് ഞങ്ങള്‍ ക്ക് ഒരുപാട് പുതുമയാര്‍ന്ന അനുഭവങ്ങള്‍ തന്നുകൊണ്ടിരിയ്ക്കുകയാണ് . ഒരുപാടുപേര്‍ ഇവിടെ വന്നുകഴിഞ്ഞു . ചില സുഹൃത്തുക്കള്‍ ഇവിടെ താമസിച്ചു കഴിഞ്ഞു. ഏവര്‍ക്കും ഏറെ ഇഷ്ടമായിട്ടുണ്ട് ഞങ്ങള്‍ മണ്ണിന്‍റെയും വാടാത്ത സ്നേഹനനവുകൊണ്ട് കെട്ടിയുയര്‍ത്തിയ ഈ മണ്‍വീട്.....ഒരു ആശ്രമത്തിന്‍റെ ശാന്തിയും ഹോളീഡേ കോട്ടേജിന്റെ മനോഹാരിതയും ഒത്തുചേര്‍ന്ന നനവിനെ എന്നും നനവാര്‍ന്ന ഒരിടമാക്കി സംരക്ഷിയ്ക്കണം ഞങ്ങള്‍ക്ക്. നിങ്ങള്‍ക്കും ഇതിനായി ഒപ്പം കൂടാം .ഔപചാരികതളേതുമില്ലാതെ ഇവിടേയ്ക്ക് വരാം...

മണ്ണറിഞ്ഞ് കൃഷി ചെയ്യുക...

2011-05-10T16:59:00.002+05:30

ജൈവതക്കാളി

ഏതൊരു ജീവിക്കുമെന്നപോലെ മനുഷ്യൻ എന്ന സ്പീഷീസിനും ആരോഗ്യത്തോടെ ജീവിക്കാൻ പോഷകങ്ങൾ നിറഞ്ഞ ആഹാരം,ശുദ്ധജലം, ശുദ്ധവായു ഇവ അത്യാവശ്യമാണ്..കൃഷി എന്ന പ്രകൃതിവിരുദ്ധമായ ഏർപ്പാടാണ് ആദ്യം ആഹാരത്തിനായും പിന്നീട് ധനസമ്പാദനത്തിനായും മനുഷ്യൻ തുടങ്ങിയത്..അതോടെ പ്രകൃതിയുടെ താളം തെറ്റിത്തുടങ്ങി...

കരിയില പുതയിട്ട കൃഷിയിടം

ആദ്യകാലങ്ങളിൽ പ്രകൃതിയെ നോക്കിയാണ് മനുഷ്യൻ കൃഷിചെയ്തിരുന്നത്..അന്നവൻ തനിക്കുള്ള ആഹാരം ഭൂമിയെ അധികം നോവിക്കാതെ; രാസവളം,കീടനാശിനികൾ, കളനാശിനികൾ തുടങ്ങിയ മാരകവിഷങ്ങൾ, ഹോർമോണുകൾ എന്നിവയൊന്നും ഉപയോഗിക്കാതെ, മറ്റു ജീവികളേയും സസ്യങ്ങളേയും നശിപ്പിക്കാതെ ,സസ്യവളർച്ചയുടെ താളം ഉൾക്കൊണ്ടുകൊണ്ട് കൃഷിചെയ്തപ്പോൾ അവനോ മറ്റു ജീവികൾക്കോ പരിസ്ഥിതിയ്ക്കോ പറയത്തക്ക കോട്ടങ്ങളൊന്നും സംഭവിച്ചില്ല.

നനവിൽ തെങ്ങും പൈനാപ്പിളും കുരുമുളകുമൊക്കെ കാടുപോലെ വളരുന്നു

അന്ന് ശരിക്കും മണ്ണറിവുനേടി ,കാലാവസ്ഥനോക്കി ,തികച്ചും ദൈവികമായൊരു അനുഷ്ഠാനം പോലെ ,ജീവിതത്തിന്റെ ഒരു ഭാഗമെന്ന നിലയിൽ ,അത്യാർത്തി ഒഴിവാക്കിക്കൊണ്ടുള്ള ഒന്നായിരുന്നു കൃഷി.. മണ്ണറിവില്ലാതായപ്പോൾ, മണ്ണ് വിപണന വസ്തുവായി മാറിയപ്പോൾ, ഭാവി തലമുറയ്ക്കായ് കരുതിവയ്ക്കേണ്ടതൊക്കെ ; കാടും കുന്നും വയലും പുഴയും തോടുമൊക്കെ,ആർത്തി തീർക്കാനുള്ള ഉപാധികൾ മാത്രമായപ്പോൾ,കൃഷിയെ ജൈവികതയുടെ സംതുലനാവസ്ഥയിൽ നിലനിർത്തിയിരുന്ന പ്രകൃതിയുടെ വ്യവസ്ഥകൾ നശിപ്പിക്കപ്പെട്ടു..മണ്ണ് എന്ന ജീവന്റെ ആധാരത്തെ ഒരു നിർജീവവസ്തുവായി കരുതാൻ മലയാളി എന്നു തുടങ്ങിയോ അന്നാണ് കൃഷിയുടെ നാശം തുടങ്ങിയത്..

ആഹാരശീലങ്ങൾ മാറിമറിയുകയും, ഭൂമി എന്ന ഏവർക്കും തുല്യാവകാശം ഉണ്ടാകേണ്ട വസ്തു കൈയൂക്കുള്ളവരുടെ കൈപ്പിടിയിൽ ഒതുങ്ങുകയും , കൃഷി ഒരു സംസ്ക്കാരമെന്ന നിലയിൽ നിന്ന് എങ്ങനേയും പണമുണ്ടാക്കാനുള്ള ഒരു വ്യവസായം എന്നനിലയിലേയ്ക്ക് മാറുകയും ചെയ്തതോടെ ,മാരകവിഷം ഉപയോഗിക്കാനും തനിക്ക് ലാഭം കിട്ടാത്ത എന്തും നശിപ്പിക്കാനും ഉള്ള പ്രവണതകൾ മാത്രം ഏറിയേറി വന്നു..

വെട്ടുകയോ കിളയ്ക്കുകയോ ചെയ്യാത്ത തെങ്ങിൻതടം.ചകിരി ,ചിരട്ട ,ഓല തുടങ്ങിയവയ്ക്കൊപ്പം പറമ്പിൽനിന്നും ലഭിയ്ക്കുന്ന പച്ചിലവളവും അൽ‌പ്പം ചാണകവും ഇട്ടുകൊടുക്കുന്നു.മരക്കഷണങ്ങളും ഇടുന്നു.

ഈ തക്കം നോക്കി കൃഷിയെ സഹായിക്കാനെന്നപേരിൽ രാസവള കീടനാശിനി കമ്പനികൾ തഴച്ചുവളർന്നു.സർക്കാരുകൾ അവരുടെ കൈവശമായതിനാൽ അവർ പറയുന്നതെന്തോ അതു വേദവാക്യമായി..അവരെ സഹായിക്കാൻ വേണ്ടിമാത്രമുള്ളതായി സർക്കാരുടമസ്ഥതയിലുള്ള കാർഷികസർവ്വകലാശാലകളും ഗവേഷണസ്ഥാപനങ്ങളും..

ചിതൽ‌പ്പുറ്റുകൾ മണ്ണിന്റെ ആരോഗ്യത്തെ സൂചിപ്പിക്കുന്നു

സർക്കാർ സ്ഥാപനങ്ങളായതിനാൽ ,ഒന്നുമറിയാത്ത കർഷകർ ഇവർ പറയുന്നതത്രയും വേദവാക്യങ്ങളായെടുത്തു.രാസകൃഷിയ്ക്കു മുമ്പും ഇവിടെ കൃഷി ഉണ്ടായിരുന്നു എന്നകാര്യം പോലും ചരിത്രത്തിൽനിന്നും മൂടിവയ്ക്കപ്പെട്ടു...കമ്പനികൾ കോടികളിൽ നിന്നും സഹസ്രകോടികളിലേയ്ക്ക് തങ്ങളുടെ വരുമാനം വർധിപ്പിച്ചു..ഇവരുടെ ദല്ലാളന്മാരായി നിന്ന ഉദ്യോഗസ്ഥർക്കും കിട്ടി ലക്ഷങ്ങളും കോടികളും മന്ത്രിപദങ്ങൾ വരെയെത്തിയ സ്ഥാനമാനങ്ങളും...ഇന്ത്യ ഭരിക്കുന്നതു തന്നെ അവരാണ് എന്ന നിലയിലേയ്ക്ക് ഒടുവിൽ കാര്യങ്ങൾ എത്തിച്ചേർന്നു..

സപ്പോട്ട.ഒപ്പം മാവും പ്ലാവും വാഴയും പപ്പായയും ഒക്കെയുണ്ട്..

ഇതിനിടയിൽ കാർഷികരംഗം അപ്പാടെ തകർന്നു.. കൃഷി ഏറ്റവും ചെലവേറിയ ഒന്നായി മാറി..എല്ലാ വിഷങ്ങളും ഉപയോഗിക്കേണ്ടതിലും എത്രയോ മടങ്ങ് ഉപയോഗിച്ചിട്ടും മണ്ണിൽനിന്നും അതിനുതക്ക വിളവ് ലഭിക്കാതായി.മണ്ണ് തരിശായി...കീടങ്ങളും രോഗങ്ങളും പെരുകി.എല്ലാ ഉറവകളും വിഷലിപ്തങ്ങളായി..എന്റോസൾഫാനും അതുപോലുള്ള മാരക ജീവനാശിനികളും മനുഷ്യവംശത്തിനെ തന്നെ അവസാനിപ്പിക്കും എന്ന നിലയിലേയ്ക്ക് ഇന്ന് കാര്യങ്ങൾ വഷളായിക്കഴിഞ്ഞു...

നനവിലെ കുരുമുളക്

ഇപ്പോഴെങ്കിലും ഈ വൈകിയ വേളയിലെങ്കിലും, മനുഷ്യൻ പുനർവിചിന്തനം നടത്തുന്നില്ലെങ്കിൽ ,എന്താണ് കൃഷിയെന്നും എങ്ങനേയാണ് കൃഷി ചെയ്യേണ്ടതെന്നും പഠിയ്ക്കുന്നില്ലെങ്കിൽ, ഈ വിഷക്കൃഷി മനുഷ്യവംശത്തിന്റെ അന്തകനായിത്തീരുകതന്നെ ചെയ്യും..അതിനാൽ നമുക്ക് കൃഷിയെന്നാലെന്തെന്ന് എങ്ങനെയെന്ന് ഒന്ന് പരിശോധിച്ചു നോക്കാം.വളരെ വലിയ ഒരു കാര്യമാണിത്.പ്രധാനകാര്യങ്ങൾ മാത്രം ചുരുക്കി പറയാം..

ആൾക്കാർക്കിപ്പോൾ ജൈവകൃഷി ചെയ്താൽ കൊള്ളാം എന്നുണ്ടെങ്കിലും ആശങ്കകൾ അവരെ അതിൽനിന്നകറ്റുകയാണ്.വേണ്ട അളവിൽ ആഹാരമുണ്ടാക്കാൻ ഇതു കൊണ്ടാവില്ല എന്നാണ് ഒരു സംശയം.കൃഷി ഒരു ഉപജീവനമാർഗ്ഗമാക്കിയിരിക്കുന്നവർക്ക് ആഹാരം മാത്രം പോര,പണം കൂടി അതിൽനിന്നു വരണം .ജൈവരീതിയിൽ അത്രനല്ല വിളവ് കിട്ടുകയേ ഇല്ല എന്ന് അവരെ കീടനാശിനി ഏജന്റുമാരായ ഉദ്യോഗസ്ഥർ പഠിപ്പിച്ചിരിക്കുകയുമാണല്ലോ..

ഏറ്റവും നല്ല കീടനാശിനികളാണ് കിളികൾ .അവർക്കായി കൂരാമ്പരൽക്കായ,തെച്ചിപ്പഴം, കാട്ടുമുല്ല തുടങ്ങി ഒട്ടേറെ സസ്യങ്ങളുണ്ടിവിടെ..പഴംതിന്ന് പാട്ടുകൾ പാടിയും രൂപമനോഹാരിതായാലും മനസ്സിനാനന്ദമേകിയും,പിന്നെ,..

പിന്നെ,മണ്ണിനു വളക്കൂറു നൽകിയും, പരാഗണം നടത്തിയും..ഇത്രയേറെ സഹായിക്കുന്ന കിളികൾക്കായി വേനൽക്കാലത്ത് മൺചട്ടികളിൽ അൽ‌പ്പം കുടിവെള്ളം കൂടി നൽകുക.

കൃഷി എന്തെന്നറിയണമെങ്കിൽ ആദ്യം പ്രകൃതിയെ നിരീക്ഷിയ്ക്കുക.ലക്ഷോപലക്ഷം സസ്യങ്ങൾ മനുഷ്യൻ വളർത്താതെ ഒരു കീടബാധയുമേൽക്കാതെ പ്രകൃതിയിൽ വളരുന്നുണ്ട്..ഒരു കാടിന്റെ കാര്യമെടുത്തുനോക്കുക.ആരും വളം ചേർക്കാതെ, വെള്ളമൊഴിക്കാതെ എത്ര നന്നായാണവിടെ സസ്യങ്ങൾ വളരുന്നതും പൂക്കുന്നതും കായ്ക്കുന്നതുമൊക്കെ!!..മണ്ണിൽ സസ്യവളർച്ചയുടെ അടിസ്ഥാനതത്വം ഇതാണ്..ഒരിടത്ത് ഒരു സസ്യത്തിനു വളരാനാവശ്യമായ പോഷകമൂലകങ്ങൾ ഉണ്ടെങ്കിൽ, അതിനനുയോജ്യമായ കാലാവസ്ഥയുമുണ്ടെങ്കിൽ,അവിടെ ആ സസ്യം വളർന്നിരിക്കും..പറമ്പുകളിലും പുറമ്പോക്കുകളിലുമൊക്കെ പലയിനം സസ്യങ്ങൾ മുളച്ചുവളരുന്നതും അവയ്ക്കാവശ്യമായ മൂലകങ്ങൾ മണ്ണിൽ ഉള്ളതുകൊണ്ടു മാത്രമാണ്..പുതുമഴ പെയ്തയുടൻ മണ്ണിനെ മൂടിപ്പുതപ്പിച്ചുകൊണ്ട് പലയിനം പുൽ വർഗ്ഗസസ്യങ്ങൾ മുളച്ചുപൊന്തുന്നത് മണ്ണിൽ നിന്നും ലവണങ്ങൾ നഷ്ടമാകാതിരിക്കാനാണ്.ആ ലവണങ്ങളാണ് മണ്ണിന്റെ വളമായി നമ്മുടെ കൃഷിയ്ക്കുമുപയോഗിക്കാനായി പ്രകൃതി ഈ സസ്യങ്ങളിൽ സംഭരിച്ചു വയ്ക്കുന്നത്.

ഇനി എന്തുകൊണ്ടാണ് കൃഷി എന്നത് ഒരു പ്രകൃതിവിരുദ്ധ ഏർപ്പാടാണ് എന്നു പറയാം.നാം നടുന്നത് നമുക്ക് ആഹാരത്തിനോ ഔഷധത്തിനോ അലങ്കാരത്തിനോ പണമുണ്ടാക്കാനോ ഒക്കെ വേണ്ട സസ്യങ്ങളാണ്..ഒരു ചെടി നടുമ്പോൾ ,മണ്ണിൽ അതിനാവശ്യമായ പോഷണവസ്തുക്കളും അതിനു വളരാനാവശ്യമായ കാലാവസ്ഥയും വേണമെന്ന പ്രാഥമിക തത്വവും ;അതിനെ ചുറ്റിപ്പറ്റി ജീവിയ്ക്കുന്ന ഒരു പാട് ജീവികളും അതോടൊപ്പം വളരേണ്ട ഒരുപാട് സസ്യങ്ങളും ഉണ്ടാവണമെന്ന ദ്വിതീയ തത്വവും മറക്കുന്നതു കൊണ്ടാണ് കൃഷി പ്രകൃതി വിരുദ്ധമാകുന്നത്..അതുകൊണ്ടു മാത്രമാണ് വേണ്ടത്ര വിളവു ലഭിയ്ക്കുന്നില്ല,ചെടിയ്ക്ക് ആരോഗ്യമില്ല ,കീടരോഗങ്ങൾ പെരുകുന്നു തുടങ്ങിയ എല്ലാ കാർഷികപ്രശ്നങ്ങളും ഉടലെടുക്കുന്നതും.

ജൈവതെങ്ങിന്റെ തലപ്പ്

തെങ്ങിന്റെ തടം

പ്രകൃതിയുടെ താളംതെറ്റിച്ചുകൊണ്ട് വളർന്നു പെരുകിയ മനുഷ്യൻ എന്ന സ്പീഷീസിനിന്ന്, ഇന്ന സ്ഥലത്ത് ഇന്ന മൂലകങ്ങൾ ഉള്ളതിനാൽ അവിടെ ഇന്ന സസ്യം വളർത്താം എന്ന സ്വാഭാവികതയിലേയ്ക്ക് മടങ്ങിയാൽ പട്ടിണി കിടന്നു മരിയ്ക്കേണ്ടിവരും..എന്നാൽ അവന് ചെയ്യാൻ പറ്റുന്ന ഒരു കാര്യമുണ്ട്...കൂടുതൽ താളം തെറ്റിയ്ക്കുന്ന ഏകവിളത്തോട്ടങ്ങൾ ഉപേക്ഷിയ്ക്കുക.മണ്ണിൽ വേണ്ട അളവിൽ കാർബണും മറ്റ് മൂലകങ്ങളും തിരികെ ചേർത്തുകൊണ്ടിരിക്കുക..സസ്യജന്തു വൈവിധ്യം നിലനിർത്തുക.വൈവിധ്യം നശിപ്പിയ്ക്കുന്ന ഒരു രാസവസ്തുവും മണ്ണിൽ ചേർക്കാതിരിക്കുക.കളകൾ എന്നപേരിൽ വളരുന്ന സസ്യങ്ങളേയും പറമ്പിൽ വളർത്തുന്ന ശീമയ്ക്കൊന്ന,മന്ദാരം പോലുള്ള സസ്യങ്ങളേയും വളർച്ച നിയന്ത്രിക്കുകമാത്രം ചെയ്ത് മണ്ണിനാവശ്യമായ പോഷണങ്ങൾ തിരികെയെത്തിയ്ക്കുക....

ഫംഗസുകൾ ,വിഘാടകരിൽ ഒരാൾ

പണ്ടൊക്കെ ഒരു പാടു കിളികളുടെ കാഷ്ഠങ്ങൾ മണ്ണിൽ നൈട്രജനും പിന്നെ കുറുക്കൻ തുടങ്ങിയ, തോടുള്ള ജീവികളെ തിന്നുന്ന ജീവികളുടെ കാഷ്ഠങ്ങൾ കാത്സ്യവുമൊക്കെ തിരികെയെത്തിച്ചിരുന്നു...അവർക്ക് ജീവിക്കാനായി നമ്മുടെ പൂർവ്വികർ കാവുകളും കുന്നിൻമൊട്ടകളുമൊക്കെ വിട്ടു കൊടുത്തിരുന്നു..കീടനാശിനി തളിയ്ക്കാത്ത രാസവളമിടാത്ത വയലുകളിൽ ഇഷ്ടം പോലെ കാത്സ്യം ചേർക്കാൻ ഞവുണിക്കയും, ഉഴുതുമറിയ്ക്കാൻ മണ്ണിരകളും മറ്റനേകം ജീവികളും ,സസ്യാവശിഷ്ടങ്ങളും മറ്റും ജീർണ്ണിപ്പിച്ച് തിരികെ കാർബണടക്കമുള്ള മൂലകങ്ങൾ ചേർക്കാൻ ഒരു പാട് വിഘാടകരുമൊക്കെയുണ്ടായിരുന്നു..

കാർബൺ തിരികെ മണ്ണിലേയ്ക്ക്

രാസവസ്തുക്കൾ മൂലം അന്യംനിന്നുകൊണ്ടിരിയ്ക്കുന്ന ഇവയെ തിരിച്ചുപിടിയ്ക്കുക കൂടി ചെയ്താലേ കൃഷി വിജയിക്കുകയുള്ളൂ.തിരിച്ചു പിടിയ്ക്കാനൽ‌പ്പം കാലതാമസം വേണ്ടിവരും..അതുവരെ കൃത്യമായ പി എച്ച് പരിശോധന നടത്തി മൂല്യം7 ൽ കുറവെങ്കിൽ കാത്സ്യമടങ്ങിയ കക്കത്തോടുകൾ ചേർക്കണം.ഓരോ ചെടിയ്ക്കും കായ്ക്കാൻ മണ്ണിനതിന്റേതായ പി എച്ച് ആവശ്യമുണ്ട്..

കാർബണിന്റെ അളവ് 6% എത്തിക്കാനായാൽ പിന്നെ കൃഷിയ്ക്ക് നനയ്ക്കുക കൂടി ചെയ്യേണ്ടിവരില്ല..ഇതിനായി മണ്ണിൽ ഒരിടത്തും സൂര്യപ്രകാശം നേരിട്ടു പതിക്കാൻ സമ്മതിക്കാതെ പുതയിടുക.കരിയിലകൾ മാത്രമല്ല, ചെറുശാഖകളും വലിയ മരത്തടികളുമൊക്കെ കാർബൺ കൂട്ടാൻ സഹായിക്കും..ഇത് ജൈവകൃഷിയിലെ പരമപ്രധാനമായ ഒരു തത്വമാണ്..

ഒന്നാലോചിച്ചുനോക്കുക..നമുക്കിനിയും ഇവിടെ എന്റോസൾഫാൻ ഇരകളെയുണ്ടാക്കുന്ന ഒരു പ്രാകൃതരീതി പിന്തുടരണോ?....എന്റോസൾഫാനു ബദൽ കണ്ടെത്തും വരെ അതും ,പിന്നെ മാരകമായ മറ്റു വിഷങ്ങളും നിരോധിച്ചാൽ കൃഷി മൊത്തം തകരുമെന്ന വിഡ്ഡിത്തത്തിനു നമുക്കിനിയും മനസ്സു കൊടുക്കണോ?...എന്റോസൾഫാനെപ്പോലൊരു മാരകജീവനാശിനിയ്ക്ക് ബദലായി അതിനൊപ്പമോ അതിലേറെയോ വിഷവീര്യമുള്ള മറ്റൊരു രാസവസ്തു കൊണ്ടു വന്നിട്ട് ,നമ്മുടെ കുഞ്ഞുങ്ങളെ ഇനിയും കുരുതി കൊടുക്കണോ?...വിഷത്തിനു ബദലാകേണ്ടത് മറ്റൊരുഗ്രവിഷമാണോ?...

ഓർക്കുക..വിഷം ജീവന് എതിരാണ്.അതിന് ശത്രുകീടമെന്നോ മിത്രകീടമെന്നോ മനുഷ്യനെന്നോ ഒന്നും വകതിരിവുണ്ടാകില്ല...ജീവൻ ഏതായാലും അതിനെ നശിപ്പിയ്ക്കുക,അതുമാത്രമായിരിയ്ക്കും അതിന്റെ ലക്ഷ്യം..നമുക്ക് ജീവനിലേയ്ക്ക് തിരിച്ചു നടക്കാൻ ഇനിയുമൊരു പുനരാലോചനയുടെ ആവശ്യമുണ്ടോ?....

കാടല്ല,കൃഷിയിടമാണ്...

നനവിന്റെ തൊട്ടടുത്ത പറമ്പ്..തെങ്ങുമാത്രം. വർഷാവർഷം കിളച്ചുമറിച്ച്, രാസവളവും ചാണകവുമിട്ടാൽ അൽ‌പ്പം തേങ്ങ ,അതും മണ്ടരിബാധയാൽ വിളവും ആരോഗ്യവും കുറഞ്ഞുകുറഞ്ഞു വരുന്ന തെങ്ങുകളിൽനിന്ന്,മാത്രം ആദായം..

ജൈവകൃഷി ചെയ്യാൻ ഇനിയും ആശങ്കിക്കേണ്ടതുണ്ടോ?...

സ്വപ്നം പോലൊരു മൺവീട്...

2011-04-07T22:32:00.000+05:30

ഒരു വീട്....സുന്ദരവും ആരോഗ്യപ്രദവുമായ ഒരു കൂട്....സ്വന്തക്കാരുമൊത്ത് താമസിക്കാൻ ഒരു സ്വപ്നഭവനം...ഏതൊരു മനുഷ്യന്റേയും ആഗ്രഹമാണിത്...

വീടെന്നാൽ അഹന്തയുടേയും വിഭവക്കൊള്ളയുടേയും കെട്ടുകാഴ്ചകൾ മാത്രമായിത്തീരുന്ന ഇക്കാലത്ത്,സിമന്റും കമ്പിയും പെയ്ന്റുകളും മറ്റുമുണ്ടാക്കുന്ന ആരോഗ്യപ്രശ്നങ്ങൾ ഒരുവശത്ത്...പരമാവധി കടമെടുത്തും സമ്പാദ്യമത്രയും ഈ ഡെഡ് ഇൻവെസ്റ്റ്മെന്റിൽ മുടക്കി മുടിയൽ മറ്റൊരു വശത്ത്...നാൾക്കുനാൾ ദൌർലഭ്യത കാരണമുണ്ടാകുന്ന വിലക്കയറ്റം ഇനി മറ്റൊരു വശത്ത്..

കല്ലും കരിങ്കല്ലും സിമന്റും പൂഴിയുമൊക്കെ ചേർന്നുണ്ടാക്കുന്ന ആഗോളതാപനവും,പെയിന്റുകൾ നടത്തുന്ന ഓസോൺ ശോഷണവും,കെട്ടിടം പൊളിക്കുമ്പോൾ തിരികെ മണ്ണിലേയ്ക്ക് ചേരുന്നതായി ഒന്നുമില്ലെന്ന മാലിന്യപ്രശ്നവും,കണക്കില്ലാതെ കുഴിച്ചെടുത്തതിനാൽ നശിക്കുന്ന കുന്നുകളും താഴ്ന്നു താഴ്ന്നു പോകുന്ന ഭൂഗർഭജലനിരപ്പും അനിയന്ത്രിതമായ മണലൂറ്റൽ കാരണം ചാവുന്ന പുഴകളൂമൊക്കെ നമ്മുടെ ജീവന്റെ നിലനിൽ‌പ്പുതന്നെ അപകടത്തിലാക്കിയിരിക്കയാണെന്ന ഭീതിദമായ സത്യം കണ്മുന്നിൽ വാപൊളിച്ചു നിൽക്കുമ്പോൾ മലയാളിക്ക് തന്റെ ഗൃഹസങ്കൽ‌പ്പങ്ങൾ പൊളിച്ചെഴുതാൻ സമയം വൈകിയിരിക്കുന്നു....

പരിസ്ഥിതിയെ അധികം നോവിക്കാതെയും ,വിഭവങ്ങൾ പരമാവധി പരിമിതപ്പെടുത്തിയ എന്നാൽ അത്യാവശ്യ സൌകര്യങ്ങളുള്ള, ആരോഗ്യത്തിനും കാലാവസ്ഥയ്ക്കും ചേരുന്ന ഒന്നായിരിക്കണം ഞങ്ങളുടെ വീട് എന്ന നിർബന്ധമുള്ളതിനാലാണ് മൺവീട് എന്ന ആശയത്തിൽ ഞങ്ങൾ എത്തിച്ചേർന്നത്..

എങ്ങനെ മൺവീട് കെട്ടും ?..നാട്ടിലിന്ന് പ്രചാരത്തിലില്ലാത്ത ഈ നിർമ്മാണരീതിയിൽ ആരു ഞങ്ങളെ സഹായിക്കും?...അന്വേഷണങ്ങൾ പല വഴി നടത്തി നോക്കി...പ്രശസ്ത ആർക്കിടെക്റ്റ് ശങ്കറിനേയാണ് ആദ്യം സമീപിച്ചത്...ച.അടിയ്ക്ക് എണ്ണൂറുരൂപ ചെലവു വരുന്ന ആ രീതി ഞങ്ങൾക്കിഷ്ടമായില്ല...വീട് ചെലവു കുറഞ്ഞതായിരിക്കണം...പിന്നെ ഞങ്ങളുടെ സുഹൃത്തായ ആർക്കിടെക്റ്റ് കണ്ണൂർ അഞ്ചാംപീടികയിലുള്ള ശ്രീ.വിനോദുമായി ഞങ്ങളിക്കാര്യം ചർച്ചചെയ്തു...അദ്ദേഹത്തിൽനിന്നും നല്ല പ്രതികരണം കിട്ടിയതോടെ ഞങ്ങൾ ഉറപ്പിച്ചു;ഞങ്ങളുടെ സ്വപ്നഗൃഹം മണ്ണുകൊണ്ടു തന്നെ..വിനോദ് ആദ്യം തിരുവനന്തപുരത്തുപോയി മൺ വീടിന്റെ നിർമാണരീതി പഠിച്ച് ,അവിടെനിന്നും നിർമ്മാണത്തൊഴിലാളികളേയും കൂട്ടി വന്നു...

ഒരു വീടെടുക്കുമ്പോൾ പരമാവധി വിഭവങ്ങളും ആ ചുറ്റുവട്ടത്തുനിന്നും ശേഖരിക്കുക എന്നതാണ് പ്രകൃതിയുടെ വഴി....ഇന്നത്തെ സാഹചര്യത്തിൽ അതിന് എല്ലാവർക്കും പ്രശ്നമായിരിക്കും...വർഷാവർഷം പുതുക്കിപ്പണിയാനുള്ള പണ്ടത്തെയാ കൂട്ടായ്മയൊക്കെ നമ്മുടെ നാട്ടിനു നഷ്ടമായിക്കഴിഞ്ഞല്ലോ...എന്നാൽ മൺ വീടുണ്ടാക്കുമ്പോൾ മണ്ണെങ്കിലും പുറമേ നിന്ന് വാങ്ങാതിരിക്കണം..അൽ‌പ്പം പശിമയുള്ള ,ചെറുകല്ലുകളടങ്ങിയ ചുവന്ന മണ്ണാണ് ഇതിനാവശ്യം..ഞങ്ങളുടെ പറമ്പിലെ മണ്ണ് ഇതിനു യോജിച്ചതാണെന്ന് പണിക്കാർ പറഞ്ഞപ്പോഴേ ഞങ്ങൾക്ക് ശ്വാസം നേരെ വീണുള്ളൂ...മണ്ണു പുറമേനിന്നിറക്കേണ്ട സാ‍ഹചര്യം വന്നിരുന്നെങ്കിൽ ഞങ്ങൾക്ക് ഇന്റർ ലോക്കിംഗ് കട്ടകൾകൊണ്ടുള്ള വീട് പണിയേണ്ടി വന്നേനെ...

കേരളീയ കാലാവസ്ഥയ്ക്ക് ഏറ്റവുംയോജിച്ച നിർമ്മാണവസ്തു മണ്ണാണ്..വേനൽക്കാലത്ത് കുളിർമ്മയും മഴക്കാലത്ത ഇളം ചൂടും പകരുന്നതാണ് മൺഭിത്തികൾ.957 ച.അടി തറ വിസ്തൃതിയുള്ള ഞങ്ങളുടെ വീടിന്റെ പ്ലാനാണിത്..

ഒരു പ്രധാന കിടപ്പുമുറി,അതിഥികൾക്കായോ മറ്റോ ക്രമീകരിക്കാവുന്ന മറ്റൊരു കിടപ്പുമുറി,ഹാൾ,അടുക്കള, റ്റോയ്ലറ്റ്,വർക്ക് ഏരിയ എന്നിവ അടങ്ങിയതാണ് ഈ വീട്..റ്റോയ്ലറ്റിനു മുമ്പിൽ ചെറിയ ഒരു കോർട്ട് യാർഡും ഉണ്ട്..അടുക്കള ഓപ്പൺ ആണ്.ഇതുംചേർന്നാൽ ഹാൾ വലുപ്പം കൂട്ടാം ..പ്രത്യേക ഊൺ മുറിയില്ല...ജോലികൾ അധികവും വർക്ക് ഏരിയയിൽ ചെയ്യുന്നതിനാൽ അടുക്കള മറ്റാവശ്യങ്ങൾക്കായും ഉപയോഗിക്കാം...

പ്രധാന കിടപ്പുമുറിയുടെ ചുമർ ഷെൽഫാക്കി മാറ്റി സ്ഥലവും ധനവും ലാഭിക്കാം.ഒപ്പം കട്ടിൽ നിലത്ത് ഉറപ്പിച്ച കാലുകളിൽ പലക ഫിറ്റ് ചെയ്ത് നിർമ്മിക്കും..കട്ടിലിന്റെ അടിവശവും ഷെൽഫാക്കി മാറ്റും...അഡ്ജസ്റ്റബിൾ ബെഡ്റൂമിന്റെ ചുമർ വശത്തേക്ക് നീക്കിയാൽ ഹാൾ പിന്നേയും വലുതാകും.ഈ ചുമർ ബുക്ക് ഷെൽഫാക്കാം...

സിറ്റ്ഔട്ട് അൽ‌പ്പം വലുതാണ്.ഇതിന്റെ രണ്ടു വശങ്ങൾ,വാതിൽ എന്നിവ മുളകൊണ്ടാണ്.സിറ്റൌട്ടിന്റെ രണ്ടു വശങ്ങളിലും ഇരിക്കാനും കിടക്കാനും ഉപയോഗിക്കാവുന്ന വീതിയുള്ള ഇരിപ്പിടങ്ങളാണുണ്ടാക്കുക...ആരെങ്കിലും അധികം അതിഥികൾ വന്നാൽ ഇതും കിടപ്പു മുറിയായി ഉപയോഗിക്കാം...വർക്ക് ഏരിയയുടെ വശവും മുളകൊണ്ടാണ്..

കൂടുതൽ കിടപ്പുമുറികൾ ആവശ്യമുള്ളവർക്ക് വീടിന് രണ്ടാം നില പണിയാം..മണ്ണല്ലേ എന്ന പേടി വേണ്ട..കല്ലിനേക്കാൾ ഉറപ്പാണ് ഉരുട്ടു കട്ടയ്ക്ക്..മണ്ണ് കട്ടമുറിച്ചുണ്ടാക്കുന്ന വീടിന് ഇത്ര ബലം കിട്ടില്ല.അതിൽ കട്ടകൾക്കിടയിലെ സ്ഥലം ഉറപ്പു കുറയ്ക്കും..എന്നാൽ ഉരുട്ടുകട്ടകൾ ഒന്നിനുമേലെ ഒന്നായി അമർത്തി വച്ച് ഒറ്റ ബ്ലോക്കായി നിർമ്മിക്കുന്ന ചുമരിന് ബലമേറും..

മൺ വീടിന്റെ നിർമ്മാണഘട്ടങ്ങളെപറ്റി കുറച്ചു പറയാം.. ഞങ്ങൾ തറ കല്ലുകൊണ്ടാണ് കെട്ടിയത്...വെള്ളം കയറാത്തതും ചളിയല്ലാത്തതുമായ സ്ഥലമാണെങ്കിൽ മണ്ണു കൊണ്ടുതന്നെ തറ കെട്ടിയാൽ വിഭവങ്ങൾ കുറയ്ക്കാം.

ഉരുട്ടുകട്ടയുണ്ടാക്കാൻ അൽ‌പ്പം പശിമയുള്ള ചെറുകല്ലുകളുമുള്ള ചുവന്ന മണ്ണിനെ രണ്ടുശതമാനത്തോളം കുമ്മായം ചേർത്ത് വെള്ളത്തിൽ കുഴച്ച് നാലഞ്ചു ദിവസം തണലത്ത് പുളിപ്പിക്കാൻ വയ്ക്കണം...ഇതിൽ പാകത്തിന് വെള്ളം ചേർത്ത് ചവിട്ടിക്കുഴച്ച് വലിയ ഉരുളകളാക്കും...ഈ ഉരുളകളാണ് കൈകൾ കൊണ്ട് അമർത്തിവച്ച് 9 ഇഞ്ച് വീതിയുള്ള ചുമരാക്കി മാറ്റുന്നത്..ഇടയ്ക്ക് ബലം കൂട്ടാൻ നീളത്തിൽ കയർ വയ്ക്കും.മുക്കാൽ മീറ്ററോളം ഉയരമായാൽ മണ്ണ് ഉണങ്ങിയ ശേഷമേ അടുത്ത ഘട്ടം വയ്ക്കാനാകൂ..

ഈ ചുവരിന് മൂന്ന് കോട്ടിംഗ് മൺതേപ്പുണ്ട്...തേപ്പിനുള്ള മണ്ണിൽ മൂന്ന് ശതമാനത്തോളം പൂഴിയും ചേർക്കണം.അവസാന ഫിനിഷിംഗ് തേപ്പിൽ പശിമയുള്ള ഇലച്ചാറുകൾ ചേറ്ത്ത് കൂടുതൽ നന്നാക്കാം..

മൺ വീടിന് ഓടു മേയുന്നതാണ് ഔചിത്യം..എങ്കിലും മരം മരപ്പണി എന്നിവ ചെലവേറിയതാണല്ലോ..വീട്ടിൽനിന്നുതന്നെ മരം കിട്ടത്തക്കവിധം പണ്ടുള്ളവർ ധാരാളം മരം നട്ടിരുന്നതിനാൽ അവർക്ക് മരം വാങ്ങേണ്ടി വന്നിരുന്നില്ല..അൽ‌പ്പം ചെലവായാലും ഓട് മേയണമെന്നായിരുന്നു ഞങ്ങളുടെ ആഗ്രഹം.. പറമ്പിൽ തീരെ വെയിലില്ലാത്തതിനാൽ അൽ‌പ്പം പച്ചക്കറികൾ ടെറസിൽ കൃഷി ചെയ്യേണ്ട അവസ്ഥയായതിനാൽ മേൽക്കൂര കുറേ ഭാഗം ഓട് വച്ചുള്ള കോൺക്രീറ്റ് ആക്കി..ഇതിനായി പഴയ ഓടുകൾ മൂന്നിലൊന്ന് വിലയ്ക്ക് കിട്ടി.ഓടു വച്ചതിനാൽ ചൂടും ഉണ്ടാവില്ല.ബാക്കിഭാഗം ഓടാണ്.

മരം അധികവും പറമ്പിൽ നിന്നും കിട്ടി.തല പോയ കുറച്ചു പീറ്റത്തെങ്ങുകൾ കവുക്കോൽ തന്നു...ഒരു പ്ലാവ് പലകകൾ തന്നു... മോന്തായം ,പട്ടിക എന്നിവ വാങ്ങേണ്ടിവന്നു...ജനൽ പാളികൾ മരമാണാ‍ക്കുന്നത്..ജനലഴികളും മരം തന്നെ..ലോഹം കുറക്കുന്നതാണ് മിന്നലിനു സേഫ്റ്റി .രണ്ടു വാതിലുകൾക്കേ കട്ടില വച്ചുള്ളൂ...അത്രയേറേ സേഫ്റ്റിയൊന്നും വീടീനാവശ്യമില്ല... ഡബിൾ സ്ട്രോംഗ് ആക്കിയാലും കക്കേണ്ട കള്ളൻ കക്കാൻ കേറും ..

വീടിന്റെ ഉൾഭാഗം കുമ്മായം പൂശും ..വെളിച്ചം കിട്ടാനാണിത്..മൺ വീടിന്റെ പുറംഭാഗം പ്ലാസ്റ്റർ ചെയ്യുന്നതാണ് ചിതലിനെ ക്ഷണിച്ചുവരുത്തുന്നത്...പെയിന്റിംഗ് പരമാവധി ഒഴിവാക്കും.തറ ചാണകമെഴുകണമെന്നയാഗ്രഹം പ്രാവർത്തികമാക്കാനുള്ള ശ്രമത്തിലാണ്..ചാണകത്തിന്റെ കൂടെ താളി, ഉലുവ എന്നിവ ചേർത്താൽ കൂടുതൽക്കാലം നിൽക്കുമത്രെ..ടോയ്ലറ്റ്,ബാത്ത് റൂം എന്നിവയുടെ തറ റ്റൈൽസ് ആക്കേണ്ടി വരും...

ചുവരും വാർപ്പും കഴിഞ്ഞു.ഇപ്പോൾ ആശാരിപ്പണി നടക്കുന്നു...ഇനി വയറിംഗും ഫിനിഷിംഗ് തേപ്പും നിലംപണിയും മറ്റും നടക്കാനുണ്ട്..ഇപ്പോൾ ച.അടിയ്ക്ക് 500 രൂപയാകുന്നുണ്ട്...മൊത്തം 5 ലക്ഷം രൂപയാകും എന്നാണ് ആർക്കിടെക്റ്റ് പറഞ്ഞത്..ഞങ്ങളുടെ മോഡിഫിക്കേഷനുകൾകൊണ്ട് അത് 4 ലക്ഷം ആക്കാനാണ് ശ്രമം...

ബദലുകൾ........

2011-02-25T14:11:00.002+05:30

മോഹനം....

2010-12-24T21:25:00.002+05:30

കുളിരാർന്നൊരീ ധനുമാസപ്പുലരി...
മഞ്ഞിൽക്കുളിച്ചീറനണിഞ്ഞ്
അതിസുന്ദരിയാമൊരു തരുണിയെപ്പോൽ
ചിരിതൂകിയൊളിതൂകി
പ്രതിപദനിലാവിൽത്തിളങ്ങിനിൽക്കുമ്പോൾ
ആരുടെ ഹൃദയമാണ് കവരാതിരിക്കുക...

ധന്യമാമീ പുലരിയിൽ
പഥികയുടെ പതിവുയാത്ര
കീറമാറാപ്പുംപേറിയുള്ള ജീവിതയാത്ര...
തിരക്കിൽ ചതഞ്ഞരയുന്ന;
സുന്ദരമാമൊരു സ്വപ്നംപോലെ
അലസമായൊഴുകുമൊരരുവിയേപ്പോലെ
മോഹനമാമൊരരു കീർത്തനംപോലെ
പൂവിതൾപോൽ
വിടർന്നുകൊഴിയേണ്ട ദിനങ്ങളെ
വീണ്ടെടുക്കാൻ കൊതിക്കുമൊരു പഥിക...
അവളുടെ സ്വപ്നങ്ങൾക്ക്
ആയിരം പവനുരുക്കും തിളക്കമേകുമീ
ആർദ്രമാം പുലരി...

പ്രഭാതാർക്കന്റെ
പ്രതാപകാലമണയുമ്മുമ്പെ
ചിരിതൂകിനിൽക്കുമീ ശശിബിംബവും
ഭൂപാളംപാടും കിളികളും
നിശയവസാനിച്ചിട്ടും ചിലയ്ക്കും ചീവീടുകളും
പ്രഭാതമായിട്ടും
പ്രണയിച്ചുതീരാതെ
ഗംഭീരസ്വനത്തിൽ പ്രിയയെ വിളിക്കും മൂങ്ങയും
നേർത്തുവറ്റാറായെങ്കിലും
കളകളം പാടിയൊഴുകുന്ന കൈത്തോടും
മഞ്ഞുവീണു കുതിർന്നൊരീ
നാട്ടുവഴിയും.....

ജീവിതത്തിന്റെ അന്നത്തിനു
വേവു തെറ്റാതിരിക്കാൻ
ധൃതിപൂണ്ട കാൽവയ്പ്പുകളാൽ
ഗമനംചെയ്യുന്നവളെ
നീഹാരാർച്ചനം ചെയ്യുമീ
ധനുമാസപ്പുലരി...
അമ്മ കൈവിട്ട പൈതലിൻ
അനാഥത്വവും പേറിയിഴഞ്ഞ ജീവന്
സാന്ത്വനത്തിൻ സ്നേഹപ്രവാഹമായ്
തുണയായെത്തിയ പ്രിയനേപ്പോൽ
മൂർധാവിലിറ്റുവീണ
തണുവാർന്നൊരു ഹിമചുംബനത്താൽ
സുഖമേകുമീ പുലരി....
മോഹനം...
അതിമോഹനം.....

സ്നേഹത്തിന്റെ നൊമ്പരങ്ങൾ...

2010-10-12T22:36:00.000+05:30

അന്നൊരു ശനിയാഴ്ചയായിരുന്നു.രാവിലെ ഉറക്കമുണർന്നയുടൻ
പതിവുപോലെ സീതടീച്ചറുടെ കാലുകൾ അറിയാതെ വടക്കെപ്പുറത്തേക്ക് നീങ്ങി..’മാളൂ...’ നീട്ടിവിളിക്കാനാഞ്ഞെങ്കിലും വാക്കുകൾ ശബ്ദങ്ങളായി പുറത്തുവരുംമുമ്പെ തൊണ്ടയിലൊരു ഗദ്ഗദം വന്ന് അതിനെ മുക്കിക്കൊന്നു....മാളുവിപ്പോൾ ഇവിടെയില്ലല്ലോ..മൂന്നാലു ദിവസം മുമ്പല്ലെ അവളെ ഇവ്ടന്ന് കൊണ്ടോയത്...

പാവം മാളു... വല്ലാത്ത സങ്കടത്തോടെയാണവൾ പോയത്...വണ്ടിയിൽ കയറാൻ കൂട്ടാക്കാതിരുന്ന അവളെ ഉന്തി വലിച്ചു കയറ്റിയപ്പോൾ ‘അമ്മേ‘ യെന്നവൾ സങ്കടത്തോടെ നീട്ടി വിളിച്ചു കരഞ്ഞപ്പോൾ ടീച്ചറുടെ ഉള്ളാ‍കെയുലഞ്ഞുപോയിരുന്നു...സ്വന്തം മകൾ ഇനിയൊരിക്കലും തിരിച്ചുവരാതെ പോകുമ്പോൾ ഒരമ്മയ്ക്കുണ്ടാകുന്നപോലൊരു വേദന...

രണ്ടാമത്തെ തവണയാണീ കഠിനവേദന ടീച്ചറെ തേടിയെത്തിയിരിക്കുന്നത്...ആറു മാസങ്ങൾക്കു മുമ്പ് ശങ്കരൻ പോയപ്പോൾ ഇതിലേറെ വേദനിച്ചിരുന്നു..അന്നും അവനെ കൊടുക്കണമല്ലോ എന്ന ചിന്തയിൽ കുറേ നാൾ കരഞ്ഞു നടന്നു..പിന്നെ,മനസ്സില്ലാ മനസ്സോടെ കൊണ്ടുപോകാൻ വന്നവരുടെ കയ്യിലേയ്ക്ക് അവനെ പിടിച്ചു കൊടുക്കുമ്പോൾ കണ്ണുകൾ എത്രയടക്കിയിട്ടും കവിഞ്ഞൊഴുകി...അന്ന്
മനസ്സിൽ കരുതിയതായിരുന്നു, ‘വേർപാടുകൾ പ്രകൃതിയുടെ നിയോഗങ്ങളാണ്...ഒന്നിനോടും അതിർ കവിഞ്ഞ ബന്ധനങ്ങൾ ഉണ്ടാക്കിയെടുക്കരുത്...ഒന്നും ആരുടെയും സ്വന്തമല്ല...’

പക്ഷെ,ചിന്തിക്കുമ്പോലെ അത്ര എളുപ്പമല്ലല്ലോ ജീവിതത്തിലത് നടപ്പിലാക്കാൻ...ഇന്ന് മാളുവിനെയും കണ്ണീരോടെ തന്നെ യാത്രയയയ്ക്കേണ്ടിവന്നിരിക്കുന്നു......

ഓർമ്മകൾ പിറകിലേയ്ക്ക്......
ഒന്നരവർഷം മുമ്പത്തെ ഒരു സായാഹ്നം...അന്ന് ടീച്ചർ വല്ലാതെ സന്തോഷിച്ചിരുന്നു...മുരളിമാഷ് അന്നാണ് ഒരു നാടൻ കാളക്കുട്ടനേയും പൈക്കിടാവിനേയും വീട്ടിലേയ്ക്ക് കൊണ്ടുവന്നത്...കറുത്തു മിനുങ്ങുന്ന ശങ്കരനും തവിട്ടുനിറമുള്ള മാളുവും വീട്ടിലെത്തിയപ്പോൾ അവരുടെ ഒരു ചിരകാലാഭിലാഷം പൂവണിയുകയായിരുന്നു...

നാടൻ പശുക്കളെ സംരക്ഷിക്കാൻ വേണ്ടി മാത്രമായിരുന്നു അവരെ കൊണ്ടുവന്നത്....നാട്ടിലെല്ലാവർക്കും പരിഹാസമായിരുന്നു..’അല്ല മാഷേ,നിങ്ങക്ക് രണ്ടാക്കും ജോലിയില്ലേ...പിന്നന്തിനാപ്പാ ഇങ്ങനെ പുല്ലരിഞ്ഞും മറ്റും കഷ്ടപ്പെടണേ..’പലരും ചോദിച്ചിരുന്നു..അവരോടൊന്നും കാര്യം വിസ്തരിക്കാൻ നിന്നാ ഒരു പ്രയോജനവുമില്ലെന്നറിഞ്ഞ് വെറുതെ ചിരിച്ചൊഴിഞ്ഞു...

മിനുമിനുത്ത മൂരിക്കുട്ടനെ കാണുമ്പോൾ കാളക്കച്ചവടക്കാർ കൊതിക്കണ്ണും വച്ച് നോക്കുമായിരുന്നു...നല്ല ഇറച്ചി..അത്രയല്ലേ അവർ കാളയെപ്പറ്റി ചിന്തിക്കൂള്ളല്ലോ..നാട്ടിലൊക്കെ പശുക്കൾക്ക് കുത്തിവെപ്പാണല്ലോ സന്താനോത്പാദനമാർഗ്ഗം ...അല്ലാണ്ട് ഇപ്ലാരാ കാളേന്യൊക്കെ പോറ്റുക ,പിരാന്തന്മാരല്ലാതെ..അങ്ങനെ പറഞ്ഞു രസിച്ചു മാളോര്....

ആരെന്തു പറഞ്ഞാലും ടീച്ചറിനും മാഷിനും ഒരു കൂസലുമില്ലായിരുന്നു...മറ്റുള്ളവർ പറയുന്നതുപോലെ നടന്ന് പാഴാക്കിക്കളയാതെ ജീവിതത്തിന് സ്വന്തമായി കണ്ടെത്തിയ അർഥവുമായാണവർ ജീവിച്ചിരുന്നത്...അതിനാൽ ചാണകം വാരാനോ,ഇടവഴിയിലോ വയലിലോ ഒക്കെ ചെന്ന് പുല്ലരിയാനോ ,ശങ്കരനേയും മാളുവിനേയും മേയ്ക്കാൻ കൊണ്ടുപോകാനോ ഒന്നുമവർക്ക് മടിയുണ്ടായിരുന്നില്ല....

സ്വതന്ത്ര്യബോധവും സ്വാഭിമാനവുമുള്ള നാടൻ കന്നുകാലികൾ.. ഒരു കാളയെ പോറ്റുക...അവന്റെ ചിന്തകളിൽ പങ്കാളികളാവുക...മാറിയ കാലത്ത് ജീവിക്കുമ്പോൾ ഇതൊക്കെ അല്പം വെല്ലുവിളി നിറഞ്ഞ കാര്യങ്ങളായിരുന്നെങ്കിലും, അവർ സന്തോഷത്തോടെ അതേറ്റെടുത്തതായിരുന്നു...

കാണക്കാണെ ശങ്കരൻ വളർന്ന് ഒത്ത ഒരു കാളക്കുട്ടനായി മാറി ..അവന്റെ തലയെടുപ്പും ഗാംഭീര്യവും മേനിയഴകും ബുദ്ധിയുമൊക്കെ ആരെയുമാകർഷിക്കുന്നതായിരുന്നു...നോക്കിയങ്ങനെ നിന്നുപോകും.മുതുകത്ത് ഉയർന്നു നിൽക്കുന്ന പൂഞ്ഞയിൽ തൊട്ടുതലോടി ‘ശങ്കരാ‘എന്നു നീട്ടിവിളിക്കുമ്പോൾ അവൻ കുസൃതി നിറഞ്ഞ കണ്ണുകളോടെ അനങ്ങാതെ നിൽക്കും...വയറു നിറയെ പച്ചപ്പുല്ല് തിന്നശേഷം , വൈകീട്ട് അഴിച്ചുകൊണ്ടുവരുമ്പോൾ നാലുകാലുകളും പൊക്കിയുള്ള ഒരു തുള്ളിച്ചാടലുണ്ടവന്...‘ശങ്കരാ..അടങ്ങി വാടാ..’എന്ന് സ്നേഹത്തോടെ ശാസിക്കുമ്പോൾ അവൻ മെല്ലെ നടന്നുവരും.

മാളുവും അവനും കുട്ടിക്കാലം മുതലേ ഒന്നിച്ചു വളർന്നവരായിരുന്നു..ശങ്കരനെ കണ്ടില്ലെങ്കിൽ ഉടൻ അവൾ വിളിക്കാൻ തുടങ്ങുമായിരുന്നു.‘എടീ,ഇവരെ നമുക്ക് ഒരിക്കലും വേർപിരിക്കണ്ട..വയസ്സായാലും പോറ്റാം .’മാഷ് പറയുമായിരുന്നു.എന്നിട്ടെന്തായി...നമ്മൾ നിനക്കുന്നതൊന്ന്...ദൈവം വിധിക്കുന്നത് മറ്റൊന്ന്...

വലിയ പ്രശ്നങ്ങളൊന്നുമില്ലാതെ സന്തോഷപൂർവ്വം ജീവിച്ചു വരികയായിരുന്ന അവരുടെ ജീവിതത്തിലേയ്ക്ക് സങ്കടത്തിന്റെ നിഴൽ വീഴാൻ തുടങ്ങിയത് ആറുമാസങ്ങൾക്കു മുമ്പായിരുന്നു...ഒരു വീഴ്ചയിൽ കാലിനു ഗുരുതരമായി പരിക്കു പറ്റി മാഷ് മാസങ്ങളോളം കിടപ്പിലായി.ശങ്കരനെ നോക്കാൻ ആളില്ലാതായപ്പോൾ അവനെ കൊടുക്കേണ്ടിവന്നു..

ഇന്നുമോർമ്മയിലുണ്ടാ ദിനം...വണ്ടിയിലവനെ കേറ്റുമ്പോൾ മാളു സങ്കടത്തോടെ ഉറക്കെ കരഞ്ഞിരുന്നു..അവളെക്കാൾ കരഞ്ഞിരുന്നു മാഷും ടീച്ചറും...പക്ഷെ,...ചില കാര്യങ്ങൾ മനുഷ്യന്റെ പിടിയ്ക്കുമപ്പുറത്താണല്ലോ...

ശങ്കരനെ കൊടുത്തെങ്കിലും മാളുവിനെ പോറ്റാമെന്നു തന്നെ അവർ വിചാരിച്ചിരുന്നു...വലിയ മെനക്കേടൊന്നുമില്ല അവളെ നോക്കാൻ ..കുറച്ച് പച്ചപ്പുല്ലരിയണം .അടുക്കളയിലെ കാടിയും കഞ്ഞിവെള്ളവും,അൽ‌പ്പം വൈക്കോലും..ഇടയ്ക്ക് അടുത്തു ചെന്ന് ഒന്നു തട്ടിത്തടവി ഒന്നു പുന്നാരിക്കുക കൂടി ചെയ്താൽ അവൾക്ക് വലിയ സന്തോഷമായി...

എന്നിട്ടുമെന്നിട്ടും....അവളെയും കൊടുക്കേണ്ടിവന്നു...മാഷുടെ കാലൊക്കെ ഒരു വിധം ശരിയായി എന്നു വിചാരിച്ചപ്പൊഴേയ്ക്ക് മറ്റെ കാലിൽ ഒരു വേദന..വൈദ്യർ കഷായങ്ങൾക്കൊപ്പം വിശ്രമവും വിധിച്ചു.എങ്കിലും മാളുവിനെ പിരിയുന്നത് ഓർക്കാൻ കൂടി പറ്റാത്ത കാര്യമായിരുന്നു .കൂട്ടു കുടുംബമായതിനാൽ മറ്റുള്ളവർ അല്പം സഹകരിക്കുമെന്നു കരുതി...പക്ഷെ വല്ലാത്ത മുറുമുറുപ്പ്...‘നാശത്തിനെ ഒന്നു വിറ്റൂടെ ...‘

എങ്കിലും മാളുവിനെ കൊടുത്തില്ല...സ്വാർഥതകൾമാത്രമുള്ള മനുഷ്യർക്കിടയിൽ അവൾ അവർക്ക് വലിയ ആശ്വാസവുമേകിയിരുന്നു...ടീച്ചറുടെ നിഴൽ കണ്ടാൽ മതി അവൾ ‘അമ്മേ‘ യെന്ന് നീട്ടി വിളിക്കാൻ ..അവൾക്കറിയാമായിരുന്നു ഒന്നു വിളിച്ചാൽ ടീച്ചർ അടുത്തുവന്ന് തന്നെ കൊഞ്ചിക്കുമെന്ന്...അവൾക്കിഷ്ടമുള്ള പച്ചിലകൾ പറിച്ചുകൊടുക്കുമെന്ന്..

അങ്ങനെയിരിക്കെ ,അവരുടെ ജീവിതത്തിലേയ്ക്ക് വീണ്ടും ദുരന്തങ്ങൾ പടികയറിവന്നു...ഒരു ദിവസം ജോലിസ്ഥലത്തേയ്ക്കു പോകാൻ സ്കൂട്ടറെടുക്കുമ്പോൾ ബാലൻസ് തെറ്റി സ്കൂട്ടർ മാഷുടെ കാലിന്മേൽ വീണു..വീണ്ടും മാഷ് കിടപ്പിലായി..അതോടെ മാളുവിനെ കൊടുക്കാതെ മറ്റു വഴിയില്ലെന്നായി..

അവരുടെ ഒരു സുഹൃത്താണവളെ കൊണ്ടുപോയതെന്നതിനാൽ നന്നായവളെ നോക്കുമെന്ന് ആശ്വസിക്കാമെങ്കിലും ....എങ്കിലും...മാളു കൂടി പോയതോടെ വീടാകെ ശൂന്യമായപോലെ..വടക്കെപ്പുറത്തിറങ്ങുമ്പോൾ തൊഴുത്തിൽ മാളുവുണ്ടെന്ന ഒരു തോന്നൽ...അവളെയൊന്ന് തൊട്ടുതടവാനായി ചെല്ലുമ്പോൾ തൊഴുത്തിലെ ശൂന്യത നിശ്ശബ്ദമായി വിളിച്ചു പറഞ്ഞു...‘മാ‍ളു പോയി...ശങ്കരനും പോയി..ഞാനും തനിച്ചായി..എനിക്കുമിനിയില്ലല്ലോ അവരുടെ ചൂരും ചൂടും...’

ഒരു വീടെന്നാൽ.....

2010-09-01T07:56:00.001+05:30

പ്രകൃതിയിൽ വീട് കെട്ടുന്നവരും അല്ലാത്തവരുമായ ജീവികൾ ഉണ്ട്..മനുഷ്യൻ ഒന്നാമത്തെ വിഭാഗത്തിൽ പെടുന്നു.. ആദിമകാലത്തവൻ മരങ്ങളുടെ മുകളിലും ഗുഹകളിലും ഒക്കെ കഴിഞ്ഞുകൂടി...അന്നവനും വീടെന്നാൽ മറ്റേതൊരു ജീവിയേയും പോലെ കാലാവസ്ഥയിൽനിന്നും വന്യമൃഗങ്ങളുടെ ആക്രമണത്തിൽനിന്നും ഒരു രക്ഷാസ്ഥാനം മാത്രമായിരുന്നു...

എന്നാൽ കാലം കഴിയുന്തോറും അവന്റെ ചിന്താമണ്ഡലം കൂടുതൽ വികാസം പ്രാപിക്കുകയും അവന്റെ ആവശ്യങ്ങൾ കൂടിക്കൊണ്ടിരിക്കുകയും ചെയ്തുകൊണ്ടിരുന്നു...അതോടെ വീടിന്റെ രൂപഭാവങ്ങളും വലുപ്പവും ആവശ്യങ്ങളുമൊക്കെ മാറാനും തുടങ്ങി...

പുല്ലും ഓലകളും ഉപയോഗിച്ചുണ്ടാക്കിയ ആദ്യകാലവീടുകൾ പ്രകൃതിക്ക് ഒരു തരത്തിലും ദോഷം ചെയ്യാത്തതായിരുന്നു..ഓരോ വർഷവും പുതുക്കി പണിയണം എന്ന ഒരു ന്യൂനത ഇതിനുണ്ടായിരുന്നെങ്കിലും അന്ന് ഒരു കൂട്ടായ്മയായി ഗ്രാമീണർ ജീവിച്ചിരുന്നതിനാൽ പുരകെട്ടൽ വളരെ എളുപ്പമായിരുന്നു..ഒരാളുടെ വീട് പുതുക്കി പണിയണമെങ്കിൽ അയൽക്കാരും കൂട്ടുകാരും ഒക്കെ ഒത്തുചേർന്ന് ഒന്നോ രണ്ടോ ദിവസം കൊണ്ട് കാര്യം തീർക്കുമായിരുന്നു.വീട്ടുകാരി ഇളനീരും ശർക്കരക്കാപ്പിയും പിന്നെ നാടൻ അവൽ കുഴച്ചതുമൊക്കെ വേണ്ടത്ര നൽകി പണിയെടുക്കന്നവരുടെ ക്ഷീണമത്രയും മാറ്റാൻ തയ്യാറായി നിൽ‌പ്പുണ്ടാകും...വേണമെങ്കിൽ മായമൊന്നും കലരാത്തതും ആരോഗ്യത്തിനത്ര ഹാനികരമല്ലാത്തതുമായ ശുദ്ധമായ നാടൻ കള്ളും ആണുങ്ങൾ ഇങ്ങനെയുള്ള അവസരങ്ങളിൽ ഉപയോഗിച്ചിരുന്നു...ഈ വീടിനുപയോഗിച്ച വസ്തുക്കൾ പ്രകൃതിയിലേയ്ക്ക് തിരിച്ചുചെല്ലുന്നതിനാൽ മാലിന്യ പ്രശ്നങ്ങളും ഉണ്ടാക്കിയിരുന്നില്ല.

ക്രമേണ മനുഷ്യന്റെ ജീവിതത്തിന് കുറച്ചുകൂടി തിരക്കേറുകയും സ്നേഹബന്ധങ്ങളും കൂട്ടായ്മകളും കുറേക്കൂടി അയവുള്ളതാവുകയും ചെയ്യാൻ തുടങ്ങിയപ്പോൾ ഓരോ വർഷവും വീട് പുതുക്കുക എന്നത് അവനൽ‌പ്പം അലോസരമായിത്തുടങ്ങി.അവൻ മറ്റു വഴികൾ ചിന്തിക്കാൻ തുടങ്ങി. മണ്ണു കൊണ്ട് ചുവരുണ്ടാക്കാം ,അത് വളരെക്കാലം നിലനിൽക്കും എന്നവൻ കണ്ടെത്തി.അങ്ങനെ പച്ചമണ്ണ് ചവിട്ടിക്കുഴച്ച്,ചിതലിന്റെ ശല്യമുണ്ടാവാതിരിക്കാൻ കുളിർമാവ്,കരോട്ട തുടങ്ങിയ മരങ്ങളുടെ പശ ചേർത്ത് ഇന്നത്തെ കല്ലിനേക്കാളും കരിങ്കല്ലിനേക്കാളും ഒക്കെ ഉറപ്പുള്ള ചുമരുണ്ടാക്കി.[ഇത്തരം മൺചുവരിന്മേൽ രണ്ടുനില കോൺക്രീറ്റ് വീടുവരെ ഇപ്പോൾ ചിലർ നിർമ്മിക്കുന്നുണ്ട്] ആദ്യമൊക്കെ കാവിമണ്ണ് കലക്കിത്തേച്ച് ചുവരുകൾക്ക് മോടി കൂട്ടി. പിന്നെ കുമ്മായം പൂശുകയും അൽ‌പ്പം കൂടിക്കഴിഞ്ഞപ്പോൾ കുമ്മായവും പൂഴിമണ്ണും ചേർത്ത്ചുമരുകൾ തേയ്ക്കാനും തുടങ്ങി. എങ്കിലും തേയ്ക്കാത്ത മൺചുമരുകൾ ഏറെക്കാലം ഈടുനിന്നു. വായുസഞ്ചാരം മുട്ടിക്കാത്തതിനാൽ അവയിൽ ചിതൽ കേറുന്നത് അപൂർവ്വമായിരുന്നു..
മൺചുവരുള്ള ഈ വീടുകൾക്ക് ഓല, പുല്ല് എന്നിവ കൊണ്ടായിരുന്നു
ആദ്യമൊക്കെ മേൽക്കൂര പണിതത്.അൽ‌പ്പം കഴിഞ്ഞപ്പോൾ മണ്ണ് ചവിട്ടിക്കുഴച്ച് കട്ടകൾ നിർമ്മിച്ചാൽ ചുവർ പണി കുറച്ചുകൂടി എളുപ്പമാകുമെന്ന് കണ്ട് അങ്ങനെ ചെയ്യാൻ തുടങ്ങി.ഇതിന് ആദ്യമുണ്ടാക്കിയതിന്റെയത്ര ഉറപ്പുണ്ടായിരുന്നില്ല..മണ്ണിൽ പിന്നെയവൻ വീണ്ടും പരീക്ഷണങ്ങൾ തുടരുകയും,ചുട്ട മൺകട്ട[ഇഷ്ടിക]എന്ന ആശയം പ്രാവർത്തികമാക്കുകയും ചെയ്തു.ഇവ കെട്ടാൻ കുമ്മായവും പൂഴിയും ചേർത്ത് ചാന്തുണ്ടാക്കി..പിന്നെ ചെത്തുകല്ലുകൾ ചുമരിൽ സ്ഥാനം പിടിച്ചു..

മേൽക്കൂരയിൽ പരിഷ്കാരങ്ങൾ വരുത്തിയത് പിന്നെയാണ്.ഓടുണ്ടാക്കാനും തെങ്ങും മറ്റുമരങ്ങളും ഉപയോഗിക്കാനും തുടങ്ങിയപ്പോൾ വിവിധ തൊഴിൽമേഖലകളും വളർന്നു വികസിച്ചു...എങ്കിലും അന്നത്തെ വീടുകൾ അത്യാവശ്യം സൌകര്യങ്ങൾ മാത്രം ഉള്ളവയായിരുന്നു..മണ്ണിൽ നിന്ന് വലിയ ആയാസത്തോടെ കല്ല് ചെത്തിയെടുക്കേണ്ടതിനാൽ ആരുമത് ദുരുപയോഗം ചെയ്തില്ല.അത്യാവശ്യം പൂഴിയേ പുഴകളിൽനിന്നും വാരിയിരുന്നുള്ളൂ.അടുത്ത വർഷമാകുമ്പോഴേയ്ക്ക് ആ പൂഴി പുനർനിർമ്മിക്കാൻ പുഴയ്ക്കാകുമായിരുന്നു..

മണ്ണു ചായ്ച്ച മുറ്റമായിരുന്നു അന്നുണ്ടായിരുന്നത്. ഈ മുറ്റങ്ങൾ മഴവെള്ളമത്രയും സംഭരിച്ച് കിണറിനു കൊടുക്കുന്നതിനാൽ അറ്റ വേനലിലും കിണർ വറ്റിയില്ല... പറമ്പുകളുടെ അതിരുകളായി പലയിടങ്ങളിലും ഒന്നുമുണ്ടായിരുന്നില്ല.ഈ തെങ്ങു വരെ എന്റെ,അതിനപ്പുറം നിന്റെ ,അത്രമാത്രം.ഇപ്പോഴും ചില ഉൾനാടൻ ഗ്രാമങ്ങൾ ഈ വ്യവസ്ഥ തുടരുന്നുണ്ട്..അല്ലെങ്കിൽ ജൈവവേലിയോ മൺകൈശാലകളോ നിർമ്മിച്ചുപോന്നു..ഒരുപാടിനം ഔഷധങ്ങളും ഭക്ഷണസസ്യങ്ങളും പിന്നെ കാലിത്തീറ്റയും പച്ചിലവളവും മാത്രമല്ല ഈ മൺകൈശാലകളും സസ്യവേലികളും അന്നത്തെ കേരളീയനു നൽകിയത്..ആരോഗ്യവും ബുദ്ധിശക്തിയും പ്രദാനംചെയ്യാനിവ ഓക്സിജൻ നൽകി.[തലച്ചോർ നന്നായി പ്രവർത്തിക്കാൻ നല്ലയളവിൽ ഓക്സിജൻ തന്നെ വേണം.വെറുതെയല്ല ഇന്നത്തെ കുട്ടികളൊക്കെ മഹാമറവിക്കാരായി മാറിയിരിക്കുന്നത്]മഴവെള്ളം സംഭരിച്ച് കുടിവെള്ളവും കൃഷിവെള്ളവും നൽകി..നാട്ടുമ്പുറങ്ങളിൽ ഒരിക്കലും അത്യുഷ്ണം അനുഭവപ്പെടാതെ സൂക്ഷ്മകാലാവസ്ഥയേയും കാത്തു സൂക്ഷിച്ചു .

അന്നുണ്ടായിരുന്ന മറ്റു രണ്ട് ശാസ്ത്രീയ സംവിധാനങ്ങളായിരുന്നു ഓരോ വീട്ടുപറമ്പിന്റെയും മൂലയ്ക്കൽ ഓരോ സർപ്പക്കാവും കുളവും...മലയാളിയ്ക്ക് ജലസംരക്ഷണം, കൃഷി എന്നിവയിൽ വളരെയേറെ അറിവുണ്ടായിരുന്നു എന്നതിനു തെളിവുകളാണിവ...കാവുകൾ മഴവെള്ളം സംഭരിച്ച് കുളങ്ങളിൽ നിറച്ചുവച്ച്, മലയാളിക്ക് കാർഷികസമൃദ്ധിയും ജലസമൃദ്ധിയും നൽകി...കീടനാശിനികൾ എന്ന പേരിൽ വിഷം തളിക്കാതെ,വളമെന്നപേരിൽ രാസവിഷങ്ങൾ വാരിത്തൂകാതെ അന്ന് നല്ല വിലവും മലയാളിക്ക് ശുദ്ധമായ ആഹാരവും കൂടി ലഭിച്ചു...

അന്ന് ഒന്നോ രണ്ടോ മുറികളുള്ള വീടുകളായിരുന്നു അധികവും..ഉപഭോക്തൃ സാധനങ്ങൾ കുന്നുകൂട്ടി വയ്ക്കേണ്ടതില്ലാത്തതിനാൽ അതവന് പര്യാപ്തവുമായിരുന്നു.വലിയ കോവിലകങ്ങളും നാലുകെട്ടുകളും എട്ടുകെട്ടുകളും തറവാടുകളും ഒക്കെ അങ്ങിങ്ങ് ഉണ്ടായിരുന്നെങ്കിലും,ഇന്നത്തെപ്പോലെ രണ്ടൊ നാലോ പേരല്ല അവയിൽ താമസിച്ചിരുന്നത്..പത്തും നാൽ‌പ്പതും പേരൊക്കെ ഒരുമയോടെ, സാമാന്യം പോരടിക്കലും കുശുമ്പും കുന്നായ്മകളുമൊക്കെ ഉണ്ടായിരുന്നെങ്കിലും ,ഉഗ്രശാസനനായ തറവാട്ടുകാരണവരെ അനുസരിച്ച് അവിടെ കഴിഞ്ഞു...
ഇന്ന്...
ഇന്ന് കോൺക്രീറ്റ് മന്ദിരങ്ങളുടെ കാലമാണ്...ചെറിയവീടെന്ന ആശയം മലയാളി കോൺക്രീറ്റും സിമന്റും ഉപയോഗിക്കാൻ തുടങ്ങിയതോടെയാണ് ഉപേക്ഷിച്ചതെന്നു തോന്നുന്നു..ഒരു വീടെന്നാൽ അവനവന്റെ പോക്കറ്റിന്റെ കനം മറ്റുള്ളവരെ അറിയിക്കാനുള്ള ഒരുപാധിയാക്കി മാറ്റിയിരിക്കയാണ് ,ഒരു പൊങ്ങച്ച പ്രദർശനോപാധിയാക്കി മാറ്റിയിരിക്കുകയാണ് മലയാളി.അയൽക്കാരൻ പത്തുമുറികളുള്ള വീടുണ്ടാക്കിയാൽ അവന് പന്ത്രണ്ട് മുറികളെങ്കിലും കൂടിയേ തീരൂ...കൈയ്യിലിതിന് കാശില്ലെങ്കിലെന്താ ഉണ്ടല്ലോ വായ്പകൾ എന്ന പടുകെണികളൊരുക്കി കാത്തിരിക്കുന്ന ബാങ്കുകളും ധനകാര്യസ്ഥപനങ്ങളും...പലിശ കൊടുത്തു മുടിഞ്ഞാലും വീടുപോര ഇടത്തരക്കാർക്കു പോലും,കൊട്ടാരങ്ങൾ തന്നെ വേണം..അവന്റെ ജീവിതകാലസമ്പാദ്യമൊക്കെയും ഇങ്ങനെ മണ്ണിൽ കൊണ്ടിട്ട് കളയുന്നു..

പണ്ടത്തെ വീടുകളിൽ മനുഷ്യന്റെ ആരോഗ്യത്തിനു ഹാനികരമായ നിർമ്മാണ വസ്തുക്കൾ ഒന്നും ഉപയോഗിച്ചിരുന്നില്ല.ഒക്കെ പരിസ്ഥിതി സൌഹൃദമുള്ളവയും ആയിരുന്നു..അതിനാലിന്നത്തെ കോൺക്രീറ്റ്പെട്ടികൾ ഉണ്ടാക്കുന്ന ആസ്മ- അലർജ്ജിരോഗങ്ങൾ അന്നു വീടുകൾ പകർന്നിരുന്നില്ല..കേരളീയന്റെ ചുട്ടുപഴുത്ത മധ്യാഹ്നങ്ങളിൽ പോലുമവ കുളിർമ്മ നൽകി..ഇന്ന് സിമന്റ്, പൂഴി, കരിങ്കൽച്ചില്ലി,ഇരുമ്പുകമ്പി തുടങ്ങിയവ മുഖ്യ നിർമ്മാണ വസ്തുക്കളായപ്പോൾ വൈദ്യുതപങ്കകളില്ലാതെ ഇത്തരം വീടുകളിൽ ജീവിക്കാൻ വയ്യാതായി.നിലമൊരുക്കാൻ ചാണകമുപയോഗിച്ച നാളുകൾ അവന്റെ കാലിനു വാതരോഗം സമ്മാനിച്ചില്ല...മാത്രമല്ല ചാണകത്തിലും അൽ‌പ്പം മണ്ണിലും പാദരക്ഷകൾ എന്ന പാദശിക്ഷകൾ ഉപയോഗിക്കാതെ നടന്നപ്പോൾ ടെറ്റനസ് പോലുള്ള മാരകരോഗങ്ങളിൽനിന്നും അവനു പ്രതിരോധം കൂടി ലഭിച്ചു..

കേരളീയ വാസ്തുശാസ്ത്രം അത്യുത്തമമായിരുന്നു.കിഴക്കു വശത്തു നിന്നും പ്രഭാതത്തിൻ ശുദ്ധവായു ഉള്ളിൽ കടക്കാൻ പാകത്തിൽ മുഖം കിഴക്കോട്ടാക്കി. എപ്പോഴും അഗ്നി ജ്വലിക്കേണ്ട അടുക്കള വടക്കു പടിഞ്ഞാറെ കോണിലാക്കിയാൽ അഗ്നിബാധയുണ്ടാവില്ലെന്ന് വായുപ്രവാഹത്തെ അടിസ്ഥാനമാക്കിയാണ് കണ്ടെത്തിയത്. നേരെ നടുമുറ്റത്ത് ഉയർന്ന തറ കെട്ടി തുളസി നട്ടു പൂജ ചെയ്തു.ഇതും ശാസ്ത്രീയമായിരുന്നു..വായുവിൽനിന്ന് വിഷങ്ങൾ വലിച്ചെടുത്ത് ഔഷധങ്ങൾ പുറത്തു വിട്ട് നാനാവ്യാധികളിൽ നിന്ന് രക്ഷിക്കുമ്പോൾ ഐശ്വര്യദേവത തന്നെയല്ലെ തുളസി..കൂടാതെ വീട്ടിനകത്ത് മലിനവായു കെട്ടിക്കിടന്ന് രോഗം വരാതിരിക്കാനും ഈ തുളസിത്തറകൾ ഒരു പങ്കു വഹിച്ചു .നേരെ മുൻ വാതിലിലൂടെ അകത്തുകടക്കുന്ന ഔഷധം കലർന്ന വായു പടിഞ്ഞാറ്റമുറിയുടെ ചുമരിൽ നേരെ പിറകിലുള്ള ദ്വാരത്തിലൂടെ പുറത്തുകടന്നാണ് ഇതു സാധിച്ചിരുന്നത്.

മറ്റൊരു കാര്യംകൂടി പറയാതെ വയ്യ മലയാളിയുടെ വീടിനെപറ്റി പറയുമ്പോൾ..അതവന്റെ ചായമടിക്കലിനെപ്പറ്റിയാണ്.തേക്കാത്ത മൺചുമരുകളും പിന്നെ കുമ്മായം പൂശിയ കൽച്ചുമരുകളും പാർശ്വഫലങ്ങൾ ഒന്നുമില്ലാത്തവയായിരുന്നു..അതിലവൻ പൂശിയ സ്വാഭാവിക ചായങ്ങളും അവന്റെ ആരോഗ്യം കാർന്നുതിന്നില്ല .സിമന്റ് തേപ്പ് വന്നപോഴേ ആരോഗ്യത്തെ ബാധിക്കാൻ തുടങ്ങി.പിന്നെ കടും നിറങ്ങളിലുള്ള എണ്ണച്ചായങ്ങൾ വന്നതോടെ അവനറിയാതെ ഒരു പാട് പണം നൽകി ചുമരുകളിൽ മഞ്ഞയും ചുവപ്പും പച്ചയും നീലയുമൊക്കെ നിറത്തിലുള്ള വിഷങ്ങൾ പൂശാൻ തുടങ്ങി.പായലേ വിട പൂപ്പലേ വിട എന്നവൻ അഭിമാനിച്ചപ്പോൾ ഉഗ്രവിഷമുള്ള കറുത്തീയവും കാഡ്മിയവുമൊക്കെയടങ്ങിയ ചായങ്ങൾ സദാ അന്തരീക്ഷത്തിലേയ്ക്ക് വിഷം വമിപ്പിച്ചു കൊണ്ടിരുന്നു ..പുതുപുതു രോഗങ്ങൾ വന്നുകൊണ്ടിരുന്നപ്പോഴും അവനു കാര്യം പിടികിട്ടിയില്ല...പല വികസിത രാഷ്ട്രങ്ങളിലും മറ്റുള്ളവർക്ക് ദോഷകരമായ രീതിയിൽ അന്തരീക്ഷമലിനീകരണം ഉണ്ടാക്കുന്നതിനാലും മറ്റു ജീവികൾക്ക് ശല്യമാകുന്നതിനാലും ഇത്തരം ചായങ്ങൾ തേയ്ക്കുന്നത് നിരോധിച്ചിട്ടുണ്ട്..മലയാളിക്കെന്ത് നിയമങ്ങൾ ..നിയമം ഉണ്ടാക്കിയാലും അതവൻ അനുസരിക്കില്ലല്ല്ല്ലോ.അധികാരികൾക്ക് ഇത്തരം ജനസ്നേഹ പരമായ നിയമങ്ങൾ നടപ്പിലാക്കലല്ലല്ലോ ഇവിടെ ജോലി...

ഇന്ന് മലയാളി വീടിനും മുറ്റം ,മതിൽ എന്നിവയ്ക്കുമായി ഒരു കുടുംബത്തിന് ആവശ്യമുള്ളതിലും അധികാരമുള്ളതിലും എത്രയോ ഇരട്ടി പുനർ നിർമ്മിക്കാനാകാത്ത കല്ല്,കരിങ്കല്ല് ,കമ്പി ,ഇഷ്ടികകൾ തറയോടുകൾ മാർബിൾ,ചില്ല്,പൂഴി.. തുടങ്ങിയവ ധൂർത്തടിക്കുന്നു.കേവലം മൂന്നോ നാലോ പേർക്ക് ജീവിക്കാനാണ് മണിമന്ദിരങ്ങൾ പണിയുന്നത്..ഇതിനെ കൊള്ള എന്നാണു പറയേണ്ടത്.ഈ ഭൂമിയിലെ അനേകതലമുറകൾ[മനുഷ്യനും മറ്റെല്ലാ ജീവികളും..]ഉപയോഗിക്കേണ്ടതെല്ലാം കൊള്ളയടിച്ചു തീർത്തുകൊണ്ടിരിക്കുകയാണ്. മുറ്റം സിമന്റിടുകവഴി തന്റെ തന്നെ കുടിവെള്ളം മുട്ടിക്കുന്നു.സിമന്റുപൂശിയതും പതിനായിരങ്ങളല്ല ലക്ഷങ്ങൾ മുടക്കിയതുമായ മതിലുകൾ എത്രവേണമെങ്കിലും കാണാം..നല്ല ഒന്നാന്തരം ഓടുമേഞ്ഞ വീട് തച്ചു പൊടിച്ചാണ് മിക്ക കോൺക്രീറ്റ് പേടകങ്ങളും നിർമ്മിച്ചിരിക്കുന്നതും...

ഇതൊക്കെ എവിടെച്ചെന്നവസാനിക്കും?...വിഭവങ്ങളെല്ലാം തീരുമ്പോഴോ...അന്ന് ചിലപ്പോൾ ഒരോലപ്പെരയെങ്കിലും കെട്ടാനായെങ്കിൽ എന്നാശിച്ചാലും തെങ്ങോലകൾപോലും കിട്ടിയെന്നുവരില്ല.മണ്ണ് പൂർണ്ണമായും കെട്ടിടാവശിഷ്ടങ്ങൾ കൊണ്ട് മലിനമാക്കിക്കഴിഞ്ഞാൽ,ബാക്കി വരുന്ന സ്ഥലമത്രയും രാജപാതകളെന്നപേരിൽ ടാറിട്ടും നശിപ്പിച്ചു കഴിഞ്ഞാൽ വീടുകെട്ടാൻ ഓലപോയിട്ട് കുടിക്കാൻ വെള്ളം വരെ അന്നു കിട്ടില്ല. ഏറെ വൈകിക്കഴിഞ്ഞെങ്കിലും ഇനിയെങ്കിലും മലയാളി തെറ്റു തിരുത്താൻ തയ്യാറായെങ്കിൽ...

വേണ്ടായിരുന്നു ഈ ഓണം....

2010-08-23T19:56:00.001+05:30

വേണ്ടായിരുന്നു ഈ ഓണാഘോഷം....

പണ്ട്...
ഓണമാകാൻ കാത്തിരിക്കുമായിരുന്നു
ഞാനും കൂട്ടുകാരും...
പറമ്പായ പറമ്പുകളിലൊക്കെ,
കുന്നായ കുന്നിലൊക്കെ
വയലായ വയലിലൊക്കെ,...
കാക്കപ്പൂവും തെച്ചിയും തുമ്പയുമൊക്കെ തേടിനടക്കാൻ,
മറ്റുള്ളവരെക്കാൾ കൂടുതൽ പൂക്കളിറുത്ത്
ഏറ്റവും വലിയ പൂക്കളം തീർക്കാൻ
ബാല്യത്തിനന്ന് വാശിയുമാവേശവുമായിരുന്നു...
ഒറ്റപ്പൂപോലും കാശുകൊടുത്തു വാങ്ങാറില്ലായിരുന്നു...
വയലിൽനിന്ന് പുന്നെല്ലും
വേനലിൽ നട്ടുനനച്ചു കരുതിവച്ച
വെള്ളരിയും കുമ്പളവും....
പായസവിഭവങ്ങളും അത്യാവശ്യം പച്ചക്കറികളും
കൊക്കിലൊതുങ്ങുന്ന വിലയ്ക്ക്
വാങ്ങാനാകുമായിരുന്നു...
പുത്തനൊരോണക്കോടി ...
അതു ഗ്രാമീണബാല്യങ്ങളുടെ
ഏറ്റവും വലിയ സ്വപ്നമായിരുന്നു...
അതു വാങ്ങാനായിരുന്നു
വീട്ടുകാർക്കേറ്റവും വിഷമം.
ഇന്നത്തെപ്പോലെ കൈ നിറയെ കാശ്
അന്ന് വന്നുനിറഞ്ഞിരുന്നില്ലല്ലോ...
എങ്കിലും അന്ന് ഓണം ഓണമായിരുന്നു...
വില കുറഞ്ഞ ചീട്ടിത്തുണി കൊണ്ട്
ഒരുടുപ്പ് തൈച്ചുകിട്ടിയാൽ കുഞ്ഞുമനസ്സിനന്ന്
സ്വർഗ്ഗം കിട്ടിയ സന്തോഷമായിരുന്നു...
മുറ്റത്തെ മാവിൻ കൊമ്പിലൊരൂഞ്ഞാലുമിട്ട്,
പൂവിളിപ്പാട്ടുകൾ പാടിയ ആ ഓണദിനങ്ങൾ
ഇങ്ങിനിയെത്തില്ലല്ലോ...

ഇന്ന്....കൈനിറയെ കാശുമായി
ധൂർത്തിന്റെ പര്യായമായി മാറിയ ഓണാഘോഷം...
ആയിരത്തഞ്ഞൂറ് രൂപയുടെ മസാക്കലി തന്നെ വേണം
പെൺകുട്ടികൾക്ക് ഓണക്കോടിയായി...
ആൺകിട്ടികൾക്കും വേണം
അതിലേറെ വിലയുള്ള
ജീൻസും ഷർട്ടും...
ഉദ്യോഗസ്ഥകളാണെങ്കിൽ വാങ്ങിക്കൂട്ടുന്നത്
അഞ്ചും പത്തും ജോഡി വസ്ത്രങ്ങളാണ്...
എന്നും കോടിയുടുക്കുന്നവർക്ക്
എന്തോണക്കോടി.....
എന്നും സദ്യയുണ്ണുന്നവർക്ക്
എന്തോണസ്സദ്യ....
ചിക്കൻ വാങ്ങി ബിരിയാണിയുണ്ടാക്കിയാണ്
മലയാളിയിന്ന് ഓണമാഘോഷിക്കുന്നത്...
സദ്യയുണ്ടാക്കാനൊക്കെ ആർക്കാ ഇപ്പം നേരം,
നൂറു പരസ്യങ്ങളുമൊപ്പമൽ‌പ്പം
നിലവാരമില്ലാപ്പരിപാടികളുമായി
ചാനലുകൾ കാത്തിരിക്കുമ്പോൾ....
പൂവിറുക്കലോ..ച്ഛായ്... മോശം...
മാർക്കറ്റിൽ തമിഴന്റെ കീടനാശിനി തളിച്ചുണ്ടാക്കിയ
മിന്നുന്ന പൂക്കളുണ്ടല്ലോ...
നൂറോ അഞ്ഞൂറോ ആയിരമോ
പോക്കന്റിന്റെ കനമ്പോലെ വാങ്ങാം...
ലക്ഷങ്ങൾ പൊടിച്ച്
സ്നേഹപ്പൂക്കളമെന്നപേരിൽ
ഗിന്നസിലും കയറാം...
മലയാളിയുടെ ഓണം
തമിഴനിന്ന് ചാകരക്കൊയ്ത്താണ്...
ഉത്രാടപ്പാച്ചിലെന്ന് കേട്ടിട്ടേയുള്ളൂ...
മുമ്പൊക്കെ ഓണമൊരുക്കാൻ തലേന്നാൾ
മലയാളി ഓടിനടന്നിരുന്നു...
ഈ ഉത്രാടത്തിനും കണ്ടു ഞാൻ ഉത്രാടപ്പാച്ചിൽ,
പക്ഷെ,ഓണമൊരുക്കാനുള്ള പാച്ചിലായിരുന്നില്ല....
വാങ്ങിയിട്ടും വാങ്ങിയിട്ടും ആർത്തി തീരാതെ,
കാണുന്നതത്രയും വാങ്ങിക്കൂട്ടി,
ശമ്പളവുമലവൻസും പിന്നെയോണമഡ്വാൻസുമൊക്കെ
തീർക്കാനുള്ള മത്സരപ്പാച്ചിലായിരുന്നു.....

ആർത്തി...ആർത്തി...ആർത്തിമാത്രം...അതാണിന്നത്തെ ഓണാഘോഷം...
നന്മയും സ്നേഹവുമൊക്കെ
മെസേജുകളിൽമാത്രമായിരിക്കുന്നു...
വറ്റിവരണ്ട മനസ്സുള്ള മലയാളിക്ക്
എങ്ങനെ മനസ്സു നിറയാനാണ്...
ഓണമെന്നാൽ നിറവെന്നല്ലെ,സമൃദ്ധിയെന്നല്ലെയർഥം...

ഇതൊക്കെ സഹിക്കാമെന്നു വച്ചാലും..
ഈയോണത്തിന്
ശരിയായ കണക്കെത്തുമ്മുൻപ്
നൂറ്റമ്പതിലേറെ കോടി
മലയാളി കുടിച്ചു തീർത്തു കഴിഞ്ഞത്രെ...
ലഹരി മോന്താനും ഇറച്ചി തിന്നാനും വേണ്ടി
എന്തിനിങ്ങനെയൊരോണാഘോഷം...
വേണ്ടായിരുന്നു...
മാബലിമന്നാ..കേരളത്തിലേക്കിനി വരില്ലെന്ന്
ഒന്നിനി പറഞ്ഞുകൂടെ...
തട്ടിപ്പും വെട്ടിപ്പും മാത്രം നിറഞ്ഞ
ഈ മലയാള മണ്ണിനേക്കാൾ
എത്രയോ ഭേദമല്ലേ പാതാളവാസം...

ഒടുവിൽ കല്ല് മലയെ പിളർന്നിരിക്കുന്നു...

2010-07-17T21:43:00.000+05:30

നനവ് അന്നേ പറഞ്ഞതായിരുന്നു,സത്യത്തിന് അപാര ശക്തിയാണെന്ന്....ഈ ശക്തിയോടെ ഒരു കൊച്ചുകല്ല് വേണ്ട സമയത്ത് വേണ്ടതുപോലെ എറിഞ്ഞാൽ,ആർക്കും തകർക്കാനാവില്ലെന്നു കരുതുന്ന അധർമ്മത്തിന്റെ വന്മലയെപ്പോലും പിളർക്കാനും പൊടിക്കാനുമൊക്കെ ആ ഏറുകൊണ്ട് സാധിക്കുമെന്ന് ...അതിന്ന് യാഥാർഥ്യമായിരിക്കുകയാണ്...

സർവ്വ ധാർമ്മികതയും നീതിയും നിയമവ്യവസ്ഥകളെയും ഒക്കെ കാറ്റിൽ പറത്തിക്കൊണ്ട് ,കയ്യൂക്കിന്റെയും അധികാരശക്തിയുടെയും മാത്രം പിൻബലത്താൽ പാപ്പിനിശ്ശേരിയിലെ കണ്ടൽക്കാടുകളെ അപ്പാടെ നശിപ്പിച്ചുകൊണ്ട് ടൂറിസം പാർക്ക് പണിതപ്പോൾ, അതിനെ എതിർക്കാൻ ഒരു ജില്ലാ പരിസ്ഥിതി സമിതി മാത്രമേ ഉണ്ടായിരുന്നുള്ളൂ...പാർക്ക് തുടങ്ങുന്നതിന് 20 ദിവസം മുമ്പ് തന്നെ അതിനെപ്പറ്റി പഠിച്ച് അതിനെതിരെ ശ്രീ ജയറാം രമേഷിനും കേരളത്തിലെ അധികാരികൾക്കുമൊക്കെ പരാതികൾ അയച്ചതായിരുന്നു. അന്നാരും ഞങ്ങൾ പറഞ്ഞത് ചെവിക്കൊള്ളാഞ്ഞതിനാലാണ് ആ നിരാഹാരസമരം നടത്തേണ്ടിവന്നതും തുടർന്നുണ്ടായ സംഭവവികാസങ്ങൾ നടന്നതും...

റജിസ്റ്റർ ചെയ്ത് ചട്ടക്കൂട്ടിൽ ഒതുങ്ങിയാൽ പ്രവർത്തനസ്വാതന്ത്ര്യം കുറയും എന്നതിനാൽ അതിനുപോലും മുതിരാതെ ,മെമ്പർഷിപ്പ് പിരിക്കാതെ ആത്മാർഥത മാത്രം കൈമുതലാക്കി പ്രവർത്തിക്കുന്നവരുടെ ഒരു കൊച്ചു സമിതിയാണിത്.സമാനമനസ്കരായ ആർക്കും ഇതിൽ ചേർന്നു പ്രവർത്തിക്കാം..സഹജീവിസ്നേഹവും സത്യസന്ധതയും ഉണ്ടായിരിക്കണമെന്നതുമാത്രമാണ് ഉപാധികൾ...കേരളത്തിലങ്ങോളമിങ്ങോളം നൂറുകണക്കിനാളൂകൾ സമിതിയുമായി ബന്ധപ്പെട്ട് പ്രവർത്തിക്കുന്നുണ്ടെങ്കിലും ചിലപ്പോൾ ഒരു കാര്യം ചെയ്യാൻ രണ്ടോ നാലോ പേർ മാത്രമേ കാണാറുള്ളൂ... പലപ്പോഴും ഒരേയൊരാൾ സംഭവസ്ഥലത്തുചെന്നും ഫോൺ വിളികളിലൂടെയും പല കുന്നുകളേയും വയലുകളേയും മരങ്ങളേയുമൊക്കെ രക്ഷിച്ചിട്ടുണ്ട്...ഞങ്ങളുടെ വാക്കിലെ സത്യത്തിന്റെ ശക്തിയാലാണ് ഇതു സാധിച്ചത്..ഇപ്പോൾ അതേ ശക്തി പാപ്പിനിശ്ശേരിയിലെ കണ്ടലുകൾക്കും രക്ഷയായിരിക്കുകയാണ്..കടലാസു സംഘടന എന്നൊക്കെ ഞങ്ങളെ ചിലർ കളിയാക്കുന്നുണ്ട്.അതു ഞങ്ങൾ കാര്യമാക്കുന്നില്ല,കാരണം സംഘടനയെ ശക്തിപ്പെടുത്തലല്ല ഞങ്ങളുടെ ലക്ഷ്യം ,ഈ ഭൂമിക്കായി പ്രവർത്തിക്കുക എന്നതു മാത്രമാണ്...

വമ്പൻ സംഘടനകൾ ഇവിടുണ്ടായിട്ടും ആരെങ്കിലും കണ്ടലിനെ രക്ഷിക്കാനായി മുന്നോട്ടു വന്നോ??...ഞങ്ങൾ ശക്തമായ ഒരു മൂവ്മെന്റ് തുടങ്ങിയപ്പോൾ അതിൽ പിടിച്ചുകയറാൻ ചിലരൊക്കെ വന്നെങ്കിലും അന്നു ഞങ്ങളാ അടി വാങ്ങിയില്ലായിരുന്നെങ്കിൽ പാർക്കിനെതിരെ ആരും വിരലനക്കുകപോലും ചെയ്യുമായിരുന്നില്ല..ഞങ്ങൾക്കിന്നും ഒന്നേ ആവശ്യമുള്ളൂ..അത് രാഷ്ട്രീയലക്ഷ്യമോ പണമോ പദവികളോ ഒന്നുമല്ല ,ആ കണ്ടൽക്കാടുകൾ എത്രയുംവേഗം പൂർവ്വസ്ഥിതിയിലാകണമെന്നുമാത്രം...ഞങ്ങളെ ദ്രോഹിച്ചവരോട് പകരം വീട്ടണമെന്ന ആഗ്രഹം പോലും ഇല്ലാത്തതിനാൽ കേസിനുപോലും ഞങ്ങൾ പോയില്ല...കണ്ടൽ ഒരു രാഷ്ട്രീയ പ്രശ്നമല്ല,പാരിസ്ഥിതിക പ്രശ്നം മാത്രമാണ്..ഇതു മറന്നുകൊണ്ടുള്ള കളികളെ ഞങ്ങൾ വെറുക്കുന്നു...

ഒരുകോടി മുതൽ മുടക്കിക്കഴിഞ്ഞെന്ന് പാർക്കുകാർ പറയുന്നുണ്ടെങ്കിലും അതുകേവലം നിസ്സാരമായ തുകയാണ്,500 കോടികൾ കൊണ്ടെന്നല്ല ഒന്നുകൊണ്ടും പകരം വയ്ക്കാനാകാത്തതാണ്, വിലമതിക്കാനാകാത്തതാണ് കണ്ടൽക്കാടുകൾ എന്ന സത്യത്തിനു മുമ്പിൽ..ഒന്നും പൂട്ടിക്കണമെന്നോ തുറപ്പിക്കണമെന്നോ ഉള്ള വാശിയല്ല ,മനുഷ്യവംശത്തിന്റെ നിലനിൽപ്പിന്റെ ആധാരശിലകളിൽ ഒന്നായ കണ്ടലുകൾ നിലനിൽക്കണമെന്ന ആഗ്രഹം മാത്രമാണ് ഞങ്ങളെ നയിക്കുന്നത്...
കണ്ടലിനെ അതിന്റെ ധർമ്മങ്ങൾ ഒന്നും ചെയ്യാൻ അനുവദിക്കാതെ,കേവലം ഒരു വിനോദ-വിപണനകേന്ദ്രം മാത്രമാക്കി അധ:പതിപ്പിച്ചശേഷം ,ഞങ്ങൾ കണ്ടൽ സംരക്ഷിക്കാനാണ് പാർക്കുണ്ടാക്കിയത് എന്നു പറഞ്ഞാൽ മന്ദബുദ്ധികൾ വിശ്വസിച്ചേക്കും..കേരളത്തിൽ അവരുടെ എണ്ണം അധികമാണല്ലോ!!...
ഈ പാർക്ക് അടക്കുകതന്നെ ചെയ്യേണ്ടിവരും...കാരണം സത്യവും അസത്യവും നേർക്കുനേർ വരുമ്പോൾ താത്കാലികമായി അസത്യം വിജയിച്ചു എന്നൊക്കെ തോന്നുമെങ്കിലും, അന്തിമവിജയം സത്യത്തിനു മാത്രമായിരിക്കും...

കേന്ദ്രസംഘത്തിന്റെ പഠനത്തിനു ശേഷം കേന്ദ്രമന്ത്രാലയം തികച്ചും നിയമവിരുദ്ധമായതാണെന്നു കണ്ട് അത് ഏറ്റവും പെട്ടെന്ന് അടച്ചുപൂട്ടണമെന്ന് ഉത്തരവിട്ടിരിക്കയാണ്.സംസ്ഥാന സർക്കാറിന് ഉത്തരവ് നൽകിക്കഴിഞ്ഞു.എന്നിട്ടും പാർക്കധികൃതരും സി.പി.എമ്മും കണ്ടൽ സംരക്ഷകരാണ് തങ്ങളെന്നും നിയമാനുസൃതമാണ് പാർക്ക് പ്രവർത്തിക്കുന്നതെന്നും മറ്റുമാണ് തട്ടിവിടുന്നത്..താൻ കട്ടിട്ടേ ഇല്ല എന്ന് കള്ളന്മാർ ആണയിടും പോലെയാണിത്..കൊച്ചു കുട്ടികൾക്കുവരെ കണ്ടാലറിയാം അവിടത്തെ നിയമലംഘനങ്ങൾ...മന്ദബുദ്ധികൾക്ക് ഇപ്പൊഴും അത് കണ്ടാൽ മനസ്സിലാവില്ല...കണ്ടൽ എന്താണെന്നുപോലും അറിയാത്ത കണ്ടൽ സംരക്ഷകർ!!!കാടിനെ കാടായാണ് സംരക്ഷിക്കേണ്ടത്... അല്ലാതെ അതിന്റെ മുഴുവൻ ധർമ്മങ്ങളൂം ഇല്ലാതാക്കി,മുഴുവൻ ജീവികളെയും ദ്രോഹിച്ച് പണമുണ്ടാക്കുക എന്ന ഒറ്റ ലക്ഷ്യത്തോടെ ഉല്ലാസപ്പാർക്കാക്കി മാറ്റുകയല്ല വേണ്ടത്...

വനംമന്ത്രിയും മുഖ്യമന്ത്രിയും ഉത്തരവു പ്രകാരം നടപടിയെടുത്ത് പാർക്കിന്റെ പ്രവർത്തനം നിർത്തലാക്കുകയും, കണ്ടൽക്കാടിനെ പൂർവ്വസ്ഥിതിയിലാക്കുകയും ചെയ്യേണ്ടതാണ്..ഇല്ലെങ്കിൽ അതിനർഥം കയ്യൂക്കും അധികാരശക്തിയും കൂട്ടിനുണ്ടെങ്കിൽ ഇവിടെ ആർക്കും എന്തു നിയമലംഘനവും നടത്താമെന്ന് അവരും അംഗീകരിക്കുന്നു എന്നാണ്...

ഇങ്ങനെയാണെങ്കിൽ ഈ വികസനം വേണ്ടെന്നു പറഞ്ഞുകൂടെ?…..

2010-05-15T14:28:00.005+05:30

ആർത്തി മൂത്ത മനുഷ്യസമൂഹം ഇന്ന് അന്ധമായ ഒരു കുതിപ്പിലാണ്.എന്താണ് ആവശ്യം എന്നുപോലും തിരിച്ചറിയാത്ത അവർ എല്ലാം വാങ്ങിക്കൂട്ടുകയാണ്.ഉപയോഗിക്കുക,വലിച്ചെറിയുക…എന്നതാണ് വർത്തമാനകാലത്ത് മനുഷ്യന്റെ ജീവനശീലം.അവന്റെ ജീവിതം വെറും അനുകരണമായിരിക്കുന്നു.മിമിക്രി മാത്രമായിരിക്കുന്നു കല….അഴിമതി,സ്വജനപക്ഷപാതം,വഞ്ചന മുതലായവ സദ്ഗുണങ്ങളുടെ പട്ടികയിലേയ്ക്ക് മാറ്റം ചെയ്യപ്പെട്ടിരിക്കുന്നു.സദ്ഗുണങ്ങളും ദുർഗുണങ്ങളും തിരിച്ചറിയാത്ത ,അല്ലെങ്കിൽ ഉരച്ചുമനസ്സിലാക്കാൻ ഉരകല്ലില്ലാത്ത ,അതിനു ശ്രമിക്കാത്ത ഈ സമൂഹം നൽകുന്ന സൂചനകളെന്താണ്? ഈ കുതിപ്പ്…ഈ താണ്ഡവം നമുക്ക് എത്ര കാലം തുടരാനാവും?…….

യഥാർത്ഥത്തിൽ ഒരു ജീവി എന്ന നിലയിൽ മനുഷ്യന് അടിസ്ഥാനപരമായി വേണ്ടത് ശുദ്ധവായു ,ശുദ്ധജലം, ശുദ്ധമായ ഭക്ഷണം ഇത്രയുമാണ്..ഇത്രയും കിട്ടിക്കഴിഞ്ഞാൽ അവന്റെ ആരോഗ്യം പൂർണ്ണമായി.ഇനി വേണ്ടത് സ്വസ്ഥമായി കഴിയാൻ ഒരു കൂട്-ഒരു വീട് പിന്നെ ഒരിണ…ഭക്ഷണം വിളയിക്കാൻ അല്പം ഭൂമി…. പിന്നെ വേണമെങ്കിൽ സഞ്ചരിക്കാൻ വഴികളും വാഹനങ്ങളും.ഇവ അത്യാവശ്യങ്ങൾക്കു മാത്രം,ആർഭാടമാകരുതൊന്നും…

ഇത്രയൊക്കെ മാത്രമാണ് മനുഷ്യന്റെ ഭൌതികാവശ്യങ്ങൾ…ഇതിൽ അവസാനം പറഞ്ഞ രണ്ടുകാര്യങ്ങളൊഴികെ സർക്കാരുകൾ ചെയ്തുകൊടുക്കുന്നുണ്ടോ?ശുദ്ധവായുവും വെള്ളവും വിഷമില്ലാത്ത ആഹാരവും സർക്കാരുകൾ ഉറപ്പാക്കുന്നുണ്ടെങ്കിൽ ഇത്രയേറെ സൂപ്പർ സ്പെഷ്യാലിറ്റി ആശുപത്രികൾ ഇവിടെ ഉയരുമായിരുന്നോ?

ഭൌതിക ആ‍വശ്യങ്ങൾക്കപ്പുറം മനുഷ്യൻ എന്ന ജീവജാതിയ്ക്ക് ഒരു മറുപകുതി കൂടിയുണ്ട്.ജീവജാലങ്ങളിൽ അവനുമാത്രം കിട്ടിയ ഒരപൂർവ്വത-ബോധതലത്തിന്റെ ഉയർച്ചയാണ് ആ മറുപകുതി .പൂർണ്ണമായും ഇത് ഭൂരിഭാഗം പേരും വിസ്മരിക്കുകയാണ്.ആ ലോകം സൌന്ദര്യത്തിന്റെതാണ്-അറിവിന്റെതാണ്…ഈ രണ്ടു പകുതികളും ഉൾച്ചേർന്നവനാണ് മനുഷ്യൻ,സത്തും ചിത്തും അതിനുശേഷം ആനന്ദവും ….സച്ചിതാനന്ദൻ…ഇത് ഒരു ജന്മംകൊണ്ട് തിരിച്ചറിയാൻ കഴിയാതെ പോകുന്നതാണ് മനുഷ്യന്റെ ജീവിതപരാജയത്തിന്റെ മുഖ്യ കാരണം.

നമ്മുടെ ഭരണാധികാരികൾ ഭൌതിക പുരോഗതി മാത്രം ലക്ഷ്യമിട്ട് എല്ലാ പ്രവർത്തികളും ചെയ്യുന്നു.പണാധിഷ്ഠിതമായിരിക്കുന്നു സമൂഹമനസ്സ്. ഇടതായിക്കോട്ടെ വലതായിക്കോട്ടെ മാറിമാറി വരുന്ന സർക്കാരുകൾ പണാധിഷ്ഠിതമായിമാത്രം കാര്യങ്ങൾ നടത്തുന്നു.എല്ലാവരും പൊതുസ്വത്തവകാശം വിട്ട് സ്വകാര്യസ്വത്തിലേയ്ക്ക് കടക്കുന്നു.സുതാര്യത വിട്ട് ഇരുമ്പുമറക്കുള്ളിൽ കാര്യങ്ങൾ നടത്തുന്നു.പണം ഉണ്ടാക്കാനുള്ള മാർഗ്ഗം ആരും കണ്ടില്ലെങ്കിൽ മാന്യനായി.അഥവാ ആരെങ്കിലും കണ്ടാൽ സാമ ദാന ഭേദ ദണ്ഡ മുറകൾ ഉപയോഗിച്ച് നേരിടുന്നു.ഏതുതരം സുഖസൌകര്യങ്ങളും പണം കൊടുത്താൽ നമുക്ക് നൽകാൻ ഭരണകർത്താക്കൾ തയ്യാറായി നിൽക്കുന്നു

യുവത്വത്തെ മുഴുവൻ മദ്യത്തിൽ മുക്കിക്കിടത്തുന്നു.അവരെ അതിൽനിന്നും ഉണർത്താതിരിക്കാൻ നമ്മുടെ മഹാനടൻ വൈകീട്ടെന്താ പരിപാടി എന്നു ചോദിച്ച് കവലകളിൽ ചിരിതൂകി നിൽക്കുന്നു.കൂടാതെ പെണ്ണുങ്ങളെ പാട്ടിലാക്കാൻ ഇയാൾതന്നെ പൊന്നിന്റെ കേമത്തരങ്ങൾ വിളിച്ചുപറയുന്നു.ആ പൊലിമയിൽ നമ്മൾ പൊന്നും മദ്യവും വളരെ കേമത്തരമായി അനുഭവിക്കുന്നു.പ്രത്യുപകാരമായി അയാളെ സർക്കാർ ഖാദിയുടെ പ്രചാരകനാക്കുന്നു.അങ്ങനെ പ്രശസ്തി വിറ്റ് പണമുണ്ടാക്കുകയും ആ പണംകൊണ്ട് വീണ്ടും പ്രശസ്തനാവുകയും ചെയ്യുന്നു.

ഭരിക്കുന്നവർ അവരവരുടെ അജണ്ടകൾ നടപ്പിലാക്കാൻ മനപ്പൂർവ്വം ചെയ്യുന്നതാണ് യുവജനങ്ങളെ മദ്യത്തിന്റെ അടിമകളാക്കിമാറ്റുക എന്നത്. മദ്യത്തിനു മാന്യത കൊടുത്ത് യുവത്വത്തെ അതിൽ മയക്കിക്കിടത്തിയിരുന്നില്ലെങ്കിൽ അവരുടെ പ്രതികരണങ്ങൾക്കു മുന്നിൽ ഒരു ഭരണകൂടത്തിനും ധർമ്മത്തിൽനിന്ന് വ്യതിചലിക്കാൻ പറ്റുമായിരുന്നില്ല. തലയിൽ മുണ്ടിടാതെയും പൊതുസ്ഥലത്ത് ക്യൂ നിന്നുമൊക്കെ മദ്യം വാങ്ങുന്നതും ബസ്സിൽ വച്ചും മറ്റും മൊബൈലിൽ സുഹൃത്തിനോട് ഒരു കുപ്പി വാങ്ങിവയ്ക്കാൻ ഉറക്കെ പറയുന്നതുമൊക്കെ മലയാളിക്കിന്ന് മാന്യതയുടെ അടയാളങ്ങളായി മാറിക്കഴിഞ്ഞു. പത്രഫോട്ടോ‍ഗ്രാഫരുടെ ക്യാമറക്കണ്ണീനു മുന്നിൽ‌പ്പൊലും ഹുങ്കോടെ നിന്ന് കുടിക്കാൻ അവനിന്ന് എന്തഭിമാനമാണെന്ന് നമ്മളെല്ലാം കണ്ടതാണല്ലോ.മദ്യം വിറ്റ പണം കൊണ്ടാണ് ഭരണകൂടം ചലിക്കുന്നതെന്ന് മദ്യമുതലാളിമാരും ഭരണാധികാരികളും ഹുങ്കുപറയുമ്പോൾ, ബോധം നശിച്ച മദ്യപാനിക്കും അയാളുടെ കുടുംബത്തിനും ഉണ്ടാകുന്ന നഷ്ടങ്ങളുടെ കണക്കുകൾ മദ്യം മൂലമുണ്ടാകുന്ന ലാഭത്തെക്കാൾ എത്രയോ അധികമാനെന്ന യാഥാർഥ്യം ഇവർ കാണുന്നില്ല.ഇവിടെ ലാഭമുണ്ടാകുന്നത് മദ്യമുതലാളിമാർക്കും അവരെ താങ്ങിനിർത്തുന്ന രാഷ്ട്രീയക്കാർക്കും മാത്രമാണ്.

ചേരികളുടെ വ്യാപനമാണ് അസന്തുലിതമായ വികസന പ്രക്രിയകളുടെ മറ്റൊരു ദൂഷ്യം.ധനികരും അധികാരികളുമടങ്ങുന്ന 10% പേർക്ക് സുഖജീവിതം നയിക്കാനായി 90%പേരുടെ വീടും വയലും പൈതൃകങ്ങളുമെല്ലാം ഇടിച്ചുനിരത്തി ബി.ഒ.ടി.പാതകളും താപനിലയങ്ങളും കളിമൺഖനനങ്ങളൂം വ്യവസായ പാർക്കുകളും ഒക്കെ ഉണ്ടാക്കുമ്പോൾ, ജീവന്റെ നിലനിൽ‌പ്പിനായി പ്രകൃതി ഒരുക്കിവച്ചിരിക്കുന്ന കുന്നും വയലും കാടും മേടും പുഴയും വെള്ളച്ചാട്ടങ്ങളൂം കടലോരങ്ങളും കണ്ടൽക്കടുകളും ഒക്കെ ചിലർക്ക് വികസനമെന്ന ഓമനപ്പേരിട്ട് തീറെഴുതിക്കൊടുക്കുമ്പോൾ പാരിസ്ഥിതികവും സാമൂഹ്യവുമായ അഭയാർഥികളുടെ എണ്ണം കൂടിക്കൊണ്ടിരിക്കുന്നു.കൃഷിചെയ്യാനുള്ള ഭൂമിയുടെ വിസ്തൃതി കുറയുന്നതും ഭക്ഷണം കഴിക്കാനുള്ള ആളുകളുടെ എണ്ണം കൂടുന്നതും ശാസ്ത്രീയമായ രീതിയല്ലല്ലോ…..ഇതൊക്കെയാണ് ഇന്നു നടക്കുന്ന വികസനങ്ങൾ.എങ്കിൽ ഈ വികസനം ഇനിയും നമുക്കു വേണ്ട എന്നു പറയാനുള്ള ചങ്കൂറ്റം നമുക്ക് കാണിച്ചുകൂടെ?……

ഇനി നമുക്ക് വികസനത്തിന്റെ ഭൂരിഭാഗം പേരും അവഗണിക്കുന്ന മറ്റെ പകുതിയെപ്പറ്റി പരിശോധിക്കാം. ബോധതലത്തിന്റെ കാര്യമാണ് പറയുന്നത്.അതിനെ വികസിപ്പിക്കാൻ മുമ്പൊക്കെ ഒരുപാട് ശ്രമങ്ങൾ ഉണ്ടായിട്ടുണ്ട്.സാമൂഹ്യ -സാസ്കാരികനായകന്മാർ സമൂഹത്തിലെ എല്ലാ ജീർണ്ണതകൾക്കുമെതിരെ നിരന്തരമായി പ്രവർത്തിച്ഛിരുന്നു. മദ്യം വിഷമാണെന്നും മനുഷ്യരെല്ലാം ഒരു ജാതിയാണെന്നും പറഞ്ഞ ശ്രീനാരായണഗുരുയും, പ്രകൃതിയെ നശിപ്പിക്കരുതെന്നു പറഞ്ഞ ഏംഗൽസും ,എല്ലാവരുടെയും ആവശ്യത്തിനുള്ളത് ഇവിടുണ്ട്, എന്നാൽ ആരുടെയും ആർത്തിക്കുള്ളത് ഭൂമിയിലില്ലെന്നു പറഞ്ഞ ഗാന്ധിജിയും നമ്മെ ശരിയായ ദിശയിൽ നയിച്ചവരായിരുന്നു….ഇന്നു നമുക്കുള്ളത് പരസ്പരം ഗ്വാ ഗ്വാ വിളിക്കുകയും പ്രശസ്തിയും സ്ഥാനമാനങ്ങളൂം മാത്രമാഗ്രഹിച്ച് പ്രവർത്തിക്കുന്നവരുമായ സാംസ്കാരികനായകന്മാർ എന്ന് പറയപ്പെടുന്ന ചിലർ മാത്രമാണ്…..വാ‍യനശാലകൾ ഇന്ന് ജനശൂന്യങ്ങളാണ്…

ഉപയോഗിക്കാത്ത ഒരു സാധനം പെട്ടെന്ന് പേട് ആയിപ്പോകും.പേടായിപ്പോയ ഒരാത്മാവും പണച്ചാക്കായിപ്പോയ ഒരു ശരീരവുംവച്ചാണോ ആധുനിക മനുഷ്യൻ ജീവിക്കേണ്ടത്?….ആനന്ദം എന്നത് കേവലം ചില സന്യാസിമാർക്ക് മാത്രമായി സംവരണം ചെയ്യപ്പെടേണ്ടതാണോ??സന്തുലിതമായ ഒരു വികസനം നടക്കുന്നില്ലെങ്കിൽ മനുഷ്യൻ എന്ന ജീവജാതി അടുത്ത തലമുറയിൽ മറ്റൊന്നായി പരിണമിച്ചേക്കാം.അവന്റെ നാശം തന്നെയാണ് സംഭവിക്കാൻ പോകുന്നത്…

വീട്ടുമുറ്റത്തൊരു കള്ളുഷാപ്പ്

2010-04-30T08:07:00.001+05:30

കണ്ണൂർ തെക്കിബസാറിലെ ഒരു വീട്ടുമുറ്റത്ത് കള്ളുഷാപ്പിനെതിരെ ഒരു ബാനർ ഉയർന്നിട്ട് ഇന്നേയ്ക്ക് 37 ദിവസമായി.സ്വന്തം വീട്ടുമുറ്റത്ത് വീടിനോട് ചേർന്നുള്ള കള്ളുഷാപ്പിനെതിരെ ഒരു സംഘം വീട്ടമ്മമാർ സമരം ചെയ്തുകൊണ്ടിരിക്കുകയാണ്....

സാധാരണക്കാരായ ഈ വീട്ടമ്മമാർക്ക് എന്തുകൊണ്ടിങ്ങനെ സമരരംഗത്തിറങ്ങേണ്ടിവന്നു എന്ന് നിങ്ങൾക്കറിയേണ്ടെ?ശല്ല്യം സഹിക്കവയ്യാഞ്ഞിട്ടാണേ...കേവലം ഒരു മീറ്റർ അകലമേയുള്ളു ഇവരുടെ വീടും കള്ളുഷാപ്പും തമ്മിൽ.സദാ കുടിയന്മാരുടെ പൂരപ്പാട്ടും ബഹളവും...വിട്ടുമുറ്റത്തു വന്നുതന്നെയാണ് ബോധംകെട്ടവന്മാരുടെ എല്ലാ കൂത്താട്ടങ്ങളും...പലപ്പോഴുമവർ ഇവരുടെ വാതിലിൽ വന്നുമുട്ടി ശല്ല്യം ചെയ്യാറുമുണ്ട്.പ്രായമായ പെൺകുട്ടികളുള്ള അമ്മമാരുടെ നെഞ്ചിൽ തീയാണ്..പെറ്റമ്മയെവരെ തിരിച്ചറിയാൻ പറ്റാത്തവർക്ക് പ്രായംചെന്ന അമ്മമാരെ വരെ കയ്യേറ്റം ചെയ്യാൻ മടിയില്ലാത്തപ്പോൾ കൊച്ചുപെങ്കുട്ടികൾക്കുപോലും മുറ്റത്തിറങ്ങാൻ പറ്റാത്ത അവസ്ഥയാണിപ്പോൾ... കുട്ടികൾക്കാണെങ്കിൽ സദാ കാണേണ്ടീവരുന്നത് കുടിയന്മാരെയും... എന്തിനെയും അനുകരിക്കാനുള്ള പ്രവണതയുള്ള പ്രായത്തിൽ അവർ വഴിതെറ്റാതെന്തുചെയ്യും???അതുതന്നെയായിരിക്കും വീട്ടൂമുറ്റത്ത് ഷാപ്പ് അനുവദിച്ചവരുടെ ഉദ്ദേശ്യവും...;കുടിയന്മാരുടെ എണ്ണം കൂട്ടിക്കൂട്ടി കേരളത്തെ കുടിയന്മാരുടെ സ്വന്തം നാടാക്കിമാറ്റുക എന്നത്...

നഗരസഭ ഈ ഷാപ്പിനു പെർമിറ്റ് നൽകിയിട്ടില്ലത്രെ!!എന്നിട്ടുപോലുമതു അവിടെനിന്നു മാറ്റാൻപോലുമാർക്കുമാവുന്നില്ല.ഇവിടെയൊരു കലക്ടരുണ്ട്. ബഹുകേമനാണ്...ജില്ലാമജിസ്ട്രേറ്റാണത്രെ.ഇവിടെ എന്തുനടന്നാലും അതൊന്നും തന്റെ ചുമതലയല്ല എന്നു പറയാനും പരാതിയുമായിച്ചെല്ലുന്നവരെ പരിഹസിക്കാനാനുമൊക്കെയാണങ്ങേർക്ക് മിടുക്ക്..

കേരളത്തിൽ മദ്യനിരോധനം നിലവിലില്ലെങ്കിലും,മദ്യത്തെ സർക്കാർ വരുമാനം കൂട്ടാനുള്ള ഒരു വ്യവസായമായാണു കരുതുന്നതെങ്കിലും, മദ്യപാനശീലത്തെ പ്രോത്സാഹിപ്പിക്കുന്നവിധത്തിലുള്ള പ്രസ്താവനകളുമായി നേതാക്കളും മോഹൻലാലുമൊക്കെ[വൈകീട്ടെന്താ പരിപാടി..!!...] രംഗത്തുണ്ടെങ്കിലും.... മദ്യം വിഷമാണ്...മനുഷ്യനെ നശിപ്പിക്കുന്ന പിശാചാണ്...കോടികളുടെ ലാഭക്കണക്കുകൾ അവതരിപ്പിക്കുന്നവർ ഓരോ കുടിയന്റേയും കുടുംബബഡ്ജറ്റിൽനിന്ന് ചോർന്നുപോകുന്ന കോടികളെ കാണുന്നില്ല.ബോധം നശിച്ച്നശിച്ച് ഒന്നിനോടും പ്രതികരിക്കാനാകാതെ ,ആരോടും പ്രതിബദ്ധതയില്ലാതെ ജീവിക്കുന്ന മഹാഭൂരിപക്ഷം വരുന്ന യുവാക്കൾ ഇവിടെ ജീവച്ഛവങ്ങളായിക്കഴിയുന്നത് ഭരണക്കാർക്കും സൌകര്യംതന്നെ...ഒപ്പം ഡോക്ടമാർ,മരുന്നുകമ്പനികൾ തുടങ്ങിയവർക്കും കോടികൾ കീശയിൽ വീഴും...മദ്യപന്റെ മക്കൾമാത്രം അരവയറും മുഴുപ്പട്ടീണിയുമൊക്കെയായും, അവന്റെ ഭാര്യ അകാലത്തിൽ വിധവയുമൊക്കെയായി അങ്ങനെ കഴിഞ്ഞാൽ ആർക്കെന്തു നഷ്ടം....

മദ്യത്തൊഴിലാളികൾ വീട്ടമ്മമാർക്ക് ഭീഷണിയുമായി രംഗത്തുണ്ട്.തൊഴിൽപ്രശ്നമാണത്രെ!!മറ്റുള്ളവരെ ദ്രോഹിച്ചുകൊണ്ടുതന്നെവേണോ തൊഴിൽചെയ്യാൻ?വീട്ടുമുറ്റത്തുനിന്നാ ഷാപ്പ് മാറ്റാനുള്ളത്രയെങ്കിലും ദയ കാണിച്ചാലെന്താ?കേരളത്തിലാണെങ്കിൽ തൊഴിൽ ചെയ്യാൻ ആളെക്കിട്ടാഞ്ഞ് ആൾക്കാരെല്ലാം വിഷമിച്ചിരിക്കുകയുമാണ്.കാർഷിക നിർമാണമേഖലകൾ തൊഴിലാളിക്ഷാമം കാരണം പ്രതിസന്ധിയിലുമാണ്.ഇങ്ങനെയിരിക്കെ മറ്റൊരുത്തന്റെ ജീവിതം തകർക്കുന്ന ഒരു തൊഴിൽ ചെയ്തുകിട്ടുന്ന പണംകൊണ്ടുതന്നെ വേണോ സ്വന്തം കുടുംബം പോറ്റാൻ?...

കണ്ണൂരിലെ വീട്ടമ്മമാർക്ക് പല സംഘടനകളും പിന്തുണയുമായെത്തിയിട്ടുണ്ട്.മുഖ്യധാരാരാഷ്ട്രീയക്കാർ ഇപ്പോഴും ഇതു കണ്ടില്ലെന്നു നടിക്കുകയാണ്.ഏവരും അവരെ പിന്തുണക്കേണ്ടതാണ്.മദ്യം വ്യാപിപ്പിക്കുകയല്ല ഇവിടെ ചെയ്യേണ്ടത്.ഒറ്റയടിക്ക് നിരോധിക്കാനാവില്ലെങ്കിലും,ബോധവൽക്കരണം നടത്തിയും ഷാപ്പുകളുടെ എണ്ണം പടിപടിയായി കുറച്ചും ഈ മാരണത്തെ ക്രമേണ ഒഴിവാക്കണം.ആരോഗ്യവും സംതൃപ്തിയും നിറഞ്ഞ കുടുംബങ്ങളാണ് ഒരു നാട്ടിന്റെ സമ്പത്ത്...അല്ലാതെ കുടിപ്പിച്ചുകുടിപ്പിച്ച് ബോധംകെടുത്തി,പ്രതികരണശേഷി നഷ്ടപ്പെട്ട ജനതയെ പിഴിഞ്ഞുണ്ടാക്കുന്ന കാശുകൊണ്ടല്ല നാടു ഭരിക്കേണ്ടത്...

ഒരു പുഴയുടെ ആത്മരോദനങ്ങൾ

2010-02-23T16:12:00.011+05:30

മക്കളേ,
നിങ്ങൾക്കെന്നെ അറിയുമോ?ഞാൻ കക്കാടുപുഴ..കണ്ണൂർജില്ലയിലെ പുഴാതി പഞ്ചായത്തിലൂടെയാണ് മുഖ്യമായും ഒഴുകുന്നത്...ഓ..തെറ്റിപ്പോയി...ഒഴുകിയിരുന്നത്.... ഇന്ന് ഞാൻ ഒഴുകുന്നില്ല.മരണാസന്നയായി അന്ത്യശ്വാസം വലിച്ചുകൊണ്ടിരിക്കുകയാണ് ഞാനിന്ന്..ശ്വാസം നിലയ്ക്കാൻ ഇനി എത്രനാൾ? അറിയില്ല.എങ്കിലും...എന്റെ ചരമശയ്യയിൽ കിടന്നുകൊണ്ട് എന്റെ ആത്മനൊമ്പരങ്ങൾ ഞാൻ പങ്കിടട്ടെ.... പണ്ട് എന്നുവച്ചാൽ നാൽ‌പ്പത്തിമൂന്നു വർഷങ്ങൾക്കുമുമ്പ് ഞാൻ ഒരു പുഴയായി ഒഴുകിയിരുന്നു..തടങ്ങളെയാകെ ഹരിതാഭമാക്കിക്കൊണ്ട് കൃഷിയിടങ്ങളെ തണ്ണീരാൽ നനച്ചുകൊണ്ട് കളകളം പാടി ഒഴുകിയിരുന്ന ഒരു കൊച്ചുസുന്ദരിയായിരുന്നു ഞാനന്ന്...മനുഷ്യർ എന്നിലൂടെ ബോട്ടുകളിൽ സഞ്ചരിക്കുകയും നെല്ലും തേങ്ങയുമൊക്കെ കടത്തിക്കൊണ്ടു പോവുകയും ചെയ്തിരുന്നു.മത്സ്യസമ്പത്തിനാൽ അനുഗ്രഹീതയായ എന്നിൽ നിന്നും അവർക്ക് രുചികരമായ ഭക്ഷണവും ലഭിച്ചിരുന്നു. എത്രയെത്ര ആൾക്കാരുടെ മനസ്സിനെ ഞാൻ സ്വാധീനിക്കുകയും,ആനന്ദിപ്പിക്കുകയും ചെയ്തിരുന്നെന്നോ?!എത്രയെത്ര കവിഭാവനകൾ എന്റെ തീരങ്ങളിൽ പൂത്തുലഞ്ഞിരുന്നെന്നോ?!!നിങ്ങൾക്കറിയില്ലേഎൻ.എൻ.കക്കാടിനെ?.... പക്ഷെ ഇതൊക്കെ ഗതകാല സ്മരണകൽ മാത്രം.ഇന്ന് എന്നടുത്തേക്ക് ആരും വരാറില്ല.ആർക്കെങ്കിലും വരേണ്ടിവന്നാൽത്തന്നെ മൂക്ക് പൊത്തിക്കൊണ്ട് ഓടിപ്പോവുകയാണ് ചെയ്യുക!അത്രയ്ക്ക് മലീമസയായി,ദുർഗന്ധവാഹിയായി,ദുർഭഗയായിത്തീർന്നിരിക്കുന്നു ഞാനിന്ന്..... ഇതിനൊക്കെ കാരണം എന്താണെന്ന് നിങ്ങൾക്കറിയേണ്ടേ?!.എന്റെ മാതൃനദിയായ വളപട്ടണം പുഴയിൽ ശാസ്ത്ര വിദഗ്ധന്മാർ ഒരണ കെട്ടി..എന്നിട്ട്..നാൽ‌പ്പത്തിരണ്ട് വർഷങ്ങളോളം ഒരു പുഴയുടെ ഗതിയെ തടഞ്ഞുവെച്ചു!!..ഒരിറ്റ് ജലം പോലും ഒഴുകാൻ അനുവദിച്ചില്ല...അതോടെ കൈവഴിയായ എന്നിലെ ഒഴുക്കും നിലച്ചു.മഴക്കാലത്ത് മാത്രം ഇത്തിരി ജലം ഒഴുകിപ്പോയാലായി..... പിന്നീട് എന്തൊക്കെയാണ് സംഭവിച്ചതെന്നോ?..ഹോ!..ഓർക്കുമ്പോൾത്തന്നെ പേടിയാവുന്നു.ഒഴുക്ക് നിലച്ച എന്റെ ശരീരത്തെ മനുഷ്യർ കൊത്തിമുറിച്ചു കൊത്തിമുറിച്ചു കൈയ്യേറിസ്വന്തമാക്കി...സ്കൂളുകളും,റോഡുകളും,കളിസ്ഥലങ്ങളും,

കെട്ടിടങ്ങളുമൊക്കെ പണിതുയർത്തി... ഒരു നാട്ടിലെ ജനങ്ങളുടെയൊക്കെ അവകാശമായ പുഴയെ അധികൃധർ തന്നെ ഒരു മരമില്ലുകാർക്ക് പാട്ടത്തിനു കൊടുത്തു!!അതും കേവലം വർഷം പ്രതി നൂറ് രൂപയ്ക്ക്!!.എന്നിട്ടും മതിയായില്ല അവർക്ക്.റോഡ് നിർമ്മിച്ചപ്പോൾ പാലം പണിയുന്നതിനു പകരം ഒരു കലുങ്ക് മാത്രം പണിത് അവരെന്നെ അതിനുള്ളിലിട്ട് ഞെരുക്കി ശ്വാസം മുട്ടിച്ചു..... പിന്നേയുമുണ്ട് വിശേഷം. അതാണ് നിങ്ങൾ അറിയേണ്ട കാര്യം.പുഴാതി പഞ്ചായത്തു തന്നെ എന്റെ നെഞ്ച് തുരന്ന് കോൺക്രീറ്റ് ആണികൾ അടിച്ചു കയറ്റി അതിനു മുകളിൽ ഒരിറച്ചി മാർക്കറ്റ് പണിതുയർത്തി!!!...അവിടുത്തെ സർവ്വ മാലിന്യങ്ങളും കെട്ടിയിട്ട എന്റെ നെഞ്ചിലേക്കാണ് തള്ളുന്നത്!!..കൂടാതെ പഞ്ചായത്ത് തള്ളുന്ന മാലിന്യങ്ങളും,നാടുകാരുടെ മാലിന്യങ്ങളും,മരം അഴുകിയ ചീഞ്ഞ വെള്ളവും ഒക്കെച്ചേർന്ന് എന്നെ പുഴുവരിക്കുന്ന കറുകറുത്ത് കൊഴുത്ത ജലമുള്ള ദുർഗ്ഗന്ധ വാഹിയായ ഒരു നരകക്കുണ്ടാക്കി മാറ്റിയിരിക്കുന്നു!!..പഞ്ചായത്തിന്റെ വിചാരം ഇവിടെ ഒരു പുഴ ഇല്ല എന്നാണ്.ബാക്കി സ്ഥലമത്രയും കെട്ടിടവും റോഡുമൊക്കെയും പണിയാനാണിപ്പോൾ നീക്കം.... ഇടയ്ക്ക് കാട്ടാമ്പള്ളിയിലെ ചുണക്കുട്ടികളുടെ നീണ്ട നാൽ‌പ്പത്തിരണ്ട് വർഷത്തെ സമരങ്ങളുടെ സമ്മർദ്ദത്തിൽ കുപ്രസിദ്ധമായ അണക്കെട്ടിന്റെ ഷട്ടറുകൾ തുറക്കപ്പെട്ടപ്പോൾ എനിക്കൊരൽ‌പ്പം ആശ്വാസം കിട്ടിയിരുന്നു....അഴുക്കുകൾ ഒരല്പം ഒഴുകിപ്പോവുകയും ആമ്പൽ‌പ്പൂക്കൾ ചിരിതൂകി നിൽക്കുകയും ചെയ്തു.....പക്ഷെ വീണ്ടും ഷട്ടർ അടച്ചപ്പോൾ മുൻ ഗതി തന്നെയായി എനിക്ക്....
എനിക്ക് വീണ്ടും പണ്ടെത്തെപ്പോലെ തെളിനീർ വാഹിനിയായി ഒഴുകണമെന്ന് ആഗ്രഹമുണ്ട്.മക്കളെ..എനിക്കുവേണ്ടിയല്ല...നിങ്ങൾക്കൊക്കെ വേണ്ടി...എന്നെ അതിനു സഹായിക്കുമോ നിങ്ങൾ?..കനിവുള്ള കുറച്ചു മക്കൾ അതിനായി ശ്രമം ചെയ്തു കൊണ്ടിരിക്കുന്നുണ്ട്.നിങ്ങളും അതിൽ പങ്കാളിയാകില്ലെ......
നിങ്ങളുടെ സ്വന്തം
കക്കാട് പുഴ

ശിഥിലീകരണത്തിന്റെ അദൃശ്യ കരങ്ങൾ

2009-08-29T11:06:00.013+05:30

നമ്മുടെ മണ്ണും,വെള്ളവും,വായുവും കുത്തകകൾ കൊള്ളയടിക്കുന്നതിന്റെ ഉത്തമ ദൃഷ്ടാന്തമാണ് ഭൂതത്താൻ കുന്നിന്റേത്.ഇതിന് ഒത്താശ ചെയ്ത് കൊടുക്കുന്നതോ നമ്മെ ഭരിക്കുന്നവരും, ഭരിക്കേണ്ടവരും!!കുന്നിന` ചുറ്റും ജനനം തൊട്ട് താമസിക്കുന്നവരെ അഭയാർഥികളാക്കിയാലും വേണ്ടില്ല...അവർ അടിമത്തം സ്വീകരിച്ചു ഭൂതത്താൻ കുന്ന് കച്ചവടത്തിനു മുൻപ്
കഴിഞ്ഞവരാണല്ലൊ...രാഷ്ട്രീയമയും,സാമുഹികമായും,
സാമ്പത്തികമായും ഒക്കെ..ഇനി അവർ എവിടെ പോകാൻ...ഇനി കൂടുതൽ കൂടുതൽ ഉപഭോഗിക്കുന്നവരെ മാത്രമേ കമ്മ്യൂണിസ്റ്റ്കാർക്ക് പോലും ആവശ്യമുള്ളു...പണം എന്നത് മനുഷ്യന്റെ ഒരേ ഒരു ആവശ്യമായി മാറിയിരിക്കയാണ്..പണം കൊടുത്താൽ കിട്ടാത്തതായി ഒന്നുമില്ലെന്ന് പഠിപ്പിക്കാൻ എല്ലാവരും മത്സരിക്കയാണ്..വികസനമെന്ന ഉമ്മാക്കി കാട്ടി,വിനാശത്തിന്റെ വിത്തുകൾ പാകി,പുളയ്ക്കുന്ന പണത്തിന്റെ ഉരുൾ പൊട്ടലിൽ അവിടെ വർഷങ്ങളായി താമസിക്കുന്ന,വേരുകളുള്ളവർക്കെന്ത് പ്രസക്തി?...

നാട്ടിൽ ഒരു പ്രവൃത്തി നടക്കുമ്പോൾ ആദ്യം അറിയേണ്ടത് നാടുകാരാണ്...അവർ കാറ്റ് കൊള്ളുന്ന,കടലിന്റെ സൌന്ദര്യം ആസ്വദിക്കുന്ന,അസ്തമയം കാണുന്ന,അവരുടെ കാലികൾ മേയുന്ന കുന്നിൻപുറത്ത് ഒരു സുപ്രഭാതത്തിൽ ആരൊക്കെയോ വരികയും കുന്നു നെടുകെ പിളർന്ന് റോഡ് വെട്ടുകയും,ഇടിച്ച് നിരപ്പാക്കുകയും,മണ്ണ് വെട്ടിമുറിക്കപ്പേട്ട ജലസംഭരണി
കടത്തിക്കൊണ്ട് പോവുകയും ചെയ്യുക!!നമ്മെ ഭരിക്കുന്ന പഞ്ചായത്തിനോട് ചോദിക്കുമ്പോൾ കൈ മലർത്തുക, കുറച്ച് കിറുക്കന്മാർ കൂടുതൽ അന്വേഷിക്കുമ്പോൾ,ഉയർന്ന തലങ്ങളിൽ അനുമതി കൊടുത്തിട്ടുണ്ടെന്ന് പറയുക.അത് കാണിച്ച് പഞ്ചായത്തുകളിൽ നിന്ന് അനുമതി വാങ്ങുക.രാഷ്ട്രീയക്കാരെല്ലാം ഇതിനെ അനുകൂലിക്കുക.ഇതാണ് ഇപ്പോൾ നമ്മുടെ പഞ്ചായത്തീ രാജ്!...ഗ്രാമീണ ജനതയുടെ സ്വയംഭരണമാണ് പഞ്ചായത്തീരാജ് വിഭാവനം ചെയ്യുന്നത് എന്നാണ് നമ്മുടെയൊക്കെ അറിവ്...നമ്മുടെ പൊതു ഇടങ്ങൾ പണം കൊടുത്ത് ഭോഗിക്കാൻ ഒത്താശ ചെയ്ത് കൊടുത്ത്,നാടൻ ഭാഷയിൽ പറഞ്ഞാൽ ഒരു കൂട്ടിക്കൊടുപ്പ്കാരന്റെ റോളീലാണിന്ന് നമ്മുടെ അധികാരികൾ...

കണ്ണൂർ ജില്ലയിൽ എൻ.എച്ച്.17ൽ മുഴപ്പിലങ്ങാട് പഞ്ചായത്ത് ഓഫീസിന് തൊട്ട് മുൻപിലാണ് ഭൂതത്താൻ കുന്ന്.ഇത് മുഴപ്പിലങ്ങാട്,കടമ്പൂർ പഞ്ചായത്തുകളിലായി പരന്നു കിടക്കുന്നു.അലൂമിനിയം,സിലിക്ക,ഫെറിക് ഓക്സൈഡ് തുടങ്ങിയ സംയുക്തങ്ങൽ അടങ്ങിയ,ഒന്നു തൊട്ടാൽ തനിയെ അടർന്ന് വീഴുന്ന ഉറപ്പില്ലാത്ത മണ്ണാണിത്.ഈ കുന്ന് പല പ്രാവശ്യം തനിയേ കുത്തകകളുടെ ജലചൂഷണം
അടർന്ന് വീണിരുന്നു.അതിനാൽത്തന്നെ തൊട്ടു കിടക്കുന്ന താമസക്കാരെ ഒഴിപ്പിക്കണം എന്നു മുൻപ് തന്നെ ജിയോളജി വകുപ്പ് ആവശ്യപ്പെട്ടിരുന്നു.(ഏകദേശം 300ഓളം കുടുംബങ്ങൾ ഈ കുന്നിനു ചുറ്റും താമസിക്കുന്നു.)അത്രയും പരിസ്ഥിതി ദുർബ്ബലമായ ഈ പ്രദേശത്താണ് കുന്നിൻ പരപ്പിൽ ഏകദേശം 200ഓളം ആധുനിക വില്ലകൾ പണിയാൻ അനുമതി വളഞ്ഞ വഴിയിൽ ഒരു കമ്പനി നേടിയിരിക്കുന്നത്.അനുമതി നേടിയതിനു ശേഷമേ പഞ്ചായതുകൾ പൊലും വിവരങ്ങൾ അറിയുന്നുള്ളൂ!പിന്നെ അവരും അതിന് ഒത്താശ ചെയ്ത്കൊടുക്കാൻ തുടങ്ങി..ഇവിടേയും വില്ലൻ പണം തന്നെ.......കുന്നിന്മുകളിലേയ്ക്ക് ഒരു റോഡ് വെട്ടാനുള്ള അനുമതി മാത്രമേ അവർക്ക് ജില്ലാ ഭരണാധികാരികളിൽ നിന്ന് നേടേണ്ടതുണ്ടായിരുന്നുള്ളൂ...ഒരു ആർ,ഡി.ഒ.കൊടുത്തില്ല,അടുത്ത ആർ.ഡി.ഒ യെ വിശ്വസിപ്പിച്ച് നേടിയെടുത്തു..എന്നിട്ടും പരിസ്ഥിതിക്ക് കോട്ടം തട്ടാത്ത വിധത്തിൽ എന്ന ഒരു നിർദ്ദേശം അദ്ദേഹം അനുമതി പത്രത്തിൽ എഴുതിയിരുന്നു...പക്ഷെ എല്ലാ പരിസ്ഥിതിയേയും അതിലംഘിച്ച് ഇവിടെ ചെയ്തത്,ഏകദേശം 60 അടിയുള്ള ഈ കുന്ന് 10 അടി വീതിയിൽ കുത്തനെ 90*യിൽ നെടുകെ പിളർന്ന് റോഡുണ്ടാക്കുകയാണ്...ഇത് കാണാതിരിക്കാൻ വലിയ ഷീറ്റുകളിട്ട് റോഡ് മുഴുവനും മറച്ചിരുന്നു...റോഡ് വെട്ടിക്കഴിഞ്ഞ ശേഷമാണ് പരിസരവാസികൾ പോലും വിവരമറിയുന്നത്....
എന്റെ കുന്നെവിടെ?

ജില്ലാ പരിസ്ഥിതി സമിതിയുടെ ശ്രദ്ധ ഇതിൽ പതിയുന്നത് ഈ സമയത്താണ്.ഉടനെ ഒരു പഠന സംഘം സ്ഥലം സന്ദർശിക്കുകയും,ഗുരുതരാവസ്ഥ നേരിൽക്കണ്ട് നിർമ്മാണ പ്രവർത്തികൾ തടയുകയും ചെയ്തു...അതിനു മുൻപ് തന്നെ അവിടെ ഇതിനെതിരായി ഒരു കുന്നിന്റെ രക്ഷയ്ക്കായ്...
കമ്മിറ്റി നിലവിലുണ്ടായിരുന്നു.നാട്ടൂകാർ ഒന്നടങ്കം ഇവിടെ വില്ലകൾ പണിയാൻ അനുവദിക്കില്ല എന്ന് ഉറപ്പിച്ചു പറയുന്നു...വനരോദനങ്ങൾ... പക്ഷെ സംഭവിക്കേണ്ടത് സംഭവിച്ചു കഴിഞ്ഞിരുന്നു.മഴ പെയ്യാൻ തുടങ്ങിയപ്പോൾത്തന്നെ നെടുകെ പിളർന്ന കുന്ന് രണ്ട് ഭാഗത്ത് നിന്നും ഇടിഞ്ഞ് റോഡ് മുഴുവൻ മൂടിപ്പോയി.മാത്രമല്ല ഫെറസ് ഓക്സൈഡ്,അലൂമിനിയം തുടങ്ങിയ സംയുക്തങ്ങൾ അടങ്ങിയ മണ്ണ് റോഡിലേക്ക് ഒഴുകി തോടുകളും,വയലുകളും,കിണറുകളും മുഴുവൻ നിറഞ്ഞ് അവരുടെ വെള്ളവും,ഭക്ഷണവും,വായുവു വിഷലിപ്തമാക്കി..അറിയപ്പെടാത്ത പുതിയ രോഗങ്ങൾ വരുന്ന വഴികൾ..
രക്തജന്യ രോഗങ്ങൾ വന്നാലും പുതിയ പുതിയ ആശുപത്രികളും മരുന്നുകളും തേടുമെന്നല്ലാതെ ഇതാണ് കാരണമെന്ന് ഒരധികാരിയും പറയില്ല..കാസർകോഡ് എൻഡോസൾഫാൻ നമുക്ക് മറക്കാറായിട്ടില്ലല്ലൊ!!...ഇനി ഒരു പണിയും ഇവിടെ വേണ്ടെന്ന് നാട്ടുകാർ ഉറച്ച് തീരുമാനിച്ചിരിക്കുന്നു.....
നമ്മുടെ ജൈവസമ്പ്ത്തിന്റെ ഇന്നത്തെ അവസ്ഥ...

ഒരു കുന്ന് നമുക്ക് തരുന്നത് പൊതു ഇടങ്ങൾ മാത്രമല്ല, നാടിന്റെ ഭക്ഷ്യസുരക്ഷയാണ് പ്രദാനം ചെയ്യുന്നത്..താഴ്വാരത്തിലുള്ള മനുഷ്യർക്കും,വയലുകൾക്കും മാത്രമല്ല മുഴുവൻ ജൈവസമൂഹത്തിനും ജീവജലം നൽകുന്നത് കുന്നാണ്...മഴക്കാലത്ത് പെയ്യുന്ന വെള്ളം മുഴുവൻ അതിന്റെ ഗർഭപാത്രത്തിൽ സൂക്ഷിച്ച് വേനലിൽ താഴ്വാരത്തിലേക്ക് ചുരത്തിക്കൊടുക്കുന്ന പ്രകൃതിയുടെ മുലകളാണ് കുന്നുകൾ...അമ്മയുടെ മാറിടം പിളർക്കുന്നവരാണ് കുന്നിടിക്കുന്നവർ....പണത്തിനു വേണ്ടി എന്തും ചെയ്യാൻ മടിക്കാത്തവർ...കുന്നുകൾ ഇടിച്ച് നിരത്തി ചതുപ്പുകൾ നികത്തുമ്പോൾ തകരുന്നത് രണ്ട് ആവാസ വ്യവസ്ഥകളാണ്..ചതുപ്പുകൾ മാലിന്യങ്ങൾ ശുദ്ധീകരിക്കുന്ന പ്രകൃതിയുടെ വൃക്കകളാണ്...മാറിടവും,വൃക്കയും ഛേദിക്കപ്പെട്ട ഒരമ്മയെ ഓർക്കുക ,അടുത്ത കുന്ന് പിളർക്കുന്നതിന് മുൻപ്....

നമ്മുടെ ജൈവസമ്പത്തുകൾ കച്ചവടം ചെയ്യുന്നവരെ നാം തിരിച്ചറിയേണ്ടതുണ്ട്.ഇവിടെ ജൈവസമ്പത്തുകൾ സംരക്ഷിച്ച് നിലനിർത്താൻ ഒരു മാനേജ്മെന്റില്ല.തകർക്കാൻ എല്ലാവരും ഒത്തൊരുമിച്ച് ഉണ്ട് താനും...ഭാവി തലമുറയ്ക്ക് ഒരിറ്റ് തെളിനീർ,അൽ‌പ്പം കുളിർക്കാറ്റ്,ഇത്തിരി നല്ല ഭക്ഷണം എന്നിവ ബാക്കി വെയ്ക്കാൻ നമുക്കായില്ലെങ്കിൽ പിന്നെ ഈ ഭൂമിയിൽ ജീവിതത്തിന് എന്ത് പ്രതീക്ഷ?...

നാടൻ സമ്പത്തുകൾ കൊള്ളയടിക്കപ്പെടുമ്പൊൾ...

2009-07-28T17:05:00.003+05:30

ഇത് മാളുവും ശങ്കരനും.നനവിലെ പുതിയ അന്തേവാസികൾ!കേരളത്തിന്റെ തനത് കന്നുകാലി സമ്പത്തിൽ‌പ്പെടുന്ന‘കാസർകോഡൻ’ഇനത്തിൽ‌പ്പെടുന്നവരാണ് ഇവർ. കുറ്റിയറ്റ്പോയ്ക്കൊണ്ടിരിക്കുന്ന ഒരമൂല്യ സമ്പത്ത്..പ്രകൃതിജന്യമായ ഭക്ഷണം മാത്രം കഴിക്കുന്നതു കൊണ്ടുതന്നെ ഇവയുടെ ഇറച്ചിക്ക് നല്ല രുചിയാണത്രെ!അതിനാൽത്തന്നെ അവ വംശനാശ ഭീഷണിയിലുമാണ്. വിദേശക്കമ്പനികളുമായി ഒത്തു കളിച്ച്,നാടൻ കന്നുകാലി വർഗ്ഗങ്ങളെ ഇല്ലാതാക്കാൻ വേണ്ടി,മൃഗസംരക്ഷണവകുപ്പ് നാടൻ കാളകളെ പോറ്റുന്നത് നിരോധിച്ചിരിക്കുന്നു!.അഥവാ പോറ്റുന്നുണ്ടെങ്കിൽത്തന്നെ വരിയുടച്ചു കളയണമെന്നത് നിർബ്ബന്ധം!!നമ്മുടെ തനതായ പല സസ്യ-ജന്തു ജാതികളെയും-ഇല്ലാതക്കാൻ-ജീൻ പൈറസി നടത്തി വിദേശത്തേയ്ക്ക് കടത്തി പണമുണ്ടാക്കുകയും,ഇവിടെ ഹരിതവിപ്ലവും,ധവളവിപ്ലവവും നടത്തി കൈയ്യടി നേടുകയുമാണ് കൃഷിവകുപ്പിലേയും,മൃഗസംരക്ഷണ വകുപ്പിലേയും ചില മേലാളന്മാർ!!ഈ ദ്വിമുഖ തന്ത്രത്തിലൂടെ ഇവർ ചെയ്തത് എന്താണ്?അമിതമായി രാസവിഷങ്ങളും,കീടനാശിനികളും,ജലസേചനവും നടത്തി നമ്മുടെ മണ്ണിനെ കൊന്നു!ഭക്ഷണം വിഷലിപ്തമാക്കി!രോഗങ്ങൾ നിയന്ത്രിക്കാൻ ഒരു ഏജൻസിക്കും പറ്റാതായി!ഹരിതവിപ്ലവത്തിലൂടെ ഇവിടെ പാൽപ്പുഴയൊഴുക്കി!പക്ഷെ ഈ പാലിലൂടെ നമ്മൾ അകത്താക്കുന്നതു് എന്തൊക്കെയാണെന്നറിയാമോ?സ്ത്രീ വളർച്ചാ ഹോർമോണുകൾ,പശുവിന്റെ നീർ രൂപത്തിലുള്ളതെന്തും പാൽ രൂപത്തിൽ വരുത്തുന്ന ഓക്സിടോക്സിൻ,ഇതൊക്കെ നമ്മുടെ ശരീരത്തിൽ എങ്ങിനെ പ്രവർത്തിക്കും എന്നത് പടച്ചവനു് മാത്രമേ പറയാനാവൂ!! ഇതിനെതിരെ ഒരു പ്രതിരോധം എന്ന നിലയ്ക്കാണ് ഞങ്ങളിൽ പലരും ഈ അമൂല്യ സമ്പത്ത് സംരക്ഷിക്കാനായി മുന്നോട്ട് വന്നിട്ടുള്ളത്.പശുക്കൾക്ക് അവയുടെ ജന്മാവകാശമായ,പ്രകൃതിസഹജമായ രീതിയിൽ ഇണ ചേർന്ന്,കുഞ്ഞുങ്ങളെ ഉല്പാദിപ്പിക്കാനുള്ള അവകാശം തിരികെ നൽകണം എന്ന ലക്ഷ്യവും ഇതിനു പിറകിലുണ്ട്. വലിപ്പം കുറവാണ് ‘വെച്ചൂർ’പശുവിന്റെ ബന്ധുവായ കാസർകോഡന്.പാൽ അളവിൽ കുറവാണ്.ഒന്നര-4ലിറ്റർ.എന്നാൽ ഗുണമേന്മയിലിത് ശരിക്കും ഔഷധമാണ്!ഇതിന്റെ ചാണകം,മൂത്രം എന്നിവ ഒന്നാംതരം വളവും,ഔഷധവും കൂടിയാണ്!ക്രിത്രിമാഹാരങ്ങൾ തിന്നു വളരുന്ന പശുവിന്റെ ചാണകം ചാണകമല്ല,മലമാണ്..മലിനവസ്തുവാണ്.അത് നാറും.എന്നാൽ പച്ചപ്പുല്ല്,വൈക്കോൽ,കാടിവെള്ളം,കഞ്ഞിവെള്ളം,തവിട്,പച്ചക്കറി അവശിഷ്ടങ്ങൾ,പഴത്തൊലികൾ എന്നിവ തിന്നു വളരുന്ന നാടൻ പശുവിന്റെ ചാണകത്തിന് നേർത്ത സുഗന്ധ്മാണുള്ളത്!!മേയ്ക്കാൻ പറമ്പുണ്ടെങ്കിൽ ഒരു ചിലവുമില്ലാതെ ഇവ വളർന്ന്കൊള്ളും.രോഗപ്രധിരോധശേഷിയും വളരെക്കൂടുതലാണ്.ചാണകത്തിൽ ധാരാളം സൂക്ഷ്മജീവികൾ അടങ്ങിയിട്ടുണ്ട്.ഇവ മണ്ണിലെ ജൈവാവശിഷ്ടങ്ങളെ വിഘടിപ്പിച്ച് ചെടികൾക്ക് വലിച്ചെടുക്കാൻ പാകത്തിലാക്കി മാറ്റുന്നു.ക്രിത്രിമാഹാരങ്ങൾ തിന്നു വളരുന്ന പശുവിന്റെ ചാണകത്തിൽ 1ഗ്രാമിൽ ഏകദേശം200ഓളം സൂക്ഷ്മജീവികളുണ്ടാകുമെങ്കിൽ നാടൻ ചാണകത്തിൽ ഇത് 200000ത്തിലേറെയാണ്!!! ഹരിത വിപ്ലവം നമ്മുടെ നാടൻ വിത്തുകളെയും,കൃഷിയിടങ്ങളേയും,നമ്മുടെ ആരോഗ്യത്തേയും എങ്ങിനെ നശിപ്പിച്ചുവോ..അതുപോലെ ധവള വിപ്ലവം നമ്മുടെ നാടൻ കന്നുകാലികളെയും നശിപ്പിച്ചു!!മണ്ണിനേയും,നാടൻ വിത്തുകളേയും,കന്നുകാലികളേയും വീണ്ടെടുക്കുക എന്നത് ഒരു യുദ്ധസമാന പ്രവൃത്തിയാണ്. ജൈവകൃഷി മാത്രമാണ് പോംവഴി...വിത്തുകൾ സ്വയം സൂക്ഷിക്കുകയും,പങ്കുവെയ്ക്കുകയും ചെയ്യുക. വിത്തിന്നധികാരി കർഷകൻ മാത്രം... അല്ലാതെ കുത്തകകളോ കൃഷി വകുപ്പൊ അല്ല... ഈ ജീർണിച്ച പണാധിഷ്ടിത വ്യവസ്ഥയൊടു തന്നെ കലഹിക്കേണ്ടിവരും.ചിലപ്പോൾ നമ്മുടെ നിലനിൽ‌പ്പ് തന്നെ അവതാളത്തിലാകും.കാരണം ഇതിന്റെയൊക്കെ കടിഞ്ഞാണുകൾ ആഗോള ഭീമന്മാരുടെ കൈകളിലാണ് എന്നത് തന്നെ!പക്ഷെ ജൈവികമായി ജീവിക്കുക എന്നാൽ സ്വതന്ത്രരാവുകയും,നിർഭയരാവുകയും ചെയ്യുക എന്നതാണ്!അത് അനുഭവിച്ച് തന്നെ അറിയണം........

ഐസ്ക്രീം പാർലറുകളും ബേക്കറികളും ആശുപത്രിയിലേക്കുള്ള റിക്രൂട്ടിങ് ഏജൻസികൾ

2009-03-12T16:44:00.003+05:30

ഇന്ന് നാം അറിയപ്പെടാത്ത പല രോഗങ്ങളുടെയും പിടിയിലാണ്.ആധുനിക വൈദ്യശാസ്ത്രമാകട്ടെ നമ്മുടെ ശരീരത്തെ അവരുടെ പരീക്ഷണശാലയുമാക്കുന്നു.വ്യത്യസ്തമായ വിഷരാസവസ്തുക്കൾ നമ്മുടെ ശരീരത്തിൽ പരീക്ഷിക്കുകയും ശരീരത്തിന്റെ പ്രതികരണങ്ങൾ പഠിച്ച് മരുന്ന് ലോബിക്ക് റിപ്പോർട്ട് ചെയ്യുകയണ് നമ്മുടെ മിക്ക ഡോക്ടർമാരും!ഈ രാസവിഷങ്ങൾ ശരീരത്തിൽ എങ്ങിനെ പ്രവർത്തിക്കുന്നു,അതിന്റെ പ്രതാഘാതങ്ങൾ എന്ത് എന്നൊന്നും അവർ ആലോചിക്കാറില്ല.സ്ഥിരമായി രാസവിഷഗുളികകൾ കഴിച്ചാൽ വൃക്കകൾ തകരാറിലാവും എന്ന് ഏത് കണ്ണ്പൊട്ടനും മനസ്സിലാവുമെങ്കിലും പറയില്ല.കാരണം കറവപ്പശുക്കൾ ഇഷ്ടം പോലെ വിഹരിക്കുമ്പോൾ കറക്കാനറിയാത്തവർ വിഡ്ഡികളാണല്ലോ?ആശുപത്രികൾ പെരുകുകയാണു് അതോടൊപ്പം രോഗങ്ങളും!!ഈ വൈരുധ്യത്തെ വിചിന്തനം ചെയ്യുമ്പോൾ നിങ്ങൾക്ക് വികസനത്തിന്റെയും പണത്തിന്റെയും ഉള്ള്കള്ളികൾ ബോധ്യപ്പെടും!അത് പോട്ടെ,നമ്മുടെ ശ്രദ്ധയിൽപ്പെടാത്ത മറ്റൊരു കാര്യമുണ്ട്.ആശുപ്ത്രികൾ പെരുകുന്നതോടൊപ്പം ബേക്കറികളും,ഐസ്ക്രീം പാർലറുകളും പെരുകുന്നു!!തടിച്ചുകൊഴുക്കുന്നു! ആശുപത്രിയിലേക്കുള്ള റിക്രൂട്ടിങ്ങ് ഏജൻസികൾ എന്ന നിലയിലേയ്ക്ക് അത് വളർന്നിട്ടുണ്ട് എന്നതാണ് സൂക്ഷ്മനിരീക്ഷണത്തിൽ നമുക്ക് കാണാൻ കഴിയുന്നത്....

ഇന്നത്തെ ഭക്ഷണശീലം കേരളീയരെ രൊഗികളാക്കിക്കൊണ്ടീരിക്കുന്നു.ബേക്കറി,ഐസ്ക്രീമുകൾ അവരുടെ സ്ഥിരം ഭക്ഷണ മെനുവാണിന്ന്! മുമ്പൊക്കെ കുട്ടികൾ വാശി പിടിച്ച് കരയുമ്പോൾ വല്ലപ്പോഴും വാങ്ങിക്കൊടുക്കുന്ന ഒരപൂർവ്വ വസ്തുവായിരുന്നു ഐസ്ക്രീം.ഇന്ന് കുട്ടികൾ മാത്രമല്ല ഒരു പാർട്ടിയിൽ ലഞ്ചോ,ഡിന്നറോ കഴിഞ്ഞാൽ ഐസ്ക്രീം മുതിർന്നവർക്കും നിർബ്ബന്ധമാണ്..!
ഇനി ഈ ഐസ്ക്രീം എങ്ങിനെയാണ് ഉണ്ടാക്കുന്നത് എന്ന് നമുക്ക് നോക്കാം.ഈ വിലകൂടിയ വിഭവത്തിൽ 55% വെറും വായുവാണ്.30%പച്ചവെള്ളവും,ബാക്കി8%പഞ്ചസാരയും,6%കൊഴുപ്പും കൂടാതെ രുചിക്കും,നിറത്തിനും,മണത്തിനും,മയത്തിനും, വേണ്ടി ചേർക്കുന്ന രാസവിഷപദാർഥങ്ങളും.മുകളിൽ‌പ്പറഞ്ഞ ചേരുവകൾ രുചികരമായ ഐസ്ക്രീമായി വരുന്നതെങ്ങിനെയെന്നറിഞ്ഞാൽ ഓക്കാനം വരും-കേട്ട് കൊള്ളുക.ആദ്യമായി കൊഴുപ്പിനെ റബ്ബർ പൊലെ മുറുക്കമുള്ള പദാർഥമാക്കി മാറ്റുന്നു.കൂടുതൽ വായുകുമിളകളെ ഉൾക്കൊള്ളാനാണ് ഇത്.ശീതീകരിച്ച് മുറിയിൽ വച്ചാണ് ഇത് ചെയ്യുന്നത്.അടുത്തതായി വായുകലർന്ന കൊഴുപ്പിനെ ക്രീമായി മാറ്റുന്നതിന് ചില സാധനങ്ങൾ ചേർക്കുന്നു.ഇതിൽ പ്രധാനം ഒരു പശയാണ്(ജലാറ്റിൻ).ഇറ്ച്ചിക്കായി ജന്തുക്കളെ അറക്കുമ്പോൾ ഭക്ഷ്യയോഗ്യമല്ലാതെ മാറ്റിവെയ്ക്കുന്ന കുടൽമാല,മൂക്ക്,ചെവി,അകിട്,വാൽ മുതലായവ തിളപ്പിച്ച് കുറുക്കിയെടുക്കുന്നതാണ് ഈ പശ!!!ഈ സാധനമാണ് ഐസ്ക്രീം നാവിന്റെ തുമ്പത്ത് തൊടുമ്പോഴേക്കും വായിൽ മുഴുവൻ പടർന്ന് സുന്ദരമായി അലിയിപ്പിക്കുന്നത്!ഐസ്ക്രീം കഴിച്ചവരെല്ലാം ഈ പരമാനന്ദസുഖം അനുഭവിച്ചുകാണും!!എല്ലാവരും വിചാരിക്കുന്നത് പോലെ ഈ സാധനം ശുദ്ധ വെജിറ്റേറിയനല്ല എന്ന് ഇപ്പോൾ മനസ്സിലായല്ലൊ!..കൂടാതെ തുണികൾക്കും,പ്ലാസ്റ്റിക്കിനും,റബ്ബറിനും നിറവും,ബലവും നൽകാനുള്ള കുറെ വിഷരാസവസ്തുക്കളും കൂടിയാവുമ്പോൾ ചിത്രം പൂർത്തിയായി!!..ഉദാ:-ചെറിയുടെ മണമുണ്ടാക്കാൻ ആൽഡിഹൈഡ് എന്ന രാസവസ്തു ഉപയോഗിക്കുന്നു.ഇത് പ്ലാസ്റ്റിക്,റബ്ബർ എന്നിവയ്ക്ക് നിറം നൽകാൻ ഉപയോഗിക്കുന്ന രാസവിഷമാണ്!..കൈതച്ചക്കയുടെ മണമുണ്ടാക്കുന്ന ഈതൈൽ അസിറ്റേറ്റ് തൊലും തുണിയും വൃത്തിയാക്കാൻ ഉപയോഗിക്കുന്നു!വാനിലയുടെ മണമുണ്ടാക്കുന്ന്ത് പെപ്പറോണൽ എന്ന പേൻ സംഹാരിയാണ്!..ചുരുക്കത്തിൽ ഇന്നത്തെ കേരളീയന്റെ സമ്പന്നമായ വിഭവം പേൻസംഹാരി,ചായങ്ങൾ,പശ,പച്ചവെള്ളം,കൂടാതെ കുറെ വാ....യുവും!! രസം തന്നെയല്ലെ?
ഇനി ബേക്കറിയുടെ കാര്യം.മൈദയാണ് ബേക്കറിയിലെ രാജാവ്.ഗോതമ്പ് ഒരു സന്തുലിത ഭക്ഷണമാണ്.പക്ഷെ അതിന്റെ നല്ല ഭാഗങ്ങൾ മുഴുവൻ ഊറ്റിയെടുത്ത ശേഷം കിട്ടുന്ന പശക്ക് മാത്രം ഉപയോഗിച്ചിരുന്ന വസ്തുവാണ് മൈദ!!..ബേക്കറികളിൽ ബ്രഡ് ഉണ്ടാക്കുമ്പോൾ മൈദയിൽ ഒരുപാട് രാസവിഷവസ്തുക്കൾ ചേർക്കുന്നുണ്ട്.നിറത്തിനും ,കട്ടപിടിക്കാതിരിക്കാനുമായി,ബെൻസോയിൽ പെറോക്സൈഡ് ,ക്ലോറിൻ,ക്ലോറിൻ ഡൈ ഓക്സൈഡ് തുടങ്ങിയവ ഉപയോഗിച്ച് ബ്ലീച്ച് ചെയ്യുന്നു.ഈ രാസവിഷങ്ങൾ ആസ്ത്മ,മൈഗ്രേൻ എന്നിവയെ ഉത്തേജിപ്പിക്കുന്നവയാണ്!!..റൊട്ടി നന്നായി പൊങ്ങിവരാനായി യീസ്റ്റിന്റെ കൂടെ പൊട്ടാസ്യം ബ്രോമേറ്റ്,കാത്സ്യം സൾഫേറ്റ് തുടങ്ങിയവ ചേർക്കുന്നു.പൊട്ടാസ്യം ബ്രോമേറ്റ് ക്യാൻസറിന് കാരണക്കാരൻ എന്നു അസന്നിഗ്ദ്ധമായി തെളിഞ്ഞതിനാൽ 1989മുതൽ തന്നെ മിക്ക ഒന്നാം ലോക രാഷ്ട്രങ്ങളും നിരോധിച്ചതാണ്!..പക്ഷെ ഇവിടെ ഇപ്പോഴും സുലഭമായി ഉപയോഗിച്ചു വരുന്നു.കൂടാതെ മൈദയ്ക്ക് രുചിയും,ഗുണവും,മയവും കൂട്ടാൻ അലക്സാൻ എന്ന രാസവിഷം കൂടി ചേർക്കുന്നു.ഇത് മനുഷ്യന് മരുന്നുണ്ടാക്കാൻ വേണ്ടി പരീക്ഷണം നടത്തുന്ന ഗിനിപ്പന്നികളിൽ പ്രമേഹരോഗം ഉണ്ടാക്കുവാൻ കുത്തിവെക്കുന്ന രാസവസ്തുവാണ്!!..അതിനാൽ മൈദ സ്ഥിരമായി ഉപയോഗിച്ചാൽ പ്രമേഹം ഉറപ്പ്........കൂടാതെ മൈദയിൽ ഭക്ഷ്യയോഗ്യമായ യാതൊന്നും തന്നെയില്ല.ഫൈബർ തീരെ ഇല്ലത്തതിനാൽ ഇത് ചെറുകുടലിലൂടെ സുഗമമായി ചലിക്കില്ല.മലാശയത്തിൽ നിന്നും പുറത്ത് പോകുവാൻ ബലം പ്രയോഗിക്കേണ്ടി വരുന്നതിനാൽ അവിടുത്തെ പേശികളുടെ ഇലാസ്തികത നശിക്കുകയും,രക്ത്ക്കുഴലുകൾ പൊട്ടുകയും അർശസ്സ്,ഭഗന്തരം,മൂലക്കുരു തുടങ്ങിയ രോഗങ്ങൾ ഉണ്ടാവുകയും ചെയ്യുന്നു.മലബന്ധം സ്ഥിരമാവുമ്പോൾ എല്ലാ രോഗങ്ങളും നമ്മളെ ആക്രമിച്ചു തുടങ്ങും.കാരണം ഏറ്റവും കൂടുതൽ മാലിന്യങ്ങൾ പുറത്തേക്ക് പോകുന്നത് മലത്തിലൂടെയാണ്.അതാത് ദിവസത്തെ ഉപാപചയ പ്രവർത്തനങ്ങളിലൂടെ ഉണ്ടാവുന്ന മാലിന്യങ്ങൾ അതാത് ദിവസം തന്നെ പുറത്ത് പോയില്ലെങ്കിൽ രോഗം സുനിശ്ചിതമാണ്....രോഗം എന്നത് നമ്മുടെ ശരീരം രോഗാണുക്കൾക്ക് വിഹരിക്കാൻ പാകത്തിൽ മലിനമാകുമ്പോൾ ശുചിയാക്കാൻ ശരീരം തന്നെ വരുത്തുന്ന സുരക്ഷാ സംവിധാനമാണ്!!..ബാഹ്യമായും, ആന്തരികമായും ശുചിയായിരിക്കുക എന്നതാണ് രോഗത്തെ അകറ്റാൻ ഒരേ ഒരു പോംവഴി.അല്ലാതെ ഉള്ളിലെ മാലിന്യങ്ങൾ പുറന്തള്ളാൻ ബാഹ്യമായി വീണ്ടും വിഷം അടിച്ചേൽപ്പിക്കുകയല്ല.....!

മദ്യം കേരളത്തിന്റെ ദേശീയ പാനീയമാക്കണം

2009-02-03T13:44:00.001+05:30

ഒരു ദിവസം 40കോടി രൂപ കേരളത്തിൽ മദ്യത്തിലൂടെ വരുമാനം ലഭിക്കുന്നു.സഖാവ് പറഞ്ഞത് പോലെ ഈ അവസരം നമ്മൾ ഒരിക്കലും കളഞ്ഞുകുളിക്കരുത്.ഇവിടെ ഈ വ്യവസായത്തിനു വൻ സാധ്യതയാണ്.ഈ വരുമാനം പ്രതിദിനം 100കോടിയെങ്കിലും എത്തിക്കേണ്ടതുണ്ട്.അതിനാൽ ഇനിമുതൽ തൊഴിലുറപ്പ് പദ്ധ്തിയിലൂടെ നമുക്ക് വാറ്റൽ കേന്ദ്രങ്ങൾ തുടങ്ങുകയും,പുറത്തുനിന്നും വരുന്ന മദ്യത്തിനു് പകരം ഇവിടെ ഉല്പാദിപ്പിക്കുകയും ചെയ്ത് ലാഭം കൂട്ടാവുന്നതുമാണ്.കൂടാതെ നമ്മുടെ കള്ള് വിറ്റ് ലഭിക്കുന്ന വരുമാനത്തിന്റെ ഭൂരിഭാഗവും സർക്കാർ ജീവനക്കാർക്ക് ശമ്പളമായി കൊടുക്കുകയാണ്.അതിനാൽ ഇനി അവർക്ക് ശമ്പളം കൊടുക്കുമ്പോൾ5കുപ്പി വീതം മദ്യം നിർബ്ബ്ന്ധമായും സൌജന്യ നിരക്കിൽ നൽകേണ്ടതാണ്.മദ്യം ഉപയോഗിക്കാത്ത ‘മന്ദബുദ്ധി’കൾക്ക് ഡി-പ്രമോഷൻ നൽകി മാതൃകാപരമായി ശിക്ഷിക്കേണ്ടതാണ്.
എന്തിന് മദ്യം മാത്രമാക്കുന്നു? ചിരപുരാതനമായ ആ തൊഴിലുണ്ടല്ലൊ?....ലൈംഗിക സദാചാരമില്ലാത്ത മലയാളിയുടെ കാമദാരിദ്ര്യം മാറിക്കിട്ടുകയും ചെയ്യും!......നമുക്ക് കുന്നുകളിടിച്ച് വയലുകൾ നികത്തി വാറ്റ് കേന്ദ്രങ്ങളും,വേശ്യാലയങ്ങളും,ഫ്ലാറ്റുകളും പണിയാം!...കൂടെ കുറെ സഹകരണ ആശുപത്രികളും,‘വിസ്മയ‘ങ്ങളുമാകാം!..യുവാക്കൾ ഹരം കൊള്ളട്ടെ!..നാട് വികസനത്തിന്റെ കൊടുമുടി കയറട്ടെ!..സുഖങ്ങൾ വിറ്റ് വോട്ട്പെട്ടികൾ നിറയട്ടെ!...കൂടുതൽ വൈവിധ്യമുള്ള സുഖങ്ങൾക്കായി ഇതാ ഒരു വോട്ട്..! സ്വീകരിച്ചാലും!........

ജോൺസി മാഷ് പ്രകൃതിയിലേക്ക് മടങ്ങി........

2008-10-11T07:37:00.002+05:30

കെരളത്തിലെ പരിസ്ഥിതി പ്രസ്ഥാനങ്ങളുടെ പിതാവായ ജോൺസി ജേക്കബ് അന്തരിച്ചു....അദ്ദേഹത്തിന്റെ പാദങ്ങളിൽ ഒരു പിടി കണ്ണീർപ്പൂക്കൾ............

ഒരരിമണിയിലെ അറിവ്

2008-10-03T16:07:00.010+05:30

ഒരരിമണി......അതിലെന്തിരിക്കുന്നു! നിസ്സാരമായ ഒരു കുഞ്ഞുമണി.വയലിൽ കൊയ്യുമ്പൊൾ നൂറായിരം മണികൾ ഉതിർന്ന് വീഴുന്നു.കടയിലെ ചാക്ക് തുളച്ച് പുറത്തേക്കോടുന്ന അരിമണികളെ പിടികൂടി, ഉറുമ്പുകൾ വർഷകാല ധാന്യക്കലവറയിലേക്ക് കടത്തുന്നു.അമ്മ കഴുകി മറിക്കുന്ന വെള്ളത്തിൽ വെറുതെ ഒഴുകിമറയുന്ന ഒരരിമണി.......
കൊയ്യുമ്പോഴുണ്ണുമ്പോൾ പാത്രം കഴുകുമ്പോഴൊക്കെ നാം കാണാതെ ഒഴുക്കിക്കളഞ്ഞ അരിമണികൾ....മലയാളി അതിന്റെ വിലയറിഞ്ഞിരുന്നില്ല.ഇന്നു മാർക്കറ്റിൽ തൊട്ടാൽ കൈ പൊള്ളിക്കുന്ന വിലയായിട്ടും,നാളെ ജീവിതം തന്നെ എത്ര പൊള്ളുന്ന വില കൊടുത്താലുമത് കിട്ടില്ലെന്നയവസ്ഥയിലേക്കാണ് പോകുന്നതെന്നിരിക്കിലും അവനതിന്റെ വില മനസ്സിലാക്കിയിട്ടില്ല.നമുക്കിന്നും യാചകരായി നടക്കുന്നതാണ് ഗമ...!തീ വില കൊടുത്തു വാങ്ങുന്ന സന്തുലിതമല്ലാത്ത അരിമണികൾ ഭക്ഷിച്ച് രൊഗികളായിത്തീരാനും നമുക്ക് മടിയേതുമില്ല.സമഗ്രവും സന്തുലിതവും അറിവുള്ളതുമായ അരിമണികൾ വിളയിക്കാവുന്ന പാടങ്ങൾ ഇപ്പോഴും അത്യാവശ്യമൊക്കെ ബാക്കിയായിട്ടുണ്ടെന്നിരിക്കിലും,ആ വയലിനെ വയലാക്കുന്ന കുന്നിനെ ഇടിച്ചു നിരത്തി അവിടേയും,ആ മണ്ണ് കോരിക്കടത്തി വയൽ നികത്തി അവിടെയും അപ്പാർട്ട്മെന്റുകൾ പണിതുയർത്തി,പണം കൊയ്ത് മലയാളി എവിടെയാണ് തന്റെ കഴുത്ത് കൊണ്ട് വച്ചിരിക്കുന്നത്,മരണക്കുരുക്കിലല്ലാതെ....
അറിവുള്ള ഒരു അരിമണി....അത് പ്രകൃതിയിലെ ഒരു സമഗ്രരൂപമണ്.അതിനെ അറിഞ്ഞാൽമതി നിങ്ങൾക്ക് പ്രകൃതിയെ അറിയാൻ,മണ്ണിനേയും ജലത്തെയും അറിയാൻ,ജീവനെയറിയാൻ....പ്രകൃതി ഒരു അരിമണിയുണ്ടാക്കിയിരിക്കുന്നത് ഒരു സന്തുലിത രൂപമായിട്ടാണ്.അതിൽ അന്നജവും മാംസ്യവും ധാതുലവണങ്ങളും വിറ്റാമിനുകളും ഊർജ്ജവുമൊക്കെ സമഗ്രതയിലാണ് ചേർത്തിരിക്കുന്നത്.ഈ ചേരുവ മനുഷ്യനിന്നുവരെ ഉണ്ടാക്കാനായിട്ടില്ല.അതവന് ഒരിക്കലും ഉണ്ടാക്കാനാകുന്നതുമല്ല.
നമുക്ക് ഒരു ലക്ഷ്ത്തിലേറെയിനം അരിമണികൾ ഉണ്ടായിരുന്നു.ഒക്കെ എങ്ങോ നാടുകടന്നു.നമുക്ക് സമ്പന്നമായ ഒരു കാർഷിക വ്യവസ്ഥയും,കാർഷിക അറിവുകളുമുണ്ടായിരുന്നു.ഒക്കെ നമ്മൾ കൈമോശപ്പെടുത്തി.ഓരോഅരിമണിയുടേയും ഘടന വ്യത്യസ്തമാണെന്ന് പഴമക്കാർക്കറിയാമായിരുന്നു.വേനൽക്കാലത്ത് വിളയുന്ന അരിമണിയും മഴയേറ്റ് വളരുന്ന അരിമണിയും ഊർജ്ജത്തിന്റെ കാര്യത്തിൽ തീർത്തും വ്യത്യസ്തമായിരിക്കും.കിഴി വെക്കാനുപയോഗിക്കുന്ന നവരക്ക് ഞരമ്പുകളിലെ രക്തയോട്ടം വർദ്ധിപ്പിക്കാനാവുമത്രെ!...എന്നാൽ കയമ കൊണ്ടാരും കിഴി വെക്കാറില്ല.അതൊരു ഗുണവും ചെയ്യില്ല.കയമ കൊണ്ട് നമുക്ക് വേനൽക്കാലത്ത് ചോറ്വച്ചുണ്ണാം.ഔഷധഗുണമുളതല്ലേയെന്നു വിചാരിച്ച് നവരച്ചോറാണു് നിങ്ങൾ വേനൽക്കാലത്ത് തിന്നുന്നതെങ്കിൽ നിങ്ങൾ വിയർത്ത് കുളിക്കും.കാരണം സൂര്യനിൽ നിന്നുമതിൽ അത്രയേറെ ഊർജ്ജം സംഭരിച്ച് വച്ചിട്ടുണ്ട്.ചൂട് ക്രമീകരിക്കാൻ വെള്ളം ചേർത്തു കഞ്ഞിയാക്കി വേണം പുഞ്ചയരികൾ വേനൽക്കാലത്തുപയോഗിക്കേണ്ടത്. കർക്കിടകത്തിലരിയാണ് ചോറിനുത്തമം.ശരീരമപ്പോൾ ചൂട് പിടിക്കുകയാണല്ലോ വേണ്ടത്......
ഊർജ്ജത്തിന്റെ കാര്യത്തിൽ മാത്രമല്ല,മറ്റു ഘടകങ്ങളുടെ കാര്യത്തിലും ഒരൊ അരിമണിയും വ്യത്യസ്തമായിരിക്കും.ഈ സ്വാഭാവിക ചേരുവകൾ മാറ്റി നമ്മൾ സങ്കരവിത്തുകൾ ഉണ്ടാക്കുമ്പോൾ അവ അപകടകരമാംവിധം അസന്തുലിതമായിരിക്കും.നാം മേന്മ പറഞ്ഞു നടക്കുന്ന എല്ലാ പുത്തൻ വിത്തിനങ്ങളും അസന്തുലിതങ്ങളാണ്.പണ്ടുണ്ടായിരുന്നവർക്ക് എൺപതാം വയസ്സിലും ഓടിച്ചാടി പണിയെടുക്കാനായിരുന്നെങ്കിൽ അതിനു കാരണം അവർ കഴിച്ചിരുന്ന സന്തുലിതാഹാരം തന്നെയാണ്.....
നമ്മൾ സ്വാഭാവിക വിത്തിനങ്ങളിൽ നിന്നും ലഭിക്കുന്ന ഒരു അരിമണിയാണ് ഭക്ഷണമാക്കുന്നതെന്നിരിക്കിലും,അതിലെ അന്നജത്തെ ശരീരത്തോട് സ്വാഭാവികമായി ചേർക്കാനാവശ്യമായ പ്രോട്ടീനും അയഡിനുമൊക്കെയടങ്ങിയ തവിട് വെളുപ്പിച്ചിട്ടാണുപയോഗിക്കുന്നതെങ്കിൽ,ഡബിൾ ബോയിൽ ചെയ്ത്,തിളക്കം നൽകിയ പൊട്ടാത്ത അരിമണിയാണുപയോഗിക്കുന്നതെങ്കിൽ നമുക്കാരോഗ്യമല്ല,പ്രമേഹവും, ചിക്കുൻഗുനിയയുമാണുണ്ടാകാൻ പോകുന്നത്.കേരളത്തിൽ കുട്ടികൾക്കു വരെ പ്രമേഹ രോഗം വന്നു തുടങ്ങിയതിന് കാരണം തവിട് കളഞ്ഞ ധാന്യങ്ങൾ ഭക്ഷിക്കുന്നത് തന്നെയാണ്.നമ്മളെന്തിനാണിങ്ങനെ കുത്തക മരുന്നു കമ്പനികളെ തടിച്ചു കൊഴുപ്പിക്കുന്നത്.?..
പ്രകൃതിയിലെ എല്ലാ വസ്തുക്കളിലും ഷഡ്‌രസങ്ങൾ ഉണ്ടല്ലോ.അവയുടെ അനുപാതം വ്യത്യസ്തമായിരിക്കും എന്നുമാത്രം.അരിയിലെ കയ്പും ചവർപ്പും അതിലെ തവിടിലാണുള്ളത്.അത് നമുക്ക് ലഭിച്ചേ തീരൂ...തവിടധികമുള്ള കയമയും ഓടക്കയമയും മറ്റുമുണ്ട്,നാമവയെ എന്നേ ഓടയിലെറിഞ്ഞു കളഞ്ഞു...നല്ലതറിയുമോ വല്ലതുമറിയുമോ നമുക്ക്......?
തവിട് കളയാത്ത,സ്വാഭാവിക നെല്ലിന്റെ അരി,അതെപ്പോഴും സന്തുലിതമായിരിക്കുമോ?മണ്ണ് സന്തുലിതമല്ലെങ്കിൽ,അതിനാവശ്യമായതെല്ലാം ആവശ്യമായയളവിൽ മണ്ണിൽ നിന്നും ലഭിച്ചിട്ടില്ലെങ്കിൽ ആ അരിമണി നമ്മെ സന്തുലിതമാക്കുമോ?..രാസവളമിട്ട മണ്ണ് നൂറ് ശതമാനവും അസന്തുലിതമാകയാൽ,വേണ്ടത്ര ഷഡ്‌രസങ്ങൾ ലഭിക്കേണ്ട ജൈവാംശങ്ങൾ നമ്മളാ മണ്ണിൽ നെൽച്ചെടീയുടെ കുരുന്നു വേരുകൾക്ക് സ്വീകരിക്കാനാവും വിധം നൽകിയിട്ടില്ലെങ്കിൽ,ആ മണ്ണിൽ വിളയുന്ന അരിമണിയും അസന്തുലിതമായിരിക്കും.പ്രകൃതിജീവനം നയിക്കണമെങ്കിൽ നിങ്ങൾ ജൈവകൃഷി നടത്തുക തന്നെ ചെയ്യേണ്ടി വരും...
പരദേശിയായ ഒരരിമണിയോ?..നമ്മുടെ കാലാവസ്ഥയെപ്പറ്റി അതിനറിവില്ല.ജൈവകൃഷിയിലൂടെ വന്നതായാലും നമുക്കത് ഹിതകരമാവില്ല.പരദേശിവിത്തുകൾ കുഷ്ഠരോഗമുണ്ടാക്കും എന്ന് പതിമൂന്നാം നൂറ്റാണ്ടിൽ’കൃഷ്ണഗീത’ക്കാരൻ പറഞ്ഞിട്ടുണ്ടത്രെ...അവയിലടങ്ങിയ ഊർജ്ജ്ത്തിന്റെ അളവ് നമുക്ക് യോജിച്ചതല്ലല്ലോ....
ഒരരിമണി....അതിൽ ഒരുപാട് അറിവുകൾ ഇനിയുമുണ്ട്.നമ്മളുണ്ടാക്കിയ സങ്കരയിനം വിത്തുകൾ,അല്ലെങ്കിൽ പരദേശി വിത്തുകൾ...അവ അൾപം നനഞാൽ മുളക്കും.എപ്പോൾ മുളക്കണമെന്ന അറിവ് അവയ്ക്കില്ല.എന്നാൽ ചിറ്റേനി പോലുള്ള നാടൻ വിത്തുകൾ.....എപ്പോഴാണ് മുളക്കേണ്ടതെന്നറിവുള്ള വിത്തുകൾ...അവ പെട്ടെന്നങ്ങിനെ മുളക്കില്ലത്രെ.അസമയത്ത് വെള്ളപ്പൊക്കം വന്നാൽ പോലും അതിജീവിക്കും..അന്തരീക്ഷം ചൂട് കൂടുമ്പോഴോ?...ചൂട് നാൽപ്പത് ഡിഗ്രിയിലും കടന്നാൽ അരിമണിയിലെന്നല്ല ഒന്നിലും പരാഗണവും നടക്കില്ലത്രെ....മണ്ണിൽ അമിതമായ തോതിൽ രാസനൈട്രജൻ ചേർത്ത് ചിക്കുൻ‌ഗുനിയ ഉണ്ടാക്കുന്നയരിമണിയുണ്ടാക്കാതെ,ഡബിൾ ബോയിൽ ചെയ്യാതെ,പുഴുങ്ങുമ്പോൾ തെല്ലും പൊട്ടാതെ തിളങ്ങുന്നയരിമണി കിട്ടാൻ യൂറിയ ചേറ്ക്കാതെ,വെന്ത്മലരാത്ത അരികൊണ്ട്-ഒരല്പം പൊട്ടിയാലും കുഴപ്പമില്ല-തവിട് മുഴുവൻ കളയാത്ത ഇളമ്പുഴുക്കലരി കൊണ്ട് അല്ലെങ്കിൽ പച്ചരികൊണ്ട് ഉണ്ടാക്കുന്ന ചോറും കഞ്ഞിയുമാണ് നമുക്കുത്തമം.
അരിമണിക്കൊരു കണക്ക് കൂടിയുണ്ട്.അതിന്റെ(ധ്യാന്യമണിയുടെ)തവിടും തൊട്ടടുത്തുള്ള ഭാഗങ്ങളും എടുത്ത് പഞ്ചനക്ഷത്ര ഹോട്ടലുകളിൽ വിലകൂടിയ ഭക്ഷണമായി വിളമ്പുന്നു...രണ്ടാം ഗ്രേഡ് അവശിഷ്ടങ്ങൾ സാധാരണക്കാർക്ക് ലഭിക്കുന്നു.മൂന്നാം ഗ്രേഡും കഴിഞ്ഞ് നാലാം ഗ്രേഡാണ് മൈദ.മൈദ ചേർത്ത ഏതാഹാരവും അതുകൊണ്ടാണ് പ്രമേഹമുണ്ടാക്കുന്നത്.ഈ ഗ്രേഡ് തന്നെ അരി പൊടിച്ച് പലഹാരപ്പൊടികളുണ്ടാക്കി,പായ്ക്കറ്റിലാക്കി വിറ്റാൽ നൂറ് ഗ്രാമിന് പത്തും പതിനഞ്ചും രൂപ വാങ്ങാം.അതിൽ പിന്നേയും കാത്സ്യമോ,വിറ്റാമിനൊ,അയഡിനൊ മറ്റോ ചേർത്തിട്ടുണ്ടെന്നും പറഞ്ഞാൽ വില പിന്നെയും കൂട്ടാം.....ഇങ്ങനെയാണ് മൂല്യവർദ്ധന ഉൽപ്പന്നങ്ങളുടെ വിളയാട്ടം!!..അരിമണിക്ക് അതിലെ ചേരുവകൾ തന്നെയുണ്ടായാലേ അത് സന്തുലിതമാകു...അപ്പോഴേ നമ്മുടെ ദഹന വ്യവസ്തക്കനുയോജ്യമാവൂ!.മറ്റു വസ്തുക്കളിൽ നിന്ന് എന്തെടുത്ത് ചേർത്താലും അതൊരിക്കലും സന്തുലിതമാകില്ല
ഒരരിമണി...... അതെത്രമാത്രം അറിവുള്ളതാണ്.അന്വേഷിച്ച് ചെന്നാൽ ഇനിയും ഒരുപാടറിയാനുണ്ടതിനെ....അതറിഞ്ഞു ജീവിച്ചാൽ മനസ്സും ശരീരവും സന്തുലിതമായിരിക്കും.അവരുടെ ജീവിതം സന്തുഷ്ടവും,സംതൃപ്തവും,ശാന്തി നിറഞ്ഞതുമായിരിക്കും.അത്ര മഹത്തായതാണ് ഒരു കുഞ്ഞരിമണി!!....

വിത്തോ മുത്തോ...?

2008-10-02T14:03:00.002+05:30

ഇതോ മനുഷ്യാ....നിന്റെ നീതി!!!.

2008-09-27T18:35:00.010+05:30

തലശ്ശേരി കടപ്പുറത്ത്‌ വച്ച്‌ 23-9-08ന് പിടിച്ച്‌ കൊന്നു വിറ്റ പുള്ളിയൻ സ്രാവ്‌ അന്യം നിന്നുകൊണ്ടിരിക്കുന്ന ഒരപൂർവ്വ ജീവ ജാതിയാണ്.13.6ടൺ വരെ തൂക്കം വെക്കുന്ന ഈ അതി മനോഹര ജീവിക്ക്‌ 1500 മീറ്റർ ആഴത്തിൽ വരെ മുങ്ങാൻ കഴിയും.ഒരദ്ഭുത കപ്പൽ പോലെ കടലിലൂടെ നീന്തുന്ന പുള്ളിയൻ സ്രാവിന്റെ അത്യപൂർവ്വ കാഴ്ച്ച കാണാൻ അതിഭാഗ്യം തന്നെ വേണം.എന്നിട്ടും........ഹാ! കണ്ടപ്പോൾ കൊല്ലുകയല്ലെ ചെയ്തത്‌.! തിന്നാനുപയോഗിക്കാത്ത മാംസം ഉണക്കി വിൽക്കുകയല്ലെ ചെയ്തത്‌!!
വായ തുറന്നാൽ ഒന്നര മീറ്റർ വരെ അകലമുള്ള ഈ തിമിംഗല സ്രാവ്‌ സസ്യപ്ലവകങളെ അരിച്ച്തിന്നാണ്‌ ജീവിക്കുന്നത്‌.ഇത്‌ എത്ര എണ്ണം അവശേഷിച്ചിട്ടുണ്ടെന്ന് കണ്ടെത്താനായിട്ടില്ല.ഇതിന്റെ പ്രത്യുൽപാദന രീതികളും നിഗൂഢമാണ്‌.1956ൽ ഒരു മുട്ട കണ്ടെത്തിയതിനാൽ മുട്ടയിടുന്ന ജീവിയാണെന്നു പറയാം.ഐ.യു.സി.എൻ. ഒരു അതി പ്രധാന ജീവ ജാതിയായി കണക്കാക്കിയിരിക്കുന്ന ഇതിന്റെ വേട്ടയാടൽ,കൊല,വിൽപന തുടങ്ങിയവയൊക്കെ നിരോധിച്ചിട്ടുണ്ട്‌.റെഡ്‌ ഡാറ്റാ ബുക്കിലെ ഒന്നാം പട്ടികയിൽ പെടുത്തിയിരിക്കുന്ന ഇതിനെ പിടിക്കുന്നത്‌ ശിക്ഷാർഹമാണ്.കണ്ണൂർ ജില്ലാ പരിസ്ഥിതി സമിതിയുടെ പരാതി പ്രകാരം കേസ് രജിസ്റ്റർ ചെയ്ത് അന്വേഷിക്കുന്നുണ്ടെങ്കിലും ജീവനെ സ്നേഹിക്കുന്ന എല്ലാവരും പ്രതികരിക്കുക......പ്രതിഷേധിക്കുക......

.

സുഗന്ധമയീ !!.....പ്രണാമം ...

2008-09-19T12:25:00.024+05:30

നനവ്‌ എന്ന് ഓമനപ്പേരിട്ടു വിളിക്കുന്ന ഒരു തുണ്ട്‌ ഭൂമിയുണ്ട്‌ ഞങ്ങൾക്ക്‌.എല്ലാ ജീവജാലങ്ങൽക്കുംവേണ്ടി കാത്തുസൂക്ഷിച്ചുവച്ചിരിക്കുന്ന ഒരു തുണ്ട്‌ മണ്ണ്.ഒട്ടുമുക്കാലും പ്രകൃതികൃഷി തന്നെ നടത്തുന്നഞങ്ങളുടെ ജൈവകൃഷിയിടമാണിത്‌.
ഇവിടെനിന്നും അത്യാവശ്യമില്ലെങ്കിൽ ഒരിലപോലും പറിച്ചുകളയുന്നത്‌ എന്റെ കൂട്ടുകാരന് ഇഷ്ടമുള്ളകാര്യമല്ല. നടപ്പാതകൾക്കരികെനിന്നും ദേഹത്ത്‌ കോറിവരയുന്ന മുൾചെടികളെ പോലും ഒന്നൽപംഒതുക്കാൻ പറഞ്ഞാലവനെന്നെ തിരുത്താറാണ് പതിവ്‌.ആ മുൾചെടി നമ്മുടെ 'നനവി'ൽ വന്നുപൊട്ടിമുളച്ചത്‌ അതിനിവിടെ എന്തോ ധർമ്മം നിർവ്വഹിക്കാനുള്ളതുകൊണ്ടാണെന്നവൻപറയുമ്പോൾ,'പറമ്പിൽ ഇഷ്ടമ്പോലെയവയുണ്ടല്ലോ,ഒന്നുരണ്ടെണ്ണം കളഞ്ഞാലെന്താ?' എന്നു ഞാനുംവാദിക്കാറുണ്ട്‌. അവൻ പറയുന്നതാണ് ശരിയെങ്കിലും .ഈ മണ്ണിൽനിന്നും ആ മുൾച്ചെടിക്ക്‌വലിച്ചെടുക്കാനുള്ള മൂലകങ്ങളെക്കുറിച്ചും,ആ മൂലകങ്ങൾ വേരിലും തണ്ടിലും ഇലയിലും പൂവിലുംപൂന്തേനിലും കായിലുമൊക്കെ സംഭരിച്ചുവച്ച്‌ ഒരുപാട്‌ ജീവികളെയതിന്തീറ്റിപ്പോറ്റണമെന്നതിനെപ്പറ്റിയുമൊക്കെയെനിക്കറിയാമെങ്കിലും ശരീരത്തിൽ നീറ്റലുണ്ടാക്കിക്കൊണ്ടവകീറിവരക്കുമ്പോൾ വെട്ടിയൊതുക്കാമെന്ന് ഞാൻ ചിന്തിക്കാറുണ്ട്‌.പറമ്പിലിറങ്ങിക്കയറുമ്പോൾ നാലഞ്ച്‌ചുവന്ന വരകളും കൊണ്ടാണു വരികയെങ്കിലും ഹരിക്കാവരകളുമിഷ്ടമാണ്,ഈ മണ്ണിനെയവനത്രയ്ക്ക്‌സ്നേഹിക്കുന്നത്കൊണ്ട്‌........
മഴക്കലാരംഭത്തിൽ,പറമ്പിലെ കൃഷിപ്പണികൾക്കിടയിൽ,തെങ്ങിൻതുണ്ടി(തടം)കളിലൊന്നിൽകഴിഞ്ഞ വർഷം കിളയ്ക്കാതെ വിട്ടുകളഞ്ഞ ചേനകളിലൊന്നു കരുത്തോടെ കിളിർത്തുവന്നതിനൽപ്പംപരിചരണം നൽകുന്നതിനിടയിൽ,ചെറിയ പിക്കാസുകൊണ്ടൽപം മണ്ണ് ചേനയുടെചുവട്ടിലേക്കിടുമ്പോൾ,ഒരു കയ്ക്കുമ്പിൾ നിറയെ മണ്ണ്‌ വാരിയെടുത്തവൻ മണപ്പിച്ചു.പിന്നെയാ കുമ്പിൾഎന്റെ മൂക്കിനടുത്തേക്കു കൊണ്ടുവന്നു. ഹാ! എന്തൊരു സുഗന്ധമായിരുന്നു!!...മനം മയക്കുന്ന ഹൃദ്യഗന്ധം!...ജീവന്റെ ഗന്ധം.....ആവോളമാ ഗന്ധത്തെയെന്നിലേയ്ക്കു ഞാൻ വലിച്ചെടുത്തു.ഈഗന്ധത്തെയറിയാൻ,ജീവന്റെയാത്മാംശമായീ ഗന്ധത്തെയാഹൃത്തിൽ സ്വാംശീകരിക്കാൻ കഴിയുന്നവർ, ഈ മണ്ണിലെ ഏറ്റവും ഭാഗ്യവാന്മാരാണ്;ഏറ്റവും സമ്പന്നരാണ്;ടാറ്റയേക്കാൾ, ബിർളയേക്കാളധികം.....എങ്കിലും....ഹാ; എത്ര കോടി നിർഭാഗ്യ ജന്മങ്ങൾ ഈ ഗന്ധമറിയാതെവെറുതെ ജീവിച്ചടിയുന്നു പരമ ദരിദ്രരായ്‌.....കഷ്ടം!..
ഈ മണ്ണ്...എന്റേയും നിങ്ങളുടേയും സർവ്വജീവജാലങ്ങളുടേയും മജ്ജയും, മാംസവും,രക്തവും,സിരകളും,ശ്വാസനിശ്വാസങ്ങളും,തലച്ചോറുമൊക്കെയായിത്തീരുന്ന ഈ മണ്ണ്.... ഇത്‌ പാറ പൊടിഞ്ഞുണ്ടാകുന്ന വെറും പാറപ്പൊടിയാണൊ? പാറപ്പൊടിക്ക്‌ മണ്ണായി മാറാൻകടമ്പകളേറെ കടക്കാനുണ്ട്‌.ഒരിഞ്ച്‌ കനത്തിലീ മേൽമണ്ണുണ്ടാകാൻ ആയിരത്തിലേറെ വർഷംവേണ്ടിവരുമത്രെ.സൂര്യനും, ജലവും,കാറ്റും,മറ്റും ചേർന്ന് ഊർജ്ജം നൽകി കുറേ മാറ്റം വരുത്തുന്നപാറപ്പൊടിയെ മണ്ണാക്കി മാറ്റുന്ന പ്രധാന പോരാളികൾ കോടാനുകോടി വരുന്നസൂക്ഷ്മജീവികളാണ്.ഒപ്പം മണ്ണിര,ചേരട്ട,ഉറുമ്പ്‌,ചിതൽ,ഫംഗസ്സുകൾ തുടങ്ങിയ ജീവികളും കൂടുന്നു.
സസ്യജന്തുജാലങ്ങളില്ലെങ്കിൽ മണ്ണ് മണ്ണാകുമോ?.വിസർജ്ജ്യങ്ങളടക്കമുള്ള എല്ലാ മൃതാവശിഷ്ടങ്ങളുംമുൻപറഞ്ഞ വിഘാടകർ മണ്ണിന്റെ ഘടകങ്ങളാക്കി മാറ്റുമ്പൊൾ,മണ്ണിന്റെ നിർമ്മാണം ഏകദേശംപൂർതിയാവുന്നു.ഓരോ സസ്യത്തിൽനിന്നും മണ്ണിനു കിട്ടാനുള്ളത്‌ ഓരോയിനം സവിശേഷമൂലകങ്ങളെയാണ്.ചീരയിലത്‌ ഇരുമ്പായും,നെല്ലിക്കയിലത്‌ അസ്കോർബിക്കാസിഡായും,ധാന്യവർഗ്ഗ്ങ്ങളിൽ ക‍ാർബണും,ഹൈഡ്രജനൂം,ഓക്സിജനുമായും ഒക്കെയാണിരിക്കുന്നത്‌.മനുഷ്യനിനിയുംകണ്ടെത്താനാകാത്തയത്രയിനം സൂക്ഷ്മ മൂലകങ്ങളും ഓരോ സസ്യങ്ങളും മണ്ണിൽനിന്നുംശേഖരിച്ചുവെക്കുന്നുണ്ട്‌.'പൊലുവള്ളി' എന്ന 'നിറയോലം' കെട്ടുന്നതിൽ വയ്ക്കുന്ന ആ കുഞ്ഞുവള്ളിച്ചെടി നിങ്ങളുടെ പറമ്പിൽ മുളച്ചു വന്നിട്ടുണ്ടെങ്കിൽ മനസ്സിലാക്കിക്കൊള്ളുക നിങ്ങളുടെ മണ്ണു് ഏറെസമ്പുഷ്ടമായിരിക്കുന്നെന്ന്.സസ്യവളർച്ചയ്ക്കാവശ്യമായ നിരവധി സൂക്ഷ്മ മൂലകങ്ങളുള്ളയീ സസ്യംഇല്ലം-നിറ'യിൽ കെട്ടാൻ കാരണവും ഈ ഐശ്വര്യമാണ്.
സൂക്ഷ്മവും അല്ലത്തതുമായ മൂലകങ്ങളടങ്ങിയ ജൈവാംശത്തിന്റെ(ഹ്യൂമസ്‌) ഒരു നേർത്തപാളിയും,അതിനേയും പൊതിഞ്ഞ ഒരു നേർത്ത ജലപാളിയും ഇതിൽ ജീവിക്കുന്ന അനേകംസൂക്ഷ്മജീവികളടങ്ങിയജീവനുള്ള ഒരു വസ്തുവാണ്,നിസ്സാരമെന്നു നമ്മൾ കരുതുന്ന ഒരു യഥാർത്ഥമൺതരി.!!...ഈ തരികൾ കൂടിച്ചേർന്നതിൽ മറ്റു കൊച്ചു ജീവികളും കൂടി ചേരുമ്പോൾ സുഗന്ധമയിയായമണ്ണ് എന്ന അൽഭുതപ്രതിഭാസത്തിന്റെ ഒരേകദേശരൂപമായി.
"മനുഷ്യാ നീ മണ്ണാകുന്നു"എന്ന മഹത്ഗ്രന്ഥവചനം അന്വർത്ഥമാണ്. സസ്യങ്ങൾ മണ്ണിൽ നിന്നുംപോഷണങ്ങൾ വലിച്ചെടുത്ത്‌ അന്നരൂപത്തിലാക്കി നമുക്ക്‌ തരുന്നു. നിങ്ങൾക്ക്‌ബുദ്ധിശക്തിയും,ഓർമ്മ്ശ്ക്തിയും ഉണ്ടാകാൻ ഒരൽപം സ്വർണ്ണത്തിന്റെ ആവശ്യമുണ്ട്‌.അത്‌ ജൈവസ്വർണ്ണമാണ്.മണ്ണിൽനിന്നും മുത്തിൾ,ബ്രഹ്മി തുടങ്ങിയ സസ്യങ്ങൾ വലിച്ചെടുത്ത്‌ അവ നിങ്ങൾക്ക്‌നൽകും.ശരീരത്തിൽ പതിനായിരങ്ങൾ വിലയുള്ള സ്വർണ്ണാഭരണങ്ങൾ കെട്ടി നടന്നാലൊന്നുംനിങ്ങൾക്ക്തു കിട്ടില്ല.
മുരിങ്ങ,നരയൻ കുമ്പളം തുടങ്ങിയവ കായ്ക്കണമെങ്കിൽ കാൽസ്യം എന്ന മൂലകം വേണം.നമ്മുടെപറമ്പിൽ അവയെത്തുന്നത്‌ നാലഞ്ച്‌ കുറുക്കന്മാരിലൂടെയാണ്.തൊട്ടടുത്ത വയലിൽ നിന്നുംഞണ്ടിനേയും,നൊയ്ച്ചിങ്ങയേയും മറ്റും തിന്ന ശേഷം പറമ്പിൽ വന്നു കാഷ്ടിക്കുന്നു. അങ്ങിനെപറമ്പില്‍ അത്യാവശ്യമായിരുന്ന കാല്‍സ്യം എന്ന മു‌ലകം ഭക്ഷ്യശൃംഖലയിലൂടെ ലഭിക്കുന്നു. ഇത്‌ തനത്‌മൂലകങ്ങളുടെ യഥാർത്ഥ സഞ്ചാരപഥം...!.മനുഷ്യനൊഴികെ മറ്റെല്ലാ ജീവജാലങ്ങളിലും ഈപാരിസ്ഥിതിക ബോധമുണ്ട്‌.മനുഷ്യൻ മാത്രം വീട്ടിനകത്തുള്ള ക്ലോസെറ്റിലൂടെ സിമന്റ്‌ ടാങ്കുകളിൽവിസർജ്ജ്യം സംഭരിച്ചുവെക്കുമ്പോൾ മണ്ണിനോട്‌ ഒരുപാടനീതിയാണു ചെയ്യുന്നത്‌.മണ്ണിനെദരിദ്രമാക്കുകയാണ് ചെയ്യുന്നത്‌.
മണ്ണിനോട്‌ നമ്മൾ ചെയ്യുന്ന ചതികൾ ഇനിയും ഒരുപാടുണ്ട്‌. പലതും കൊലച്ചതികളാണ്.ഖനനമെന്നപേരിൽ കിളച്ചുമറിക്കലുകൾ,രാസവളകീടനാശിനികൾ,പ്ലാസ്റ്റിക്‌ പോലുള്ള മാലിന്യങ്ങൾ,എന്നിവയാൽമണ്ണിനെ മൃതമാക്കിയുംവരട്ടിയുണക്കിയുംകൊല്ലൽ,സസ്യാവരണം നശിപ്പിച്ച്‌ കൊല്ലൽ,സീമന്റിട്ടൂം ടാർപൂശിയും നശിപ്പിക്കൽ,ഏകവിളത്തോട്ടങ്ങളുണ്ടാക്കികൊല്ലൽ...അങ്ങിനെ...അങ്ങിനെ........ഒരുപാടൊരുപാട്‌...... വികസനമെന്ന് നമ്മൾ ഓമനപ്പേരിട്ട്‌വിളിക്കുന്ന വിനാശങ്ങൾ.....!!
ഒരൽപം മണ്ണ് ശരീരത്തിൽ പുരളുമ്പോഴേയ്ക്കും പലർക്കും എന്തൊരവജ്ഞയാണ്?!...ശ്ശോ.....മണ്ണ്.... ചെളി... വൃത്തികെട്ട വസ്തു...കീടാണുക്കളുടെ കൂടാരം...ഉടൻ സോപ്പിട്ടും,ഡെറ്റോളിട്ടുംകഴുകിത്തുവർത്തണം...കുട്ടികളെ മണ്ണിൽ കളിക്കാൻ അനുവദിക്കുകയേയില്ല.ചെരിപ്പിടാതെവീട്ടിനകത്ത്‌ പോലും നടക്കരുത്‌....ചെരിപ്പ്‌ എന്ന മനുഷ്യനെ മണ്ണിൽ നിന്നകറ്റുന്ന പടച്ചട്ട.....കാലിനുംമണ്ണിനുമിടയിലെല്ലായ്പ്പോഴും ചെരിപ്പിനെ വെയ്ക്കുന്നവർ നഷ്ടപ്പെടുത്തുന്നത്‌ അവരുടെകായികശേഷിയും,രോഗപ്രതിരോധശേഷിയുമാണ്.ശരീരത്തിലെ മർമ്മപ്ര്ദ്ധാനമായ ഒരു ഭാഗമാണ്കാലടിയും,കൈവെള്ളയും.അവിടങ്ങളിലെ ഓരോ ഭാഗങ്ങളിലും മണ്ണിലൂടെ ഏൽക്കുന്ന ചെറിയ... ചെറിയ സമ്മർദ്ദ്ങ്ങൾ നമ്മുടെ എല്ലാ ആന്തരാവയവങ്ങൾക്കും സ്വസ്ഥതയും അതിലൂടെ ആരോഗ്യവുംനൽകുന്നു.മിക്ക രക്തജന്യ രോഗങ്ങൾക്കും കാരണം മണ്ണുമായി ബന്ധമില്ലത്തത്‌ കൊണ്ടാണെന്ന്ആധുനിക പഠനങ്ങൾ വരെ വെളിപ്പെടുത്തുന്നു.ഇതു പോലെ രോഗപ്രതിരോധ ശേഷി ലഭിക്കാൻപ്രകൃതിയുടെ വഴിയിൽ ജീവിച്ചാൽ മാത്രം മതി.കൃത്രിമ പ്രതിരോധ കുത്തിവെപ്പുകൾ എന്നഅപടകരമായ തട്ടിപ്പുകൾ ഒന്നും സ്വീകരിക്കേണ്ടതില്ല.ഇന്നത്തെ മണ്ണ് നമ്മൾ താറിട്ടും, കുപ്പിച്ചില്ലുകൾനിരത്തിയും അപകടമുള്ളതാക്കിക്കഴിഞ്ഞതിനാൽ ചെരിപ്പിടാതെ എല്ലായിടത്തുംനടക്കാനാവില്ലെങ്കിലും ദിവസം ഒരൽപസമയമെങ്കിലും ജൈവമണ്ണിൽ ചവിട്ടി നടക്കുന്നത്‌ നിങ്ങളുടെആരോഗ്യത്തെ പതിന്മടങ്ങ്‌ വർദ്ധിപ്പിക്കും.
എല്ലാമെല്ലാമായമണ്ണ്...എല്ലാംതരുന്നമണ്ണ്....സുഗന്ധ്മയിയും,അന്നപൂർണ്ണേശ്വരിയും,ജലദയും,ജീവദയുമായമണ്ണ്....നമുക്കീ മണ്ണിനെ പ്രഭതത്തിലുണർന്ന്തൊട്ടുകണ്ണിൽവച്ച്പ്രണമിക്കാം.....
അന്നപൂർണ്ണേശ്വരീ......ജലദേ.....സുഗന്ധമയീ....പ്രണാമം....അമ്മേ...പ്രണാമം... '

കിളികളുടെ ആപ്പിൾ

2008-09-11T17:52:00.005+05:30

തെറ്റി.ഇക്സൊറ കൊക്സീനിയ.റൂബിയെസി കുടുംബം.മനോഹരമായ ഈ പഴം കാണുമ്പോൾ വായിൽ വെള്ളമൂറൂന്നില്ലെ!ഒരു ആപ്പിളിൽ ഉള്ളതിനേക്കാൾ അധികം പോഷകങ്ങൾ ഒരു തെറ്റിപ്പഴത്തിൽ ഉണ്ട്‌.കീടനാശിനികളില്ല,രാസവസ്തുക്കളില്ല.ഒരുപാട്‌ ഔഷധഗുണങ്ങളുണ്ട്‌.പക്ഷികൾക്ക്‌ പറക്കാനുള്ള ഊർജ്ജവും ചന്തവും കിട്ടുന്നത്‌ ഇതു തിന്നിട്ടാണ`.നമുക്കും തിന്നാം പക്ഷെ അധികമാവരുത്‌ ദഹിക്കില്ല. ഇടനാടൻ ചെങ്കൽക്കുന്നുകളിലെ ഒരു സ്വാഭാവിക സസ്യമാണിത്‌. .കുന്നു നശിക്കുമ്പോൾ ഈ പൂവും,കായും,ഇതിലെ ഔഷധങ്ങളും മാത്രമല്ല കിളികളും നശിക്കുന്നു.

ഇരയും ഇരതേടിയും

2008-09-11T17:24:00.004+05:30

ഞാൻ അഴുകണ്ണി.എത്ര നേരമായി ഭക്ഷണം കാത്തിരിക്കുന്നു.

ഹായ്‌!! കിട്ടിപ്പോയ്‌.ഇനി തിന്നാൻ തുടങ്ങാം

വയറു നിറഞ്ഞല്ലൊ!ബാക്കി നാളെ

സഹജവാസനകള്‍

2008-09-02T16:17:00.008+05:30

എല്ലാ ജീവികൾക്കും സഹജവാസനകളുണ്ട്‌. ഒരു പൂമ്പാറ്റ മുട്ടയിടേണ്ടുന്ന ചെടി സ്വയം കണ്ടുപിടിക്കുന്നത്‌ ആരും പറഞ്ഞുകൊടുത്തിട്ടല്ല. മുട്ട വിരിഞ്ഞ്‌ ലാർവ്വകൾ ആ ഇലകൾതിന്ന്ജീവിക്കുന്നതും ആരും പഠിപ്പിച്ചിട്ടല്ല. ഒരു കിളി കൂട്‌ കൂട്ടുന്നതും, ഇണ ചേരുന്നതും സഹജവാസനയാലാണ് . ഒരൊ ജീവജാലങ്ങൾക്കും ഒരൊ ജന്മദൗത്യമുണ്ട്‌.പ്രപഞ്ചമൊരുക്കിയജീവശൃംഖലയിലെ കണ്ണികളാണ് ഓരോ ജീവി വർഗ്ഗങ്ങളും,അവ പരസ്പരാശ്രിതത്ത്വത്തിൽ ജീവന്റെ അനുസ്യൂത പ്രവഹത്തിനു് അനുസൃതമയിട്ടാണു് ജീവിക്കുന്നതു്.ഓരോരോ വര്‍ഗ്ഗത്തിലും അതിനനുയോജ്യമായ സഹജവാസനകൾ രേഖപ്പെടുത്തപ്പെട്ടിരിക്കുന്നു. ജന്മജന്മാന്തരങ്ങളായി ജനിതകമായി കോർത്തിണക്കപ്പെട്ട ഇവ എല്ലാ ജീവിവർഗ്ഗങ്ങളും പാലിക്കുന്നു. പക്ഷെ ലക്ഷക്കണക്കിനുവർഗ്ഗങ്ങളിൽ ഒന്നു മാത്രമായ മനുഷ്യനും അവന്റെ ഇടപെടലിൽകൂടി അവനു് ചുറ്റും പുലരുന്ന ജീവിവർഗ്ഗങ്ങളും മാത്രം ജീവന്റെ നിയമങ്ങളെ പാലിക്കുന്നില്ല. എന്തുകൊണ്ടെന്നാൽ അവനു ബോധം എന്ന ഒരു ഗുണവിശേഷം കൂടി കിട്ടിയിരിക്കുന്നു. ഇതു കൂടുതൽ ജീവന്റെ സത്തയോട്‌ അടുക്കാൻപ്രയോജനപ്പെടുത്തുന്നതിനു പകരം ജീവനിൽ നിന്നും അകന്നു കൃത്രിമത്വത്തിലേക്കു പോയിസുഖലോലുപത ഉണ്ടാക്കുവാൻ ബോധത്തിൽ നിന്നു ഉളവായ ബുദ്ധിയാൽ അവൻ ശ്രമിക്കുന്നു.
സഹജവാസനകൾ ഇല്ലാതായിപ്പോകുന്നത്‌ ശീലങ്ങൾ നിമിത്തമാണ്. നാം ശീലവിധേയരാണ്. ജനിച്ചനാൾ തൊട്ടു നമ്മെ എല്ലാവരും ശീലങ്ങൾ പഠിപ്പിക്കുന്നു.[അമ്മ,അഛൻ,സമൂഹം].അവിടെ മുതൽനമ്മുടെ സഹജവാസനകൾ നശിക്കാൻ തുടങ്ങുന്നു.ജനിതക കോഡുകളിലൂടെ തലമുറകളിലൂടെ നമ്മിലുമെത്തിച്ചേരുന്ന സഹജമായ ജീവരഹസ്യം നമുക്കു് അനുഭവിച്ചു ആനന്ദിക്കാന്‍ കഴിയാതെപോകുന്നു.കാരണം ശീലവിധേയമാക്കപ്പെട്ടവരാണു് നാം.സഹജവാസനയാൽ വിശക്കുമ്പോൾ മാത്രം ഭക്ഷണത്തിനു് ആവശ്യപ്പെടുന്ന കുഞ്ഞിനു് സമയം നോക്കി നമ്മൾ അനാവശ്യമായി ഭക്ഷണം കുത്തിത്തീറ്റിക്കുന്നു.അങ്ങിനെ ആദ്യമായി വിശപ്പ്‌ എന്ന സഹജവാസന അവനിൽ നിന്നും നാംതട്ടിയെടുക്കുന്നു.ഓരോ നിമിഷവും നാം ആ നിഷ്കളങ്ക ജന്മത്തെ സമൂഹത്തിലെ കുടിലതകളേയുംപരിഷ്കാരങ്ങളേയും,ജീവനെതിരായ നിയമങ്ങളേയും അനുകരിക്കൻ പഠിപ്പിക്കുന്നു.അനുകരണം ജീവിതമല്ല അഭിനയമാണ്. അത്‌ നമ്മെ നമ്മുടെ യഥാർത്ഥ സത്തയില്‍ നിന്നും അകറ്റുന്നു.അത് ഉപരിപ്ലവമാണ് പഴത്തിന്റെ തൊലി മാത്രം തിന്ന് അതിന്റെ സത്തയെന്നു തെറ്റിദ്ധരിച്ച് സന്തോഷിച്ചു് പൊട്ടിച്ചിരിക്കുന്ന വിഡ്ഡികളാണു നാം. ജീവിതത്തിന്റെ ആഴമറിയണമെങ്കിൽ നമ്മുടെ നഷ്ട്ടപ്പെട്ടുപോയസഹജവാസനകൾ ഉണർത്തേണ്ടതുണ്ട്‌.സമയം നോക്കി ഭക്ഷണം കഴിക്കാതെ വിശക്കുമ്പോൾ മാത്രം ഭക്ഷണം കഴിക്കുക-വിശപ്പ്എന്ന ഒരു സഹജവാസനയെങ്കിലും അതനുഭവിക്കുമ്പോഴുള്ള ആനന്ദ്ത്തോടെ തിരിചു കൊണ്ടുവരാം. ഓരോന്നും സ്വയം അറിയുക .സഹജവാസനയിൽ ജീവിക്കുക എന്നാൽ ആനന്ദം അനുഭവിക്കലാണ്. അതു നിങ്ങൾക്ക്‌ എന്നോട്‌ പറഞ്ഞുതരാനാവില്ല.എനിക്കു നിങ്ങളോടും. കാരണം നമ്മുടെ ജനിതക കോഡുകളും ജന്മവും വ്യത്യസ്തമാണ് എന്നത്‌ തന്നെ. ബുദ്ധി കൊണ്ട്‌ എല്ലാം ഒരേ ചതുരക്കള്ളികളിലാക്കുന്നത്‌ ജീവിതത്തെ വിരസമാക്കുന്നു.
അതിനാൽ നമുക്കു നമ്മുടെ സഹജവാസനകളെ ഓരോന്നായ്‌ തിരിച്ചുപിടിക്കാൻ ശ്രമിക്കാം.ഒരു ചെറുവിജയം പോലും അത്യാനന്ദകരമായിരിക്കും.